ហ៊្វុនស៊ិនប៉ិច-ជាតិនិយមប្រកាសរចនាសម្ព័ន្ធក្រុមការងារចម្រុះថ្នាក់ខេត្តលើកដំបូងនៅព្រៃវែង
នៅថ្ងៃអាទិត្យនេះ សម្ព័ន្ធភាពហ៊្វុនស៊ិនប៉ិច-ជាតិនិយមប្រកាសរចនាសម្ព័ន្ធក្រុមការងារ ចម្រុះថ្នាក់ខេត្តលើកដំបូងនៅក្នុងខេត្តព្រៃវែងដោយមានការចូលរួមពីសមាជិកថ្នាក់ក្រោមប្រមាណជា៤០០នាក់។ លោក ញឹក ប៊ុនឆៃ សហប្រធានស្តីទីសម្ព័ន្ធភាពហ៊្វុនស៊ិនប៉ិច-ជាតិនិយម បានបញ្ជាក់ប្រាប់ថា កៅអីគណបក្សហ៊្វុនស៊ិនប៉ិចនឹងកើនឡើងវិញសម្រាប់ការបោះឆ្នោតនាពេលខាងមុខ បន្ទាប់ពីការរំលាយបញ្ចូលគ្នា។
ចុះផ្សាយនៅថ្ងៃ៖
សេចក្តីរាយការណ៍របស់ គី សុខលីម ពីភ្នំពេញ
បន្ទាប់ពីប្រកាសបង្កើតសម្ព័ន្ធភាពជាផ្លូវការអស់រយៈពេលជាងមួយខែរួចមក សម្ព័ន្ធភាពហ៊្វុនស៊ិនប៉ិច-ជាតិនិយម បានប្រកាសបង្កើតរចនាសម្ព័ន្ធក្រុមការងារចម្រុះថ្នាក់ខេត្តជាលើកដំបូង នៅថ្ងៃអាទិត្យ ទី១៨ ខែកក្កដានេះ នៅក្នុងខេត្តព្រៃវែង។ លោក ឈឹម សៀកឡេង និងលោក ញឹក ប៊ុនឆៃ សហប្រធានស្តីទីនៃសម្ព័ន្ធភាពហ៊្វុនស៊ិនប៉ិច-ជាតិនិយម មានវត្តមាននៅក្នុងពិធីប្រកាសបង្កើតរចនាសម្ព័ន្ធក្រុមការងារចម្រុះថ្នាក់ខេត្ត។
ថ្លែងប្រាប់តាមទូរស័ព្ទពីខេត្តព្រៃវែង លោក ប៉ែន សង្ហា អ្នកនាំពាក្យគណបក្សជាតិនិយម ដែលជាអតីតគណបក្សនរោត្តម រណឫទ្ធិ បានបញ្ជាក់ប្រាប់ថា នៅថ្ងៃនេះ គណបក្សសម្ព័ន្ធភាពបានប្រកាសជាផ្លូវវការ នូវរចនាសម្ព័ន្ធក្រុមការងារចម្រុះ និងគណៈកម្មាធិការប្រតិបត្តិចម្រុះនៃសម្ព័ន្ធភាព។ សមាជិកថ្នាក់ក្រោមរបស់គណបក្សទាំងពីរ ប្រមាណជា៤០០នាក់ បានចូលរួមស្តាប់ការប្រកាសបង្កើតរចនាសម្ព័ន្ធការងារចម្រុះថ្នាក់ខេត្តនេះ។ លោក ប៉ែន សង្ហា បានបញ្ជាក់ប្រាប់ទៀតថា ការប្រកាសរចនាសម្ព័ន្ធចម្រុះការងារតាមខេត្តដទៃទៀត នឹងធ្វើឡើងជាបន្តបន្ទាប់ រហូតដល់គ្រប់២៤ខេត្ត-ក្រុងនៃប្រទេសកម្ពុជា។
លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានថ្លែងប្រាប់ពីខេត្តព្រៃវែងមកថា សមាជិកថ្នាក់ក្រោមនៃគណបក្សទាំងពីរបានសម្ដែងសេចក្តីសប្បាយរីករាយ ដោយឃើញមេដឹកនាំគណបក្សទាំងពីររួបរួមគ្នាឡើងវិញ បន្ទាប់ពីការបាក់បែកដែលឈានទៅដល់ការបរាជ័យនោះ។ លោក ញឹក ប៊ុនឆៃ បានបន្តទៀតថា គណបក្សទាំងពីរសម្រេចគ្រវាត់ចោល ឬកប់ចោលរឿងអតីតកាលជូរចត់ ហើយបញ្ហាដែលត្រូវគិតនៅពេលនេះ គឺការចាប់ផ្ដើមការងារជាមួយគ្នាជាថ្មីឡើងវិញ
គណបក្សហ៊្វុនស៊ិនប៉ិចធ្លាប់ជាគណបក្សឈ្នះឆ្នោត កាលពីការបោះឆ្នោតឆ្នាំ១៩៩៣ ប៉ុន្តែ១៥ឆ្នាំក្រោយមក គណបក្សនេះបានក្លាយទៅជាគណបក្សចាញ់ឆ្នោតនៅចុងប៉ូចគេទៅវិញ កាលពីការបោះឆ្នោតជាតិឆ្នាំ២០០៨កន្លងមក។ ការចាញ់ឆ្នោតនេះ ត្រូវបានមន្ត្រីជាន់ខ្ពស់គណបក្សស្តីបន្ទោសទៅលើជម្លោះផ្ទៃក្នុងគណបក្សនាពេលកន្លងមក។ ជម្លោះនេះបានបង្កអោយគណបក្សហ៊្វុនស៊ិនប៉ិចបែកខ្ញែកគ្នាទាំងសម្លេងឆ្នោត ទាំងធនធានមនុស្សរបស់គណបក្ស។
លោក ញឹក ប៊ុនឆៃ បានទទួលស្គាល់ថា ប្រសិនបើគណបក្សទាំងពីរមិនបានបែកចេញជាពីរនៅក្នុងការបោះឆ្នោតឆ្នាំ២០០៨ទេនោះ គណបក្សហ៊្វុនស៊ិនប៉ិចអាចទទួលបានកៅអីនៅរដ្ឋសភាជាតិរហូតដល់ទៅ១៧កៅអីឯណោះ ប៉ុន្តែ ដោយសារការបែកបាក់ គណបក្សហ៊្វុនស៊ិនប៉ិច និងគណបក្សនរោត្តម រណឫទ្ធិ ទទួលបានម្នាក់ៗតែពីរកៅអីប៉ុណ្ណោះ។
ប៉ុន្តែ បើទោះបីជាយ៉ាងនេះក្តី លោក ញឹក ប៊ុនឆៃ បានបញ្ជាក់នៅថ្ងៃអាទិត្យនេះថា កៅអីគណបក្សហ៊្វុនស៊ិនប៉ិចនឹងកើនឡើងវិញសម្រាប់ការបោះឆ្នោតនាពេលខាងមុខ បន្ទាប់ពីការរំលាយបញ្ចូលគ្នា។ ការច្របាច់បញ្ចូលគ្នាអាចនឹងត្រូវធ្វើឡើង នៅមុនការបោះឆ្នោតឃុំសង្កាត់ឆ្នាំ២០១២ ឬការបោះឆ្នោតជាតិឆ្នាំ២០១៣ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ