ស្លាប់ម្នាក់ របួស៤នាក់ ក្នុងការបាញ់ប្រហារនៅរដ្ឋTexas អាមេរិក
ការបាញ់ប្រហារ២ផ្សេងគ្នាបានកើតឡើង នៅព្រឹកថ្ងៃអាទិត្យនេះ នៅកណ្តាលទីក្រុង Austin រដ្ឋTexas សហរដ្ឋអាមេរិក។ ការបាញ់ប្រហារទី១បានសម្លាប់មនុស្សយ៉ាងហោចម្នាក់ និងបង្ករបួស៤នាក់។ ប៉ូលិសមិនទាន់កំណត់បានអត្តសញ្ញាណជនល្មើសក្នុងហេតុការណ៍ទី១ដែលរត់គេចខ្លួននៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០៥
ហេតុការណ៍បាញ់ប្រហារទាំង២ នៅក្រុង Austin រដ្ឋTexas បានកើតឡើង ខុសគ្នាតែប៉ុន្មាននាទីប៉ុណ្ណោះ នៅព្រឹកព្រហាមថ្ងៃអាទិត្យនេះ។ ហេតុការណ៍ទី១កើតឡើងក្នុងសង្កាត់មួយ ដែលសំបូរដោយរង្គសាល និងកន្លែងស៊ីផឹក។
យោងតាមក្រុមប៉ូលិសដែលបានទៅដល់ទីនោះ ហេតុការណ៍នេះបានកើតឡើង ក្រោយមានជម្លោះមួយ។ ជនល្មើសជាយុវជនស្បែកស បែបអេស្ប៉ាញ អាយុជាង២០ឆ្នាំ បានបាញ់ទៅលើហ្វូងមនុស្សដែលកំពុងដើរនៅទីនោះ ធ្វើអោយស្ត្រីម្នាក់ស្លាប់នៅនឹងកន្លែង។ ស្ត្រី៣នាក់ទៀត ដែលរងរបួសត្រូវបានបញ្ជូនទៅមន្ទីរពេទ្យ។ បុរសម្នាក់ទៀតរងរបួសដែរ តែបានបដិសេធការព្យាបាល។
៧នាទីក្រោយហេតុការណ៍នេះ ការបាញ់ប្រហារមួយទៀត បានកើតឡើង ក្នុងតំបន់ដដែល។ បុរសម្នាក់បានទាញកាំភ្លើងមកបាញ់ តែត្រូវមនុស្សម្នានៅទីនោះ បង្ក្រាបបាន។ គ្មានជនរងគ្រោះក្នុងហេតុការណ៍ទី២នេះទេ គឺមានតែជនល្មើស ប៉ុណ្ណោះដែលរងរបួស។
ប៉ូលិសកំពុងចង់ដឹងថា តើជនល្មើសទាំង២នាក់ ក្នុងការបាញ់ប្រហារទាំង២នេះ ធ្លាប់ស្គាល់ជនរងគ្រោះពីមុនមកទេ។
តាំងពីថ្ងៃ៧កក្កដា ក្រោយយុវជនស្បែកខ្មៅម្នាក់បានបាញ់សម្លាប់ប៉ូលិស៥នាក់ នៅក្រុងដាឡាស រដ្ឋតិចសាសដដែល ប៉ូលិសតិចសាស និងប៉ូលិសទូទាំងសហរដ្ឋអាមេរិក បានត្រៀមការប្រុងប្រយ័ត្នខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ