លោកប្រធានាធិបតីបារំាងហ្រ្វង់ស័រ ហូឡង់បំពេញទស្សនកិច្ចផ្លូវរដ្ឋចំនួនពីរថ្ងៃក្នុងប្រទេសស្វ៊ីស
ថ្ងៃព្រហស្បតិ៍ ទី១៦ មេសានេះជាថ្ងៃទី២ និងជាថ្ងៃចុងក្រោយនៃដំណើរទស្សនកិច្ចផ្លូវរដ្ឋរបស់លោកប្រធានាធិបតីបារំាងហ្រ្វង់ស័រ ហូឡង់ក្នុងប្រទេសស្វ៊ីស។ បើគិតតំាងពី ១៧ឆ្នំាកន្លងទៅ នេះជាលើកទី១ ដែលមានប្រមុខរដ្ឋបារំាងម្នាក់បានដាក់ជើងជាន់ទឹកដីស្វ៊ីសដែលជាប្រទេសជិតខាង និងជាប្រទេសនិយាយភាសាបារំាង។ គោលដៅនៃទស្សនកិច្ចរបស់លោកហូឡង់ គឺបិទបញ្ចប់ទំព័រតានតឹងលើសំណុំរឿងមួយចំនួនរវាងទីក្រុងប៉ារីស និងទីក្រុងប៊ែន ពិសេសទាក់ទងនឹងសំណុំរឿងគេចពន្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រៅពីជាប្រទេសជិតខាងបារំាង និងនិយាយភាសាបារំាង ស្វ៊ីសក៏ជាប្រទេសមួយដែលមានពលរដ្ឋបារំាងរស់នៅច្រើនជាងគេ ពោលមានប្រមាណជា ២០០ ០០០នាក់នាពេលបច្ចុប្បន្ន។ ក្រៅពីនោះ ក៏មានពលរដ្ឋបារំាងប្រមាណជា ១៥០ ០០០នាក់បានឆ្លងដែនទៅធ្វើការក្នុងប្រទេសស្វ៊ីសជារៀងរាល់ថ្ងៃ។ ចំណែកប្រទេសបារំាង គឺជាទឹកដីអាទិភាពទី១ សម្រាប់ក្រុមអ្នកវិនិយោគរបស់ជនជាតិស្វ៊ីស។ ជាលក្ខណៈទូទៅ ទំនាក់ទំនងរវាងទីក្រុងប៉ារីស និងទីក្រុងប៊ែនមិនសូវជាល្អូកល្អឺនប៉ុន្មានទេ។ ពិតមែនតែបារំាង និងស្វ៊ីសរួមសហការណ៍គ្នាបានល្អក្នុងវិស័យវិទ្យាសាស្រ្ត និងវប្បធម៌ តែបើនិយាយពីកិច្ចសហប្រតិបត្តិការនយោបាយវិញ គឺល្អក់ កករមែនទែន។
សំណុំរឿងដែលបានបំពុលទំនាក់ទំនងបារំាង និងស្វ៊ីសខ្លំាងជាងគេនារយៈពេលប៉ុន្មានឆ្នំាចុងក្រោយនេះ គឺរឿងគេចពន្ធ ពោលគឺការដែលស្វ៊ីសបានអនុវត្តនយោបាយគ្មានតម្លាភាពនៅក្នុងវិស័យធនាគារ។ ចូរកុំភ្លេចថា ស្វ៊ីសត្រូវបានគេចាត់ទុកជាប្រទេសឋានសួគ៌សម្រាប់អ្នកដែលយកលុយទៅទុកដើម្បីគេចពន្ធ ហើយរដ្ឋអំណាចស្វ៊ីសក៏មិនដែលបានដេញដោលសួរនំាពីប្រភពលុយដែលជនបរទេសយកទៅតម្កល់ទុកទេ។ តែតំាងពី ២ឆ្នំាកន្លងទៅនេះ ពោលតំាងពីរដ្ឋអំណាចស្វ៊ីសបានប្រឹងប្រែងធ្វើឲ្យមានតម្លាភាពនៅក្នុងរឿងគេចពន្ធនេះមក ទំនាក់ទំនងរវាងបារីស និងប៊ែនហាក់ដូចជាមានការរីកចម្រើនគួរឲ្យកត់សម្គាល់។
តាមសំណើរបស់ក្រសួងសេដ្ឋកិច្ចបារំាង រដ្ឋអំណាចស្វ៊ីសបានយល់ព្រមផ្តល់ព័ត៌មានជាស្វ័យប្រវត្តិឲ្យរដ្ឋអំណាចបារំាងចាប់ពីឆ្នំា ២០១៨ ទៅទាក់ទងនឹងពលរដ្ឋបារំាងណាដែលមានគណនីយនៅធនាគារស្វ៊ីស និងដែលបារំាងសង្ស័យពីរឿងគេចពន្ធ។ លោកប្រមុខការទូតស្វ៊ីសបានគូសបញ្ជាក់នៅថ្ងៃអង្គារ ទី១៤ មេសាថា បញ្ហារវាងអ្នកជិតខាងជារឿងធម្មតា និងជាជំងឺដែលគេអាចព្យាបាលបាន តែគេត្រូវហ៊ាននិយាយជាចំហ និងត្រង់ទៅ ត្រង់មក។
គួររម្លឹកជូនថា ប្រទេសជិតខាងបារំាង និងស្វ៊ីសមានព្រំដែនរួមគ្នាប្រវែង ៥៧០គីឡូម៉ែត្រ តែគេកម្រឃើញប្រមុខរដ្ឋបារំាងទៅទស្សនកិច្ចនៅស្វ៊ីសណាស់។ ទស្សនកិច្ចថ្មីជាងគេចុងក្រោយ គឺទស្សនកិច្ចរបស់លោកប្រធានាធិបតី Jacques Chirac ក្នុងឆ្នំា ១៩៩៨ លោកប្រធានាធិបតី François Mitterrand ក្នុងឆ្នំា ១៩៨៣ និងទស្សនកិច្ចរបស់លោកប្រធានាធិបតី Armand Fallières ក្នុងឆ្នំា ១៩១០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ