សន្និសីទបរិស្ថានបារាំង ប្រព្រឹត្តទៅក្នុងបរិយាកាសអាប់អួរ
សន្និសិទបរិស្ថាន បានចាប់បើកទ្វារនៅថ្ងៃព្រហស្បតិ៍នេះ សម្រាប់រយៈពេលពីរថ្ងៃ នៅទីក្រុងប៉ារីស។ សន្និសីទបរិស្ថាននេះ ជាចំណែកមួយនៃកម្មវិធីនយោបាយរបស់ប្រធានាធិបតីបារាំង លោក ហ្រ្វង់ស័រ ហូឡង់ ដែលបានសន្យាតាំងពីសម័យឃោសនាបោះឆ្នោត។ ជាជំនួប ប្រចាំឆ្នាំ លើកទីបី ប៉ុន្តែមានតម្លៃខ្លាំង ព្រោះនៅសល់តែមួយឆ្នាំគត់ទៀតប៉ុណ្ណោះ បារាំងនឹងត្រូវធ្វើជាម្ចាស់ផ្ទះទទួលរៀបចំសន្និសីទអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ក្នុងរយៈពេលពីថ្ងៃនេះ ជំនួបប្រចាំឆ្នាំ ស្តីពីបរិស្ថាន មានកម្មវត្ថុប្រកបដោយមហិច្ឆតា ចង់ធ្វើឱ្យ បារាំងក្លាយជាប្រទេសដែលមានបរិស្ថានប្រសើរបំផុត។ ប៉ុន្តែនៅឆ្នាំ២០១៤នេះ ការជួបជុំក្រុមអ្នកបរិស្ថាន បានក្លាយទៅជាសមរភូមិ រិះគន់ ងងក់ដាក់គ្នា ពីសំណាក់ភាគី ពាក់ព័ន្ធ ដែលទាមទារលទ្ធផលជាក់ស្តែង មិនមែនត្រឹមតែជាពាក្យថ្លែងក្នុងសុន្ទរកថា ពិរោះត្រចៀកប៉ុណ្ណោះទេ។
នាឱកាសនេះ ប្រធានបទបីនឹងត្រូវលើកមកជជែកពិភាក្សា ៖ អាកាសធាតុនិងជីវៈចម្រុះ - មធ្យោបាយធ្វើដំណើរ ចំណែកប្រធានបទដែលសំខាន់ និងបន្ទាន់ជាងគេ សម្រាប់ចក្ខុរបស់រដ្ឋមន្ត្រីក្រសួងបរិស្ថានបារាំង គឺសុខភាព។ រដ្ឋមន្ត្រី សមាជិកសភា អង្គការក្រៅរដ្ឋាភិបាល ក្រុមហ៊ុនឯកជន សហជីព ត្រូវសម្រេចឱ្យបាននូវផែនទីចង្អុលផ្លូវ សម្រាប់ទុកឱ្យរដ្ឋាភិបាលត្រួសត្រាយក្នុងពេលមួយឆ្នាំខាងមុខ។
សន្និសីទស្តីពីបរិស្ថាននេះ ត្រូវបើកជាបន្តបន្ទាប់គ្នា។ ក្រោយប៉ារីស នៅដើមខែធ្នូខាងមុខនឹងមានសន្និសីទស្តីពីអាកាសធាតុនៅទីក្រុងលីម៉ា។ មួយឆ្នាំទៀត ពោលគឺនៅចុងឆ្នាំ ២០១៥ ក្រុងប៉ារីសត្រូវទទួលរៀបចំសន្និសីទអង្គការសហប្រជាជាតិស្តីពីអាកាសធាតុ ដែលជាឱកាសចុងក្រោយក្នុងការស្វែងរកឱ្យឃើញកិច្ចព្រមព្រៀងច្បាស់លាស់ មកបន្តពិធីសារក្យូតូ ក្នុងការប្រយុទ្ធប្រឆាំងនឹងការកើនកម្តៅនៃភពផែនដី ដោយកំរិតការបញ្ចេញផ្សែងពុល-ឧស្ម័នផ្ទះកញ្ចក់។
ដូច្នេះសន្និសីទថ្ងៃនេះ មានតម្លៃជានិមិត្តរូបខ្លាំងណាស់ ! បារាំងចង់បង្ហាញអំពីសមត្ថភាព ជាគំរូក្នុងវិស័យការពារបរិស្ថាន ទប់ស្កាត់ការប្រែប្រួលអាកាសធាតុ។ ត្រង់ចំណុចនេះ បារាំងអាចទុកចិត្តបាន ប៉ុន្តែនៅមានសំណុំរឿងជាច្រើនដែលបានចូលបំពុលបរិយាកាសសន្និសីទ មានជាអាទិ៍រឿងអាស្រូវអ្នកបរិស្ថានស្លាប់ពេលធ្វើបាតុកម្មប្រឆាំងនឹងការសាងសង់ទំនប់ទឹកនៅភាគខាងត្បូងប្រទេសបារាំង សំណុំរឿងអេកូតាក់ យកពន្ធលើរថយន្តដឹកជញ្ជូនធុនធ្ងន់ ជាប់គាំង ការបិទមជ្ឈមណ្ឌលនុយក្លេអ៊ែរដ៏ចំណាស់មួយរបស់បារាំងមិនត្រូវបានបញ្ជាក់ ... អង្គការក្រៅរដ្ឋាភិបាលខ្លះ បានសម្រេចធ្វើពហិការមិនចូលពិភាក្សាក្នុងសន្និសីទជុំវិញប្រធានបទបរិស្ថាននិងមធ្យោបាយធ្វើដំណើរ។ ភាគីចូលរួមហាក់ដូចជាបង្ហាញភាពសង្ស័យច្រើនលើកម្មវត្ថុរបស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ