រុស្ស៊ី និងអ៊ុយក្រែនបានផ្តាច់ទំនាក់ទំនងផ្លូវអាកាសទៅវិញ ទៅមក
តាំងពីកណ្តាលអធ្រាត្រយប់មិញមក លែងមានទំនាក់ទំនងផ្លូវអាកាសរវាងអតីតសាធារណរដ្ឋសូវៀតពីរនៅជិតខាងគ្នា ពោលគឺអ៊ុយក្រែន និងរុស្ស៊ី ក្លាយជា រដ្ឋឯករាជ្យរៀងៗ ខ្លួន តាំងពី២៤ឆ្នាំមុនមក ប៉ុន្តែរស់នៅ ដោយអ្នកស្រុកជាពូជស្លាវសាច់ញាតិនឹងគ្នាច្រើនសន្ធឹកសន្ធាប់។ ម៉្លោះហើយបានជា ការផ្តាច់នេះ ដែលប្រព្រឹត្តទៅ តាមគំនិតផ្តួចផ្តើមរបស់ក្រុងគៀវ គឺ នាំឲ្យប៉ះពាល់ជាបឋម ដល់អ្នកដំណើរជាតិអ៊ុយក្រែនតែម្តង ដែល មានចំនួនដល់ទៅ៣ភាគ៤។
ចុះផ្សាយនៅថ្ងៃ៖
ការផ្តាច់ផ្លូវអាកាសនេះ ជាដំណាក់មួយថ្មី នៃវិបត្តិ រវាងក្រុងម៉ូស្គូ និង ក្រុងគៀវ។ ស្របនឹងតួលេខដែលមាន ក្នុង១ខែៗ មានអ្នកស្រុករុស្ស៊ីនិងអ៊ុយក្រែន រាប់ម៉ឺននាក់ បានធ្វើដំណើរ ទៅវិញទៅមក តាមយន្តហោះត្រង់ភ្លឹង រវាង ប្រទេសទាំងពីរជិតខាងគ្នា។ តួលេខលំអិត ចេញ ដោយ ស្ថាប័នអាកាសចរណ៍អ៊ុយក្រែន កាលពីថ្ងៃទី១តុលា សឲ្យឃើញថា ក្នុងឆមាសទី១ឆ្នាំ២០១៥នេះ ក្រុមហ៊ុនអាកាសចរណ៍រុស្ស៊ី បានដឹកអ្នកដំណើរប្រមាណ ៤សែន៦ម៉ឺន៩ពាន់នាក់ ទៅកាន់អ៊ុយក្រែន ចំណែកក្រុមហ៊ុនអាកាសចរណ៍អ៊ុយក្រែន បានដឹក អ្នកដំណើរ ជាង ១សែន៨ម៉ឺន៧ពាន់នាក់មកកាន់រុស្ស៊ី។
ដើមហេតុនៃរឿងរ៉ាវ គឺមកពីថ្ងៃ១៦កញ្ញា លោកនាយករដ្ឋមន្ត្រីអ៊ុយក្រែន យ៉ាត់សេញុកបាន ថ្លែងថា ចាប់ពីថ្ងៃ២៥តុលាទៅ យន្តហោះមានលាបពណ៌ទង់ជាតិត្រីពណ៌របស់រុស្ស៊ី ត្រូវហាម មិនឲ្យ ចុះចតនៅតាម អាកាសយានដ្ឋានប្រទេសអ៊ុយក្រែនទៀតឡើយ។ បំរាមនេះ ប៉ះលើ ក្រុមហ៊ុនអាកាសចរណ៍រុស្ស៊ី ចំនួន២៥ ដែលក្នុងនោះធំជាងគេ គឺ ក្រុមហ៊ុន Aeroflot Transaero ដែល មានជើងហោះហើរទៅកាន់ គ្រីមេ ជា ទឹកដីដែលអ៊ុយក្រែន នៅតែ បន្តចាត់ទុក ជា របស់ខ្លួន ដដែល។
លុះថ្ងៃ ២៨កញ្ញា រដ្ឋាភិបាលរុស្ស៊ី បានចេញសេចក្តីសម្រេចថា ចាប់ពីថ្ងៃ២៥តុលាទៅ ក៏ហាម មិនឲ្យយន្តហោះនៃក្រុមហ៊ុនអាកាសចរណ៍អ៊ុយក្រែនទាំងអស់ ក្នុងនោះមាន ជាបឋម គឺ Ukraine International Airlines ហោះមកកាន់រុស្ស៊ី ទៀតឡើយ ដោយគូសបញ្ជាក់ថា នេះជា វិធានការដែលក្រុងម៉ូស្គូ បង្ខំចិត្តចាត់ឡើងដើម្បីការពារផលប្រយោជន៍ជាតិខ្លួនប៉ុណ្ណោះ។ ថ្ងៃ២៥តុលា ថ្ងៃដែលបម្រាមទាំងសងខាង ចូលជាធរមាន លោកនាយករដ្ឋមន្ត្រីរុស្ស៊ី ឌ្មីទ្រី មេដវេដេវ សរសេរ លើទំព័រ Facebook របស់គាត់ថាគឺភាគីអ៊ុយក្រែន ដែលត្រូវទទួលខុស ត្រូវចំពោះ បម្រាមទៅវិញទៅមកនេះ។
បម្រាមចេញដោយរដ្ឋាភិបាលអ៊ុយក្រែន ដែលជាអ្នកផ្តាច់ទំនាក់ទំនងផ្លូវអាកាសនេះមុនគេ គឺជាឧទាហរណ៍ដ៏ត្រចះត្រចង់ នៃចម្បាំងរបស់ ថ្នាក់ដឹកនាំអ៊ុយក្រែន ទល់នឹងប្រជាជនឯង ដែលពីក្នុងចំណោមអ្នកធ្វើដំណើរ តាមជើង យន្តហោះ រវាងប្រទេសទាំងពីរ ដល់ទៅ ៣ភាគ៤ គឺជា ជាតិអ៊ុយក្រែនតែម្តង។ គាត់បញ្ចប់ សេចក្តីជាភាសាអ៊ុយក្រែន ដោយផ្គើនឲ្យថា នេះជាទង្វើខ្លាំងពូកែមែន។
ចាប់ពីអំណើះតទៅ សម្រាប់ពលរដ្ឋប្រទេសទាំងពីរ ដើម្បីធ្វើដំណើរទៅលេងសាច់ញាតិខ្លួន គឺ ត្រូវជិះរថភ្លើង ជិះរថយន្ត ឬ ត្រូវហោះឆ្លងកាត់ ក្រុងផ្សេង បែបយ៉ាងរដ្ឋធានី បេឡារុស ម៉ុលដូវ៉ា ឡេតូនី ប៉ូឡូញ តួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ