ធនាគារកណ្តាលអឺរ៉ុបបន្ថយអត្រាការប្រាក់មកនៅត្រឹម ០,២៥%
នៅរសៀលថ្ងៃព្រហស្បតិ៍នេះ ធនាគារកណ្តាលអឺរ៉ុបបានប្រកាសកាត់បន្ថយអត្រាការប្រាក់របស់ខ្លួន ពី ០,៥% ឲ្យមកនៅត្រឹម ០,២៥% ដែលជាកម្រិតទាបបំផុតមិនធ្លាប់មាន។ ការកាត់បន្ថយអត្រាការប្រាក់នេះបានធ្វើឲ្យគ្រប់គ្នាមានការភ្ញាក់ផ្អើល ដោយសារតែតាំងពីដើមមក ធនាគារកណ្តាលអឺរ៉ុបច្រើនតែមិនចង់កាត់បន្ថយអត្រាការប្រាក់ ដោយសារតែខ្លាចមានបញ្ហាអតិផរណា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ការកាត់បន្ថយអត្រាការប្រាក់របស់ធនាគារកណ្តាល គឺជានយោបាយរូបិយវត្ថុដ៏សំខាន់មួយ ដែលគេអាចប្រើ ដើម្បីជំរុញកំណើនសេដ្ឋកិច្ច ក្នុងពេលមានវិបត្តិ ពីព្រោះថា នៅពេលដែលអត្រាការប្រាក់នៃធនាគារកណ្តាលធ្លាក់ចុះ វាអាចធ្វើឲ្យអត្រាការប្រាក់កម្ចីឯកជនធ្លាក់ចុះ នាំឲ្យចលនាសាច់ប្រាក់ក្នុងទីផ្សារមានការកើនឡើង ដែលជាកត្តាសំខាន់មួយ ក្នុងការជំរុញសកម្មភាពសេដ្ឋកិច្ច។ ក៏ប៉ុន្តែ ក្នុងពេលជាមួយគ្នា វាក៏អាចធ្វើឲ្យអត្រាអតិផរណាមានការកើនឡើងផងដែរ។
ហេតុដូច្នេះហើយបានជា កន្លងមក គេសង្កេតឃើញថា ជាទូទៅ ធនាគារកណ្តាលអឺរ៉ុបតែងតែបដិសេធមិនបញ្ចុះអត្រាការប្រាក់របស់ខ្លួន ដោយលើកហេតុផលថា ការបញ្ចុះ អត្រាការប្រាក់អាចនឹងបង្កើតបញ្ហាអតិផរណា ហើយ យោងតាមសន្ធិសញ្ញាអឺរ៉ុប បេសកកម្មជាអាទិភាពរបស់ធនាគារកណ្តាលអឺរ៉ុប គឺការទប់ស្កាត់អតិផរណា។
ក៏ប៉ុន្តែ នៅរសៀលថ្ងៃព្រហស្បតិ៍នេះ ធនាគារកណ្តាលអឺរ៉ុបបានធ្វើឲ្យគ្រប់គ្នាមានការភ្ញាក់ផ្អើលដោយបានបញ្ចុះអត្រាការប្រាក់របស់ខ្លួន ឲ្យមកនៅត្រឹមតែ ០,២៥% ក្នុងមួយឆ្នាំ ដែលជាអត្រាទាបបំផុតមិនធ្លាប់មាន ចាប់តាំងពីអឺរ៉ុបចាយលុយរួមគ្នា និងបង្កើតធនាគារកណ្តាលរួមគ្នា កាលពីឆ្នាំ១៩៩៩មក។
នៅក្នុងសន្និសីទកាសែតក្រោយពីកិច្ចប្រជុំក្រុមប្រឹក្សាភិបាលធនាគារ លោកម៉ារីយ៉ូ ដ្រាហ្គី អគ្គទេសាភិបាលធនាគារកណ្តាលអឺរ៉ុបបានថ្លែងថា នៅក្នុងពេលបច្ចុប្បន្ននេះ អត្រាអតិផរណាក្នុងតំបន់អឺរ៉ុបមានកម្រិតទាប ហើយថា អឺរ៉ុបនឹងបន្តមានអត្រាអតិផរណាទាបបែបនេះនៅក្នុងរយៈពេលវែងតទៅមុខទៀត ហើយក្នុងពេលជាមួយគ្នា អត្រាកំណើនសេដ្ឋកិច្ចមានកម្រិតទាបជាងការរំពឹងទុក។
គួរបញ្ជាក់ថា ធនាគារកណ្តាលអឺរ៉ុបបានកំណត់គោលដៅចង់រក្សាអត្រាអតិផរណាប្រចាំឆ្នាំឲ្យនៅប្រហាក់ប្រហែល ២% ដែលគេយល់ថាជាកម្រិតល្អមួយ ក្នុងការជំរុញកំណើនសេដ្ឋកិច្ច។ ក៏ប៉ុន្តែ កាលពីខែតុលាកន្លងទៅនេះ អត្រាអតិផរណានៅក្នុងតំបន់ចាយលុយអឺរ៉ូបានធ្លាក់ចុះមកនៅត្រឹម ០,៧% ដែលជាអត្រាទាបបំផុតមិនធ្លាប់មាន ចាប់តាំងពីឆ្នាំ២០១០មក។
ក្រោយពីបានកាត់បន្ថយអត្រាការប្រាក់មកនៅត្រឹម ០,២៥% កាលពីថ្ងៃព្រហស្បតិ៍នេះ លោកម៉ារីយ៉ូ ដ្រាហ្គី ក៏បានបញ្ជាក់បន្ថែមផងដែរថា ធនាគារកណ្តាលអឺរ៉ុបនឹងបន្តដាក់ចេញនូវនយោបាយរូបិយវត្ថុដែលចាំបាច់ក្នុងការជំរុញកំណើនសេដ្ឋកិច្ចនៅអឺរ៉ុប។
នៅក្រោយការប្រកាសកាត់បន្ថយអត្រាការប្រាក់នេះ គេឃើញថា តម្លៃមូលបត្រនៅតាមទីផ្សារក្នុងតំបន់អឺរ៉ុបបានកើនឡើងស្ទើរតែគ្រប់កន្លែង។ ចំណែកឯលុយអឺរ៉ូវិញបានធ្លាក់ថ្លៃ ប្រមានជា ២សេន ធៀបនឹងលុយដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ