អ៊ីរ៉ង់ថា នាយករដ្ឋមន្រ្តីអ៊ីស្រាអែល យកជើងរាទឹក
ថ្លែងក្នុងសន្និសីទកាសែត នៅក្រុងតេអេរ៉ង់ បន្ទាប់ពីបានជួបពិភាក្សា ជាមួយរដ្ឋមន្ត្រីការបរទេសអ៊ីតាលី លោក ប្រមុខការទូត អ៊ីរ៉ង់ បានសម្តែងប្រតិកម្មរិះគន់ ទៅលើទង្វើរបស់ លោកនាយករដ្ឋមន្រ្តីអ៊ីស្រាអែល។ លោកថា ការដែល លោកនេតាន់យ៉ាហ៊ូ ទៅអំពាវនាវរារាំងកុំឲ្យមានកិច្ចព្រមព្រៀង លើបញ្ហានុយក្លេអ៊ែរអ៊ីរ៉ង់ នៅចំពោះមុខសភាអាមេរិក វានឹងបំផ្លាញកិច្ចខំប្រឹងប្រែង របស់ភាគីទាំងអស់ អស់រយៈពេល ប៉ុន្មានឆ្នាំកន្លងមកនេះ។
ចុះផ្សាយនៅថ្ងៃ៖
ស្តាប់ - ០១:៣៨
ការចរចាលើការគ្រប់គ្រងកម្មវិធីនុយក្លេអ៊ែរអ៊ីរ៉ង់ រវាងប្រទេស ៥+១ មាន អាមេរិក បារាំង អាល្លឺម៉ង់ អង់គ្លេស ចិន រុស្ស៊ី និង អ៊ីរ៉ង់ផ្ទាល់ ហាក់បានឈានទៅមុខ គួរជាទីសង្ឃឹម។ ការចរចារដែលប្រព្រឹត្តទៅ នៅទីក្រុងហ្សឺណែវ កាលពីសប្តាហ៍មុន បានសង្កត់ធ្ងន់ ទៅលើបញ្ហាបច្ចេកទេស ហើយដែលត្រូវគេសង្កេតឃើញថា ភាគី អាមេរិក និងអ៊ីរ៉ង់ហាក់ដូចជានិយាយត្រូវគ្នាច្រើន។
ដោយឡែក លោកនេតាន់យ៉ាហ៊ូ Netanyahu នាយករដ្ឋមន្រ្តី អ៊ីស្រាអែល បានថ្លែងថា លោកនឹងធ្វើដំណើរ ទៅក្រុងវ៉ាស៊ីនតោន ដើម្បីធ្វើសេចក្តី ថ្លែងការណ៏នៅចំពោះសភាអាមេរិក ទាក់ទិនទៅនឹងការព្រមព្រៀងលើកម្មវិធីនុយក្លេអ៊ែរអ៊ីរ៉ង់។ លោក នេតាន់យ៉ាហ៊ូ យល់ថា កិច្ចព្រមព្រៀងដែលកំពុងតែចរចានេះ វានឹងបង្កគ្រោះថ្នាក់ ដល់សន្តិសុខជាតិរបស់អ៊ីស្រាអែល។ ដូច្នេះ វាជា កាតព្វកិច្ចរបស់លោក ដែលត្រូវធ្វើយ៉ាងណា ការពារផលប្រយោជន៍ជាតិអ៊ីស្រាអែល។ លោកបន្ថែមថា ប្រទេសមហាអំណាចទាំង ៦កំពុងតែ និយាយត្រូវរូវគ្នាជាមួយអ៊ីរ៉ង់ បន្តែសម្រាប់លោក លោក មិនគាំទ្រអ្វីដែលគេកំពុងចរចានោះទេ។ លោកថា លោកនឹងអំពាវនាវ ឲ្យសមាជិកសភាអាមេរិក កុំអាលឆាប់ចាញ់ល្បិចរបស់អ៊ីរ៉ង់ ហើយត្រូវបន្ថែមទណ្ឌកម្មថ្មីទៀត លើអ៊ីរ៉ង់ដើម្បីឲ្យអ៊ីរ៉ង់ បញ្ឈប់កម្មវិធីនុយក្លេអ៊ែរ។
ថ្លែងក្នុងសន្និសីទកាសែត បន្ទាប់ពីបានសំណេះសំណាល ជាមួយលោក រដ្ឋមន្រ្តីការបរទេសអ៊ីតាលី លោក Javad Zarif រដ្ឋមន្រ្តីការបរទេសអ៊ីរ៉ង់ បានចេញប្រតិកម្មភ្លាមៗ ដោយបានចោទថា នាយករដ្ឋមន្ត្រីអ៊ីស្រាអែល បានយកជើងរាទឹក បង្អាក់ដំណើរការចរចា ដែលកំពុងតែទៅមុខយ៉ាងល្អ។ លោក ថា វាជារឿងគួរឲ្យសោកស្តាយណាស់ ដែលមនុស្សមួយចំនួន គិតតែពីប្រយោជន៍ផ្ទាល់ខ្លួន ចង់សុខចង់ស្រួលតែម្នាក់ឯង មិនបានគិតពីការលំបាករបស់អ្នកដ៏ទៃ។
យ៉ាងណាមិញ លោករដ្ឋមន្រ្តីការបរទេសអ៊ីតាលី Paolo Gentiloni បានមានប្រសាសន៍ថា អ៊ីរ៉ង់មានទួនាទីសំខាន់ណាស់ ក្នុងការរក្សាស្ថេរភាពក្នុងតំបន់មជ្ឈឹមបូព៌ាទាំងមូល ជាពិសេសទាក់ទិនទៅនឹង ការបោសសម្អាត ក្រុមជីហាតអ៊ីស្លាមនិយម ដែលកំពុងតែ ធ្វើផ្គរធ្វើភ្លៀងនៅតំបន់នេះ។ ប្រទេសមហាអំណាចត្រូវតែ ពួតដៃគ្នាជាមួយអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ