ក្រសួងអប់រំជំរុញការលាងសម្អាតដៃកុមារ នៅតាមសាលា
នៅព្រឹកថ្ងៃពុធ ទី២៧វិច្ឆិកានេះ រដ្ឋាភិបាល សង្គមស៊ីវិល និងដៃគូអភិវឌ្ឍន៏នានា នៅកម្ពុជា បានរួមគ្នាបើកសិក្ខាសាលាមួយ ដោយផ្តោតលើការលាងសម្អាតដៃ។ សិក្ខាសាលានេះត្រូវបានបើកធ្វើនៅសណ្ឋាគារ Imperial Hotel ក្នុងក្របខណ្ឌនៃទិវាពិភពលោកលាងសម្អាតដៃ។ ក្រសួងអប់រំយុវជន និងកីឡា និងអង្គការ UNICEF បានសម្តែងការព្រួយបារម្ភពីការស្លាប់របស់កុមារដោយសារតែកង្វះអនាម័យ។ទិវាពិភពលោកលាងសម្អាតដៃឆ្នាំនេះបានផ្តោតលើអនាម័យនៅតាមសាលារៀន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
តាមការរកឃើញរបស់អង្កការ UNICEF មានកុមារប្រមាណជា ២,០០០នាក់ នៅកម្ពុជា បានស្លាប់បាត់បង់ជីវិតជារៀងរាល់ឆ្នាំ ដោយសារជំងឺរាគរូស។ យ៉ាងណាក៏ដោយ កុមារទាំងនេះ អាចនឹងការពារពីជំងឺនេះបាន ប្រសិនបើឪពុកម្តាយ ឬអាណាព្យាបាលរបស់ពួកគេ គ្រាន់តែបង្កើនអនាម័យ ដោយការលាងសម្អាតដៃនឹងសាប៊ូ ដល់កូនៗរបស់ពួកគេ។ នេះគឺជាខ្លឹមសារសំខាន់នៃសិក្ខាសាលាដែលត្រូវបានប្រារព្ធធ្វើនៅព្រឹកថ្ងៃពុធនេះ ក្រោមប្រធានបទ រដ្ឋាភិបាល និងដៃគូនានា រួមគ្នាដើម្បីពង្រឹងការអនុវត្តន៍អនាម័យតាមសាលារៀន និងលុបបំបាត់ការសាយភាយ នៃជំងឺដែលអាចទប់ស្កាត់បាន។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងអង្គសិក្ខាសាលានោះថា ទោះបីជាទស្សវត្សរ៍ចុងក្រោយនេះ កម្ពុជាមានការរីកចម្រើនផ្នែកផ្សេងៗក៏ដោយ តែអត្រាការឆ្លងជំងឺផ្សេងៗ និងការស្លាប់របស់កុមារ នៅតែជាបញ្ហាប្រឈម ដែលគួរឲ្យព្រួយបារម្ភដដែល។ លោកក៏បានអំពាវនាវ ដល់អង្គការដៃគូទាំងអស់ ជាពិសេស មន្ទីរអប់រំគ្រប់ជាន់ថ្នាក់ ធ្វើយ៉ាងណាពង្រឹងការអនុវត្តន៍ផែនការរបស់ខ្លួនឲ្យបានខ្ជាប់ខ្ជួន ដោយបំពាក់សម្ភារៈរូបវ័ន្តផ្នែកអនាម័យនៅតាមសាលារៀនឲ្យបានគ្រប់គ្រាន់។
ចំណែកលោកស្រី Sunah Kim អនុប្រធានអង្គការ UNICEF ប្រចាំកម្ពុជា ក៏បានលើកឡើងដែរថា អង្គការ UNICEF នៅតែបារម្ភពីបញ្ហាកង្វះអាហាររូបត្ថម និងកង្វះអនាម័យ ក្នុងចំណោមក្រុមកុមារតូចៗនៅកម្ពុជា។ លោកស្រី បានបន្តថា កត្តាទាំងនេះគឺនាំឲ្យកុមារឆ្លងជំងឺផ្សេងៗ ហើយឈានទៅដល់ការស្លាប់។
សូមបញ្ជាក់ថា ទិវាពិភពលោកលាងសម្អាតដៃ ត្រូវបានប្រារព្ធធ្វើកាលពីថ្ងៃទី ២១ ខែ តុលា ប៉ុន្តែ សកម្មភាពនានាទាក់ទងនឹងទិវានេះនឹងបន្តរហូតដល់ចុងខែវិច្ឆិកា។ ភាពជាដៃគូសកល នៃវិស័យសាធារណៈឯកជន សម្រាប់ការលាងសម្អាតដៃនឹងសាប៊ូ បានផ្តួចផ្តើម ឲ្យមានទិវាពិភពលោកលាងសម្អាតដៃនៅឆ្នាំ២០០៨ និងបានទទួលការអនុម័តគាំទ្រ ដោយរដ្ឋាភិបាល ស្ថាប័នអន្តរជាតិ អង្គការសង្គមស៊ីវិល អង្គការមិនមែនរដ្ឋាភិបាល ក្រុមហ៊ុនឯកជន និងបុគ្គលនានាជុំវិញពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ