លោក François Hollande បំពេញទស្សនកិច្ចនៅប្រទេសកាណាដា
នៅថ្ងៃអាទិត្យនេះ លោកប្រធានាធិបតីបារាំង François Hollande ចាប់ផ្តើមទស្សនកិច្ចផ្លូវការរយៈពេលបីថ្ងៃនៅប្រទេសកាណាដា ដើម្បីរឹតចំណងមិត្តភាពរវាងប្រទេសទាំងពីរ។ លោក François Hollande គ្រោងឡើងថ្លែងសុន្ទរកថានៅវិមានរដ្ឋសភាកាណាដា ក្នុងរដ្ឋធានីអូតាវ៉ា។ នេះជាការឡើងថ្លែងទៅកាន់សមាជិកសភា និងព្រឹទ្ធសភាកាណាដាជាលើកដំបូងបង្អស់ បន្ទាប់ពីដំណើរទស្សនកិច្ចផ្លូវរដ្ឋរបស់លោកអតីតប្រធានាធិបតីបារាំង François Mitterand កាលពីឆ្នាំ ១៩៨៧។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
ដំណើរទស្សនកិច្ចរបស់ប្រមុខរដ្ឋបារាំងលោក François Hollande ចាប់ផ្តើមតាមរយៈការទទួលបដិសណ្ឋារកិច្ចពីសំណាក់លោកនាយករដ្ឋមន្ត្រីកាណាដា Stephen Harpher នាព្រលានយន្តហោះទីក្រុង Calgary ខេត្ត Alberta។ បន្ទាប់មក ប្រមុខដឹកនាំនៃប្រទេសទាំងពីរទៅទស្សនាឧទ្យានជាតិនៅសហគមន៍ Banff ជាកន្លែងទេសចរណ៍ល្បីឈ្មោះរបស់កាណាដា ដែលមានទេសភាពធម្មជាតិ និងជួរភ្នំច្រើនសន្ធឹកសន្ធាប់។ បើតាមសេចក្តីប្រកាសរបស់វិមានប្រធានាធិបតីបារាំង Élysée ប្រតិភូអមដំណើរលោកប្រធានាធិបតីបារាំងរួមមាន បណ្តាប្រធានសហគ្រាសធំៗ តំណាងផ្នែកស្រាវជ្រាវ និងអប់រំ ព្រមទាំងរដ្ឋមន្រ្តីបារាំងចំនួន ៦ រូប។
យោងតាមសេចក្តីប្រកាសដដែលនេះបានអោយដឹងថា ការចាប់ផ្តើមទស្សនកិច្ចនៅភាគខាងលិចប្រទេសកាណាដាគឺ ជាកាយវិការបង្ហាញអោយដឹងថាប្រទេសបារាំងចាប់អារម្មណ៍ប្រទេសកាណាដាទាំងមូល ជាពិសេសបណ្តាខេត្តភាគខាងលិច ដែលកំពុងមានសេដ្ឋកិច្ចលូតលាស់ ដោយសារមានធនធានប្រេងក្រោមដី និងឧស្ម័នធម្មជាតិសំបូរបែប។ នៅទីនោះផងដែរ លោក François Hollande និងជួបសំណេះសំណាលជាមួយនាយករដ្ឋមន្រ្តីខេត្តនានា មានជាអាទិខេត្ត Alberta ខេត្ត Manitoba និងតំបន់ទឹកដីភាគពាយ័ព្យ។
បើតាមការបញ្ជាក់ពីខុទ្ទកាល័យរបស់លោកនាយករដ្ឋមន្រ្តីកាណាដា លោកFrançois Hollande និងលោក Stephen Harpher គ្រោងពិភាក្សាជុំវិញការបង្កើនកិច្ចសហប្រតិបត្តិការទ្វេភាគីរវាងប្រទេសទាំងពីរក្នុងវិស័យសន្តិសុខអន្តរជាតិ និងវិស័យសេដ្ឋកិច្ចពាណិជ្ជកម្ម។ បើតាមកម្មវិធីដែលបានគ្រោងទុក ប្រមុខដឹកនាំបារាំងនិងឡើងថ្លែងសុន្ទរកថានាថ្ងៃចន្ទចំពោះមុខសមាជិកសភា និងព្រឹទ្ធសភាកាណាដានៅវិមានរដ្ឋសភាក្នុងរដ្ឋធានីអូតាវ៉ា ជាទីដែលបានទទួលរងការវាយប្រហារបែបភេរវកម្មកាលពីពីរសប្តាហ៍មុន។
លោក François Hollande និងទៅបញ្ចប់ទស្សនកិច្ចនាថ្ងៃអង្គារ ដោយធ្វើដំណើរទៅកាន់ទីក្រុងកេបិច ដែលនៅទីនោះលោកនិងជួបពិភាក្សាជាមួយលោកនាយករដ្ឋមន្រ្តីខេត្តកេបិច Phillipe Couillard ដើម្បីទទូចសុំមិនអោយរដ្ឋាភិបាលខេត្តនេះដំឡើងឡើងថ្លៃសិក្សានិស្សិតបារាំង។ បច្ចុប្បន្ននេះ មាននិស្សិតបារាំងចំនួន ១ម៉ឺន ២ពាន់កំពុងសិក្សានៅតាមបណ្តាសាកលវិទ្យាល័យក្នុងខេត្តនិយាយភាសាបារាំងមួយនេះ។ ក្នុងថ្ងៃជាមួយគ្នានោះដែរ លោក François Hollande និងបន្តដំណើរទៅទីក្រុងម៉ុងរេអាល់ ដើម្បីជួបសំណេះសំណាលជាមួយបណ្តាប្រធានសហគ្រាសផែ្នកសិល្បៈបច្ចេកវិទ្យា។ នៅទីនោះផងដែរ លោកនិងឡើងថ្លែងសុន្ទរកថាបិទវេទិកាសេដ្ឋកិច្ច ដែលប្រមូលផ្តុំទៅដោយសហគ្រិនបារាំង និងកេបិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ