អ៊ីរ៉ង់៖សភាចង់ឲ្យរដ្ឋាភិបាលផ្តើមអនុវត្តកម្មវិធីនុយក្លេអ៊ែរ បើអាមេរិកដាក់ទ័ណ្ឌកម្មថ្មី
នៅក្នុងប្រទេសអ៊ីរ៉ង់ សភាបានយល់ព្រមក្នុងសម្លេងភាគច្រើននៅថ្ងៃអង្គារ ទី៣ កុម្ភៈឲ្យធ្វើការសិក្សាលើសេចក្តីព្រាងច្បាប់មួយពាក់ព័ន្ធនឹងរឿងនុយក្លេអ៊ែរដ៏ចម្រូងចម្រាស។ សេចក្តី ព្រាងច្បាប់នេះបានចែងយ៉ាងច្បាស់ថា បើមានទ័ណ្ឌកម្មថ្មីជាយថាហេតុពីសហគមន៍អន្តរជាតិ ពិសេសពីអាមេរិកក្នុងរឿងនុយក្លេអ៊ែរ រដ្ឋាភិបាលចំាចាប់ត្រូវតែឆ្លើយវាយបកវិញតាមរយៈការផ្តើមអនុវត្តន៍នូវរាល់កម្មវិធីនុយក្លេអ៊ែររបស់ខ្លួន។ ប្រតិកម្មរបស់សភាអ៊ីរ៉ង់ពេលនេះបានធ្វើឡើង ចំពេលដែលសហគមន៍អន្តរជាតិ និងភាគីអ៊ីរ៉ង់កំពុងបន្តស្វែងរកកិច្ចព្រមព្រៀងស្ថាពរមួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ជាមួយនឹងសម្លេងគំាទ្រ ២២០នាក់ក្នុងចំណោមអ្នកតំណាងរាស្រ្តសរុបទំាង ២៩០នាក់នៅក្នុងសភាអ៊ីរ៉ង់ សេចក្តីព្រាងច្បាប់នោះបានចែងច្បាស់ៗថា ក្នុងករណីដែលសភាពេញអង្គ រដ្ឋាភិបាល ឬមួយក៏ក្រសួងយុត្តិធម៌នៅសហរដ្ឋអាមេរិកអនុម័តទ័ណ្ឌកម្មថ្មីដាក់លើអ៊ីរ៉ង់ក្នុងរឿងនុយក្លេអ៊ែរ នោះរដ្ឋាភិបាលអ៊ីរ៉ង់ចំាបាច់ត្រូវតែឆ្លើយតបវិញជាបន្ទាន់ ដោយលប់ចោលកិច្ចព្រមព្រៀងបឋមដែលខ្លួនបានចុះហត្ថលេខាជាមួយបស្ចិមលោកក្នុងទីក្រុងហ្សឺណែវ ប្រទេសស្វីស រួចចាប់ផ្តើមអនុវត្តន៍ឡើងវិញនូវរាល់កម្មវិធីនុយក្លេអ៊ែរដែលជាសិទ្ធិរបស់ប្រទេសអ៊ីរ៉ង់។ គួររម្លឹកជូនថា កាលពីខែវិច្ឆិកា ឆ្នំា ២០១៣ អ៊ីរ៉ង់ និង៥ភាគីបូក១ បានចុះហត្ថលេខាលើកិច្ចព្រមព្រៀងបឋមមួយដោយអ៊ីរ៉ង់យល់ព្រមផ្អាកកម្មវិធីនុយ្លេអ៊ែរមួយចំនួនរបស់ខ្លួនជាថ្នូរនឹងការដែលបស្ចិមលោកយល់ព្រមដកទ័ណ្ឌកម្មសេដ្ឋកិច្ចខ្លះៗពីអ៊ីរ៉ង់។
គេនៅមិនដឹងថា តើសេចក្តីព្រាងច្បាប់ស្នើឡើងដោយក្រុមអ្នកតំណាងរាស្រ្តអ៊ីរ៉ង់នឹងត្រូវដាក់ឲ្យសភាអនុម័តនៅពេលណាទេ។ អ្វីដែលគេដឹង ល្គឹកណាអ៊ីរ៉ង់ទទួលទ័ណ្ឌកម្មថ្មីពីអាមេរិក នោះរដ្ឋាភិបាលទីក្រុងតេហេរ៉ង់ត្រូវតែផ្តើមធ្វើសកម្មភាពចម្រើនធាតុអ៊ុយរ៉ាញ៉ូមរបស់ខ្លួនដោយគ្មានការកម្រិតបរិមាណ ពោលមិនត្រូវគោរពតាមការកំណត់របស់បស្ចិមលោកទេ។ ទន្ទឹមគ្នានេះ អ៊ីរ៉ង់ក៏ត្រូវផលិតបន្ថែមនូវគ្រឿងបញ្ឆេះចំាបាច់មួយចំនួនសម្រាប់ផ្គត់ផ្គង់ឲ្យអនាគតមជ្ឈមណ្ឌលនុយក្លេអ៊ែរមួយចំនួនទៀត។ ទំាងនេះមិនភ្លេចនិយាយទេ ពីការដាក់ឲ្យដំណើរការឡើងវិញនូវម៉ាស៊ីនប្រតិកម្មទឹកធ្ងន់នៅមជ្ឈមណ្ឌលអារ៉ាកដែលអាចផ្តល់ចេញនូវសារធាតុភ្លុយតូញ៉ូម។
ប្រតិកម្មរបស់សភាអ៊ីរ៉ង់ពេលនេះ គឺជាការឆ្លើយតបចំពោះគណៈកម្មការធនាគារនៃព្រឹទ្ធសភាអាមេរិកំាងដែលបានសម្រេចឲ្យមានការដាក់ទ័ណ្ឌកម្មថ្មីលើអ៊ីរ៉ង់ក្នុងករណីដែលកិច្ចចរចានាពេលខាងមុខជាប់គំាង។ សូមជម្រាបជូនថា អ៊ីរ៉ង់ និង ៥ភាគីបូក១ ត្រៀមបញ្ចប់ភាពចម្រូងចម្រាសគ្នាតាមរយៈការអនុម័តចេញនូវកិច្ចព្រមព្រៀងចុងក្រោយមួយឲ្យបានមុនថ្ងៃទី១ កក្កដាខាងមុខ។ បស្ចិមលោកចង់កម្រិតការចម្រើនធាតុអ៊ុយរ៉ាញ៉ូមដើម្បីរារំាងអ៊ីរ៉ង់កុំឲ្យយកទៅផលិតគ្រាប់បែកបរមាណូ។ តែអ៊ីរ៉ង់បន្តធានាថា កម្មវិធីនុយក្លេអ៊ែរខ្លួនមានលក្ខណៈស៊ីវិល និងថា ខ្លួនក៏មានសិទ្ធិបំពាក់នុយក្លេអ៊ែរស៊ីវិលដូចប្រទេសដទៃដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ