កូតឌីវ័រ៖ កងកម្លាំងរបស់លោកបាក់បូវាយប្រហារលើការិយាល័យរបស់លោកវ៉ាត់តារ៉ា
កាលពីយប់ថ្ងៃសៅរ៍ ៩ មេសា ២០១១នេះ កងកម្លាំងរបស់លោកបាក់បូ បានធ្វើការវាយប្រហារទៅលើសណ្ឋាគារ Golf ដែលជាការិយាល័យបណ្តោះអាសន្នរបស់លោកវ៉ាត់តារ៉ា។ កងរក្សាសន្តិភាពអ.ស.ប. ដែលនៅការពារសណ្ឋាគារ ក៏បានធ្វើការវាយតបតវិញ។ ក្នុងពេលជាមួយគ្នានេះ លោកបាក់បូបានអំពាវនាវឲ្យប្រជាជនកូតឌីវ័រក្រោកឡើងតស៊ូប្រឆាំងនឹង កងទ័ពបារាំង។
ចុះផ្សាយនៅថ្ងៃ៖
បទវិភាគរបស់ សេង ឌីណា
លោកបាក់បូ ប្រធានាធិបតីផុតអាណត្តិ តែមិនព្រមចុះចេញពីអំណាច ត្រូវបានទាហានរបស់លោកវ៉ាត់តារ៉ាឡោមព័ទ្ធក្នុងផ្ទះ អស់រយៈពេលជាច្រើនថ្ងៃមកហើយ។ នៅថ្ងៃសៅរ៍ម្សិលមិញនេះ កងកម្លាំងស្ម័គ្រស្មោះនឹងលោកបាក់បូ បានពង្រីកទីតាំងដែលពួកគេកាន់កាប់ ហើយបានរុលទៅរហូតដល់សណ្ឋាគារ Golf ដែលលោកវ៉ាត់តារ៉ាយកធ្វើជាទីស្នាក់ការបណ្តោះអាសន្ន។
នៅម៉ោងប្រមាណ ៥ល្ងាច (ម៉ោងនៅក្នុងស្រុក) កងកម្លាំងរបស់លោកបាក់បូ បានចាប់ផ្តើមវាយប្រហារទៅលើការិយាល័យរបស់លោកវ៉ាត់តារ៉ា ដោយមានប្រើទាំងកាំភ្លើងធំ និងកាំភ្លើងដៃ។ នេះបើយោងតាមមន្រ្តីអ.ស.ប. និងសាក្សី ដែលនៅកន្លែងកើតហេតុ។ អ្នកនាំពាក្យកងកម្លាំងមួកខៀវបានឲ្យដឹងថា ទាហានមួកខៀវ ដែលមានបេសកកម្មការពារសណ្ឋាគារ Golf បានបាញ់តបទៅលើទាហានរបស់លោកបាក់បូវិញ។ ការវាយប្រយុទ្ធគ្នានេះបានអូសបន្លាយរយៈពេលជាង១ម៉ោង។ កងកម្លាំងរបស់លោកបាក់បូមិនបានចូលមកដល់បរិវេណសណ្ឋាគារ Golf នោះទេ។
នៅថ្ងៃអាទិត្យនេះ អ្នកនាំពាក្យរបស់លោកបាក់បូ បានបដិសេធយ៉ាងដាច់អហង្ការថា ទាហានរបស់លោកបាក់បូមិនបានវាយប្រហារទៅលើសណ្ឋាគារ Golf ដូចការចោទប្រកាន់របស់អ.ស.ប.នេះទេ។ នៅពេលនេះ ស្ថានីយ៍ទូរទស្សន៍របស់លោកបាក់បូ ដែលត្រូវបានបិទការផ្សាយមួយរយៈកន្លងមកហើយនោះ បានចាប់ផ្តើមបើកការផ្សាយវិញហើយ។ លោកបាក់បូបានអំពាវនាវឲ្យប្រជាជនកូតឌីវ័រងើបឡើងតស៊ូប្រឆាំងនឹង ទាហានបារាំង។
កាលពីយប់មិញនេះ រដ្ឋាភិបាលអង់គ្លេសបានសម្រេចជម្លៀសមន្រ្តីទូត និងបុគ្គលិកទាំងអស់ចេញពីស្ថានទូត ដែលស្ថិតនៅក្បែរផ្ទះរបស់លោកបាក់បូ។ ការសម្រេចនេះបានធ្វើឡើង ក្រោយពីអគារស្ថានទូតបានទទួលរងគ្រាប់កាំភ្លើង និងមានគ្រាប់ផ្លោងមួយគ្រាប់បានធ្លាក់ នៅក្នុងសួនច្បារស្ថានទូត។
ក្នុងពេលជាមួយគ្នានេះ ទាហានបារាំង និងទាហានមួកខៀវត្រូវបានដាក់ពង្រាយ នៅក្នុងកំពង់ផែអាប៊ីដហ្សង់ ដើម្បីធានាសុវត្ថិភាព ឲ្យកំពង់ផែអាចដំណើរការឡើងវិញបាន ក្រោយពីសហភាពអឺរ៉ុបបានប្រកាសលើកទណ្ឌកម្មចេញវិញ កាលពីថ្ងៃសុក្រ។ អស់រយៈពេលជាច្រើនសប្តាហ៍កន្លងមកហើយ គ្រាប់កាកាវ ដែលជាប្រភពចំណូលដ៏សំខាន់បំផុតរបស់កូតឌីវ័រ បាននៅជាប់គាំងក្នុងកំពង់ផែ មិនអាចនាំចេញទៅក្រៅប្រទេសបាន។ លោកវ៉ាត់តារ៉ាបានស្នើសុំឲ្យសហគមន៍អន្តរជាតិលុបទណ្ឌកម្មចេញវិញ ដើម្បីឲ្យកូតឌីវ័រអាចចាប់ផ្តើមស្តារសេដ្ឋកិច្ចឡើងវិញ។ ជើងហោះហើររបស់ក្រុមហ៊ុនអ៊ែរហ្វ្រង់ (Air France) ក៏បានចាប់ផ្តើមដំណើរការឡើងវិញដែរ ចាប់តាំងពីថ្ងៃសៅរ៍មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ