ក្រុងគៀវទិតៀនទស្សនកិច្ចលោកពូទីននៅគ្រីមេ
ទស្សនកិច្ចលោកប្រមុខរដ្ឋរុស្ស៊ី ពូទីន នៅគ្រីមេដែលបានចាប់ផ្តើមម្សិលមិញ ហើយបន្ត ទៅ នៅថ្ងៃ១៨សីហានេះ ត្រូវលោកប្រធានាធិបតីអ៊ុយក្រែន ប៉ូរ៉ូឆេនកូ ចោទថាជា ទង្វើ “បង្ករឿង” ដល់ លោកស៊ីវិល័យ និងត្រូវ ក្រសួងការបរទេសអ៊ុយក្រែន សន្និដ្ឋាន ជា “ការរាយ មាយ ដោយក្រុងម៉ូស្គូ ចំពោះប្រព័ន្ធច្បាប់អ៊ុយក្រែន និង គោលការណ៍នៃច្បាប់អន្តរជាតិ” ដ្បិត អ៊ុយក្រែននៅតែចាត់ទុកគ្រីមេ ជាដែនដីខ្លួនដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
គឺម្សិលមិញ ថ្ងៃ១៧សីហា ដែលលោកប្រធានាធិបតីពូទីន បាន លើក កិច្ចប្រជុំ នៃ ក្រុមប្រឹក្សារដ្ឋរុស្ស៊ីឧទ្ទិសដល់ ការអភិវឌ្ឍន៍វិស័យទេសចរណ៍រុស្ស៊ី ទៅធ្វើនៅឯក្រុង យ៉ាល់តាជាបុរីរមណីយដ្ឋាន នៅទៀបកោះគ្រីមេ ក្នុងឋានៈជានិមិត្តរូបមួយនៃវិស័យទេសចររុស្ស៊ី ទាំង រំពឹងទទួលអ្នកទេសចរ នៅទីនោះ ឲ្យបានយ៉ាងហោចណាស់ ៥លាននាក់ ក្នុងឆ្នាំ២០១៥នេះ។
ប៉ុន្តែ វត្តមានលោកពូទីននៅគ្រីមេ បានញ៉ាំងឲ្យមានប្រតិកម្មប្រឆាំងយ៉ាងខ្លាំងពី ខាងក្រុងគៀវ។ លោកប្រមុខរដ្ឋអ៊ុយក្រែនប៉ូរ៉ូឆេនកូ ថ្លែងថា ការធ្វើដំណើររបស់លោកពូទីន ទៅកាន់ទឹកដីគ្រីមេ របស់អ៊ុយក្រែន ដោយមិនសម្របយោបល់ជាមុន ជាមួយអាជ្ញាធរអ៊ុយក្រែន គឺជាការ”បង្ករឿង” ដល់លោកស៊ីវិល័យ ហើយជាការបន្ត សេណារីយ៉ូធ្វើយោធូបនីយកម្មទៀបកោះគ្រីមេ តទៅ ទៀត ដែលនាំទៅកាន់ការបង្ខាំងទឹកដីនេះ ឲ្យកាន់តែ ឯកោ លើឆាកអន្តរជាតិ។ តាមលោក ប៉ូរ៉ូឆេនកូ លុះណាតែស្ថិតក្នុងរដ្ឋអ៊ុយក្រែន ទើបគ្រីមេ មានអនាគតទៅកើត បូកទាំង អនាគតទេសចរណ៍ផង។
ចំណែកក្រសួងការបរទេសអ៊ុយក្រែន ក្នុងកំណត់ទូតតវ៉ា ផ្ញើមកក្រសួងការបរទេសរុស្ស៊ី រំលឹក ថា សាធារណរដ្ឋស្វយ័តគ្រីមេ និងក្រុងផែ សេបាស្តូប៉ូល សម្រាប់លោកស៊ីវិល័យ គឺបន្តស្ថិតនៅ ជា ភាគមួយមិនអាចផ្តាច់ចេញបាន ពីរដ្ឋអ៊ុយក្រែន។ ហើយការរាយមាយដោយចេតនា ពីខាង ថ្នាក់ដឹកនាំកំពូលៗ របស់រុស្ស៊ី ចំពោះគោលការណ៍ជាគ្រឹះគន្លឹះនៃច្បាប់អន្តរជាតិ និង ចំពោះប្រព័ន្ធច្បាប់ដែលកំពុងដំណើរការសព្វថ្ងៃនៅអ៊ុយក្រែន អាចញ៉ាំងឲ្យតែភាគីអ៊ុយក្រែន សំដែង នូវទឹកចិត្តក្តៅក្រហាយប៉ុណ្ណោះ។
កំណត់ទូតតវ៉ានោះ ទាមទារពីភាគីរុស្ស៊ី ឲ្យចាំបាច់ត្រូវតែបំពេញតាមសណ្តាប់ធ្នាប់ សម្រាប់ ការធ្វើដំណើរចូលទៅដែនដីអ៊ុយក្រែននេះ ទោះបីឥឡូវ វាស្ថិតនៅក្រោមការកាន់កាប់បណ្តោះអាសន្នក្តី។ ជាការរំលឹក គឺថ្ងៃ១៦មីនាឆ្នាំ២០១៤ ដែលដោយឆ្លើយតបនឹងសំណូមពរបណ្តាជនភាគច្រើន លើសលុបដល់ទៅជាង ៩៧%នៅគ្រីមេ ដែលរដ្ឋសភារុស្ស៊ី បានសម្រេចទទួលទឹកដីនេះ ឲ្យ ចូលមកក្នុងសហព័ន្ធរុស្ស៊ីវិញ។ ការវិលត្រឡប់នេះ ត្រូវក្រុងម៉ូស្គូចាត់ទុកជាការស្តារឡើងវិញ នូវយុត្តិធម៌ប្រវត្តិសាស្ត្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ