ជិតពាក់កណ្តាលនៃជនរងគ្រោះក្នុងគ្រោះថ្នាក់ធ្លាក់យន្តហោះ ជាជនជាតិអាល្លឺម៉ង់
យន្តហោះធុន Airbus A ៣២០របស់ក្រុមហ៊ុនអាកាសចរណ៍អាល្លឺម៉ង់ ឈ្មោះ Germanwing ដែលដឹកមនុស្ស១៥០នាក់ ចេញពីទីក្រុងប៉ាសឺឡូនរបស់អេស្ប៉ាញ ទៅកាន់ទីក្រុង ឌុយសេលដូហ្វ របស់ប្រទេសអាល្លឺម៉ង់ បានធ្លាក់ កាលពីព្រឹកថ្ងៃអង្គារទី ២៤មីនា នៅភាគខាងត្បូងប្រទេសបារាំង។ តាមលោកប្រធានាធិបតីបារាំង ហ្វ្រងស័រ ហូឡង់ គ្មានសញ្ញារួចរស់ជីវិតណាមួយ របស់អ្នកដំណើរ ឬបុគ្គលិករបស់យន្តហោះទេ។ នៅប៉ុន្មាននាទីក្រោយដំណឹងដ៏គួរឲ្យរន្ធត់ ប្រធានាធិបតីបារាំង បានសន្ទនាតាមទូរស័ព្ទ ជាមួយប្រមុខដឹកនាំអាល្លឺម៉ង់ និងអេស៉្បាញ ចំណែកបន្ទប់ដោះស្រាយវិបត្តិសម្រាប់គ្រួសារជនរងគ្រោះត្រូវបានបង្កើតភ្លាមៗដែរ នៅក្នុងប្រទេសបារាំង អាល្លឺម៉ង់ និងអេស្ប៉ាញ។
ចុះផ្សាយនៅថ្ងៃ៖
នៅក្នុងសន្និសីទកាសែត ល្ងាចថ្ងៃអង្គារ ប្រធានក្រុមហ៊ុនអាកាសចរណ៍អាល្លឺម៉ង់ Germanwingបាននិយាយថា នៅក្នុងចំណោមមនុស្សជិះលើយន្តហោះទាំង ១៥០នាក់ មាន៦៧នាក់ ជាជនជាតិអាល្លឺម៉ង់ ហើយក្នុងនោះ ១៦នាក់ ជាសិស្សសាលាអាល្លឺម៉ង់ ដែលទើបបញ្ចប់កម្មសិក្សានៅអេស្ប៉ាញ។ តាមប្រធានក្រុមហ៊ុនអាកាសចរណ៍ អាល្លឺម៉ង់ ក្នុងចំណោមអ្នកដំណើរក៏មានផងដែរ កូនង៉ែតពីរនាក់។ នៅថ្ងៃអង្គារ នាយករដ្ឋមន្រ្តីអាល្លឺម៉ង់ លោកស្រី អង់ហ្គែឡា ម៉ែរគែល បានសំដែង ការកាន់ទុក្ខ ជូនជនរងគ្រោះ និងសន្យាធ្វើដំណើរទៅកាន់កន្លែងកើតហេតុ នៅថ្ងៃពុធនេះ។
យន្តហោះធុន Airbus A ៣២០ ដែលដឹកអ្នកដំណើរ ១៤៤នាក់ និង៦នាក់ទៀត ជាបុគ្គលិក និងអ្នកបើកយន្តហោះ បានហោះចេញពីទីក្រុងបាសឺឡូនរបស់អេស្ប៉ាញ នៅព្រឹកម៉ោង ១០ និងហោះកាត់ ទឹកដីបារាំង មុននឹងបាត់ពីរ៉ាដា របស់ក្រុមត្រួតពិនិត្យបារាំង នៅមួយម៉ោងក្រោយ។ តាមប្រភពពីអាជ្ញាធរអេស្ប៉ាញ ជនជាតិអេស្ប៉ាញ ប្រមាណ ៤៤នាក់ មានវត្តមាននៅក្នុងយន្តហោះដែលធ្លាក់កាលពីថ្ងៃអង្គារ។ សោកនាដកម្មបានជំរុញឲ្យព្រះមហាក្សត្រអេស្ប៉ាញ ហ្វេលីព ទី ៦ ដែលកំពុងមានវត្តមាននៅក្នុងទីក្រុងប៉ារីស បញ្ឈប់ជាបន្ទាន់ ទស្សនកិច្ចផ្លូវរដ្ឋរបស់ព្រះអង្គដែលទើបចាប់ផ្តើមបានប៉ុន្មានម៉ោង នៅថ្ងៃអង្គារ។
ទោះត្រូវបញ្ឈប់ជាបន្ទាន់ទស្សនកិច្ច របស់ព្រះអង្គ នៅប្រទេសបារាំង ព្រះមហាក្សត្រអេស្ប៉ាញនៅបន្តស្ថិតនៅប្រទេសបារំាង ដើម្បី ចូលរួមក្នុងកិច្ចប្រជុំពិគ្រោះបន្ទាន់រៀបចំដោយ រដ្ឋាភិបាលបារំាង នៅល្ងាចថ្ងៃអង្គារ។
រហូតមកដល់ល្ងាចថ្ងៃអង្គារ គេនៅមិនទាន់បានដឹងពីមូលហេតុនៃគ្រោះថ្នាក់ធ្លាក់យន្តហោះ។ បញ្ហាអាកាសធាតុ អាក្រក់ មិនត្រូវគេរាប់បញ្ចូល ព្រោះបើតាមឧតុនិយមបារាំង ផ្ទៃមេឃស្រឡះល្អ ខ្យល់ ក៏មិនបក់បោកខ្លាំង នៅខណៈដែលយន្តហោះ Airbus A ៣២០ ហោះកាត់ប្រទេសបារាំង។ នៅល្ងាចថ្ងៃអង្គារដដែល ក្រុមជួយសង្រ្គោះបារាំង ត្រូវបានគេបញ្ជូនទៅកាន់កន្លែងកើតហេតុ ប៉ុន្តែ តាមប៉ូលិសបារាំង គេត្រូវការពេលវេលាយូរថ្ងៃ ដើម្បីអាចចូលទៅយកសាកសព និងស៊ើបអង្កេត ស៊ីជម្រៅ ព្រោះថា កន្លែងដែលយន្តហោះធ្លាក់ ស្ថិតនៅភ្នំ ក្នុងរយៈកំពស់ជាង ១៥០០ម៉ែត្រ។ មកដល់ពេលនេះ តាមរយៈ ឧទ្ធម្ភាគចក្រប៉ុន្មានគ្រឿង ដែលអាចហោះចូលទៅកាន់កន្លែងកើតហេតុ គេបានឃើញត្រឹមបំណែករបស់យន្តហោះតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ