ព្រះរាជអាជ្ញាស៊ុយអែត ស្នើសុំធ្វើការសួរចំលើយ Julian Assange នៅទីក្រុងឡុងដ៍
លោក Julian Assange ដែលជាស្ថាបនិកម្នាក់របស់គេហទំព័រវីគីលីក ដែលបានទំលាយឯកសារសម្ងាត់របស់អាមេរិក ត្រូវបានតុលាការប្រទេសស៊ុយអែត ចោទប្រកាន់ពីបទរំលោភបំពានផ្លូវភេទ លើស្រ្តីជាតិស៊ុយអែត២នាក់។ ប៉ុន្តែ ដោយសារតែជនជាប់ចោទ ខ្លាចគេចាប់បញ្ជូន ទៅសហរដ្ឋអាមេរិក ទើបលោកមិនព្រមចូលខ្លួន ទៅបំភ្លឺក្នុងសាវនាកា របស់តុលាការស៊ុយអែត។ ទើបតែពេលនេះ ព្រះរាជអាជ្ញាស៊ុយអែត បានធ្វើការស្នើសុំ ឲ្យមានការសាកសួរចំលើយ នៅក្នុងស្ថានទូតប្រទេសអាក្វាទ័រ ក្នុងទីក្រុងឡុងដ៍ ទីដែលលោក Assange កំពុងសម្ងំលាក់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
លោកស្រីព្រះរាជអាជ្ញាស៊ុយអែត ឈ្មោះ Marianne Ny បានប្រាប់ឲ្យដឹងថា អយ្យការស៊ុយអែតទើបតែបានផ្ញើរលិខិតមួយ ទៅមេធាវីរបស់លោក Julian Assange ដើម្បីធ្វើការស្នើសុំឲ្យមានការសាកសួរចំលើយនៅទីក្រុងឡុដ៍ ព្រមទាំងមានការពិនិត្យ ADN លើរូបជនជាប់ចោទទៀតផង។ នេះជាការផ្លាស់ប្តូរគំនិតដ៏មិនគួរឲ្យជឿ របស់អយ្យការស៊ុយអែត ព្រោះថាកន្លងមក ព្រះរាជអាជ្ញាអមតុលាការស៊ុយអែត បានទាមទារ ឲ្យលោក Julian Assange ចូលខ្លួនទៅបំភ្លឺនៅមុខតុលាការស៊ុយអែត។
សូមបញ្ជាក់ថាលោក Julian Assange ជាជនជាតិអូស្ត្រាលី និងជាស្ថាបនិកម្នាក់ ដែលបានបង្កើតគេហទំព័រ វីគីលីក Wikileaks ដែលតាមរយៈគេហទំព័រនេះ គេបានផ្សាយឯកសារសម្ងាត់ការទូត និងយោធាអាមេរិក ជាច្រើនម៉ឺនរបាយការណ៍។ លោកតែងតែ មានការបារម្ភថា ថ្ងៃណាមួយ សហរដ្ឋអាមេរិក នឹងចេញដីកា តាមចាប់លោកជាមិនខាន។
ដោយឡែក តុលាការស៊ុយអែត បានធ្វើការចោទប្រកាន់លោក Julian Assange ពីបទរំលោភបំពានផ្លូវភេទ ដែលបានកើតឡើង កាលពីឆ្នាំ២០១០។ មានស្ត្រីជនជាតិស៊ុយអែតពីរនាក់ បានចោទប្រកាន់លោកថា ថាបានរំលោភបំពានផ្លូវភេទ។ ប៉ុន្តែជនជាប់ចោទ បានច្រានចោលការចោទប្រកាន់នេះ ហើយបានអះអាងថា ស្រី្តទាំងពីរ បានព្រមព្រៀងជាមួយលោក ត្រឹមត្រូវ គ្មានការចាប់បង្ខំទេ។ យ៉ាងណាក៏ដោយ តុលាការស៊ុយអែតបានទាមទារ ឲ្យលោកចូលទៅបំភ្លឺ នៅស៊ុយអែត ហើយដីកាចាប់ខ្លួនមួយ ក៏បានចេញផងដែរ។ លោក Julian Assange បានរត់គេច ចូលទៅពួន និងសុំសិទ្ធិជ្រកកោន ក្នុងស្ថានទូតប្រទេសអេក្វាទ័រ ប្រចាំនៅក្រុងឡុងដ៍ កាលពីខែ មិថុនា ឆ្នាំ២០១២។ នគរបាលអង់គ្លេស យាមចាំស្ទាក់ចាប់លោក នៅខាងមុខស្ថានទូត គ្រប់ពេលវេលា។ ការដែលលោកមិនព្រមចូលទៅបំភ្លឺ នៅស៊ុយអែត ដោយសារតែលោកខ្លាចធ្លាក់ចូលអន្ទាក់គេ ហើយត្រូវគេចាប់បញ្ជូនទៅអាមេរិក។
លោកស្រីព្រះរាជអាជ្ញាស៊ុយអែត បានមានប្រសាសន៍ថា លោកស្រីបានធ្វើការផ្លាស់ប្តូរចិត្ត សុខចិត្តធ្វើការសួរចំលើយ នៅក្នុងស្ថានទូតអេក្វាទ័រ ក្នុងទីក្រុងឡុងដ៍ ក៏ដោយសារតែ ការស៊ើបអង្កេត បានរាំងស្ទះ គ្មានច្រកចេញ ហើយជាពិសេស អង្គហេតុមួយភាគធំ នឹងត្រូវផុតអាជ្ញាយុកាល ក្នុងពេល៦ខែទៀតប៉ុណ្ណោះ។ ដូច្នេះ ខាងតុលាការត្រូវតែសម្រួល ក្នុងការពន្លឿនការស៊ើបអង្កេត ដើម្បីស្វែងរកយុត្តិធម៌ ឲ្យភាគីទាំងសងខាង។
មេធាវីរបស់លោក Julian Assange បានបញ្ជាក់ថា កូនក្តីលោក មានការសប្បាយរីករាយ នៅពេលបានដំណឹងថា អាយ្យការស៊ុយអែត សុខចិត្តមកសួរចំលើយនៅទីក្រុងឡុងដ៍ ព្រោះថាវាជាវិធីដ៏ល្អ ដើម្បីបញ្ចប់សំណុំរឿង។ កូនក្តីលោក នៅតែអះអាងថា ខ្លួនមិនមានទោសកំហុសអ្វីទាំងអស់ ហើយគាត់មិនខ្លាចនឹង ប្រឈមមុខ ជាមួយការសួរចំលើយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ