រដ្ឋាភិបាលអាមេរិកដាក់ពាក្យបណ្តឹង ប្តឹងអ្នកដែលលួចបញ្ចេញឯកសារសម្ងាត់
តុលាការអាមេរិកបានបើករួចហើយ ការស៊ើបអង្កេតឧក្រិដ្ឋប្រឆាំង យុវជនEdward Snowden។ យោងតាមប្រធានរបស់ប៉ូលិសសហព័ន្ធFBI រដ្ឋាភិបាលអាមេរិកនឹងធ្វើគ្រប់មធ្យោបាយដើម្បីកាត់ទោស Edward Snowden ដែលបានបើកបង្ហាញឲ្យគេឃើញពីកម្មវិធីស៊ើបការណ៍សម្ងាត់របស់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
នៅក្រោយការទម្លាយឯកសារសម្ងាត់ ស្ថាប័នជាន់ខ្ពស់អាមេរិកបានកោះហៅមន្រ្តីជាន់ខ្ពស់ខាងផ្នែកសន្តិសុខ និងស្ថាប័នស៊ើបការណ៍សម្ងាត់ ឲ្យចូលខ្លួនមកបកស្រាយ។ បន្ទាប់ពីប្រធានទីភ្នាក់ងារសន្តិសុខជាតិ NSA ត្រូវបកស្រាយ នៅមុខក្រុមសមាជិកព្រឹទ្ធសភា ឥលូវដល់វេនប្រធានប៉ូលិសសហ័ពន្ធFBI ដែលត្រូវពន្យល់ដល់គណៈកម្មាធិការយុត្តិធម៌របស់សភា។
មានយោបល់ដូចប្រធានទីភ្នាក់ងារNSA ប្រធានប៉ូលិសសហព័ន្ធលោក Robert Muellerបាននិយាយការពារកម្មវិធីលួចស្តាប់ទូរស័ព្ទ ដែលរហូតមកដល់ពេលនេះ បានជួយឲ្យគេបង្រ្កាបបានជាមុន គម្រោងធ្វើភេរវកម្ម ជាង ១០ នៅក្នុងប្រទេសអាមេរិក។ តាមប្រធានFBI កម្មវិធី របស់ទីភ្នាក់ងារNSA ធ្វើឡើងតាមច្បាប់ ដែលអនុញ្ញាតឲ្យគេកំណត់បានអត្តសញ្ញាណបុគ្គលដែលបានប្រើទូរស័ព្ទដើម្បីធ្វើសកម្មភាពភេរវកម្ម។
សកម្មភាពរបស់ Snowden បានបង្កឲ្យមានការខូចខាតយ៉ាងធ្ងន់ធ្ងរដល់ជាតិ និងសុវត្ថិភាពរបស់អាមេរិក។ សម្រាប់ប្រធានFBI គេនឹងចាត់រាល់វិធានការដើម្បីចាប់យក Snowdenឲ្យមកទទួលខុសត្រូវលើការបែកធ្លាយព័ត៌មានសម្ងាត់របស់រដ្ឋាភិបាលអាមេរិក។
រហូតមកដល់ពេលនេះ វ៉ាស៊ីនតោនក៏មិនទាន់បានសុំជាផ្លូវការឲ្យទីក្រុងប៉េកាំងធ្វើបត្យាប័នយុវជនSnowden។ ចំណែកទីក្រុងប៉េកាំង នៅមិនទាន់បញ្ចេញប្រតិកម្មណាមួយទាក់ទងនឹងSnowden ប៉ុន្តែ គេមើលឃើញថា យុវជនSnowden មានប្រយោជន៍ច្រើនសម្រាប់ទីក្រុងប៉េកាំង ព្រោះថា ឯកសារដែលSnowden បានប្រគល់ទៅឲ្យកាសែតហុងកុង បានបង្ហាញយ៉ាងច្រើនពីការវាយប្រហារតាមអ៊ីនធ័រណេតរបស់អាមេរិក ទៅលើរដ្ឋាភិបាលចិន។ សំណុំរឿងSnowden នឹងអាចជាវិញ្ញាសាថ្មី ដើម្បីវាស់ស្ទង់ភាពទុកចិត្តគ្នារវាងមហាអំណាចចិន និងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ