តើអាចមានឬទេ បទឈាប់បាញ់រវាងទ័ពរដ្ឋាភិបាលអ៊ុយក្រែន និងពួកឧទ្ទាមទាមទារផ្តាច់ទឹកដី?
នៅថ្ងៃសៅរិ៍ ទី៣១ មករានេះ កិច្ចចរចាដើម្បីស្វែងរកបទឈប់បាញ់ជាស្ថាពររវាងទ័ពរដ្ឋាភិបាលអ៊ុយក្រែន និងពួកឧទ្ទាមទាមទារផ្តាច់ទឹកដីកំពុងបន្តធ្វើនៅក្នុងទីក្រុងមីនស្កិ៍ ប្រទេសបេឡារុស។ ភាគីចូលរួមនៅក្នុងកិច្ចចរចានោះមាន អ៊ុយក្រែន រុស្ស៊ី ពួកឧទ្ទាម និងអង្គការដើម្បីសន្តិសុខ និងកិច្ចសហប្រតិបត្តិការក្នុងសហភាពអឺរ៉ុបហៅកាត់ថា OSCE។ ទីក្រុងគៀវ និង OSCE សង្ឃឹមនឹងមានការចុះហត្ថលេខាលើបទឈប់បាញ់ដោយបង្ខំមួយរវាងភាគីជម្លោះ។ តែពួកឧទ្ទាមបានព្រមានជាមុនថា ក្នុងករណីបរាជ័យនៅក្នុងកិច្ចចរចាថ្ងៃនេះ ពួកគេនឹងបង្កើនពង្រីកការវាយប្រហាររបស់ខ្លួនឲ្យខ្លំាងបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៦
គឺអង្គការ OSCE ដែលជាអ្នកមានសុទិដ្ឋិនិយមច្រើនជាងគេដោយបានថ្លែងថា ឯកសារមួយដែលមានលក្ខណៈបង្ខិតបង្ខំស្តីពីបទឈប់បាញ់ភ្លាមៗ និងការដកអាវុធធន់ធ្ងន់ចេញពីខ្សែបន្ទាត់ជម្លោះអាចនឹងត្រូវចុះហត្ថលេខានៅថ្ងៃសៅរិ៍នេះក្នុងទីក្រុងមីនស្កិ៍ ប្រទេសបេឡារុស។ គឺនៅទីកន្លែងដដែលនេះហើយដែលកាលពីខែកញ្ញា ឆ្នំា ២០១៤ កន្លងទៅ ភាគីជម្លោះអ៊ុយក្រែន និងពួកឧទ្ទាមបានចុះហត្ថលេខាលើកិច្ចព្រមព្រៀងជាមូលដ្ឋានមួយដើម្បីសន្តិភាពនៅប៉ែកខាងកើតអ៊ុយក្រែន។ តែបញ្ហានៅត្រង់ថា កិច្ចព្រមព្រៀងជាមូលដ្ឋានកាលណោះត្រូវបានភាគីហត្ថលេខីរំលោភបំពានដូចគ្នា។ ឥឡូវនេះ គ្រប់ភាគីពាក់ព័ន្ធដដែលកំពុងសង្ឃឹមថា នឹងអាចមានកិច្ចព្រមព្រៀងលើបទឈប់បាញ់ថ្មីមួយទៀត។
ខាងភាគីអ៊ុយក្រែនដឹកនំាដោយលោកអតីតប្រធានាធិបតីឡេអូនីដ គូតឆ្មា រីឯនៅខាងក្រុមឧទ្ទាមវិញចូលរួមដោយអ្នកតំណាងពីរនាក់មកពីខេត្តដូណេត និងខេត្តលូហ្គង់។ គឺខេត្តទំាងពីរនេះហើយដែលពួកឧទ្ទាមកំពុងប្រយុទ្ធទាមទារយកពីរដ្ឋអំណាចអ៊ុយក្រែន និងដែលដែនដីមួយភាគធំរបស់ខេត្តទំាងពីរកំពុងស្ថិតក្រោមការគ្រប់គ្រងរបស់រដ្ឋាភិបាលទីក្រុងគៀវ។ គួរជម្រាបជូនថា តាមគម្រោង កិច្ចចរចារត្រូវផ្តើមធ្វើនៅថ្ងៃសុក្រ ទី៣០ មករាម្សិលមិញ តែត្រូវបានអ្នកតំណាងឧទ្ទាមលប់ចោល ព្រមទំាងបានគំរាមបន្តការតស៊ូប្រយុទ្ធរហូតរំដោះបានខេត្តដូណេត និងខេត្តលូហ្គង់។ សង្រ្គាមពាក្យសម្តីដែលបានធ្វើឡើង ចំពេលដែលស្ថានការណ៍នៅសមរភូមិកាន់តែដុនដាប ដោយមានមនុស្សស្លាប់យ៉ាងតិច ២៤នាក់ក្នុងថ្ងៃសុក្រដដែលនោះ។
យ៉ាងណាក៏ដោយ កិច្ចចរចាស្វែងរកបទឈប់បាញ់ជាថ្មីថ្ងៃនេះបានធ្វើឡើង ទន្ទឹមគ្នានឹងកិច្ចខិតខំប្រឹងប្រែងផ្លូវទូតរបស់ក្រុមប្រទេសលោកខាងលិច។ លោកប្រមុខការទូតអាមេរិកចន ឃែរីនឹងទៅកាន់ប្រទេសអ៊ុយក្រែននៅថ្ងៃទី៥ កុម្ភៈខាងមុខ មុននឹងបន្តដំណើរទៅចូលរួមនៅក្នុងសន្និសីតស្តីពីសន្តិសុខរៀបចំក្នុងទីក្រុងមុយនិច ប្រទេសអាល្លឺម៉ង់ និងដែលនៅទីនោះ លោកឃែរីគ្រោងជួបជាមួយលោកប្រមុខការទូតរុស្ស៊ី Sergueï Lavrov។ មួយវិញទៀតក្នុងសប្តាហ៍នេះ សហភាពអឺរ៉ុបក៏បន្តដំឡើងធ្មុងដាក់រុស្ស៊ីដែលបានលូកដៃក្នុងរឿងអ៊ុយក្រែនដោយបានពន្យារទ័ណ្ឌកម្មប្រឆំាងរុស្ស៊ីចំនួន ៦ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ