រាជធានីអូតាវ៉ាឋិតក្រោមការវាយប្រហារភេវរកម្ម?
កាលពីព្រឹកថ្ងៃពុធម្សិលមិញ រាជធានីអូតាវ៉ា ប្រទេសកាណាដា បានទទួលរងនូវការវាយប្រហារពីខ្មាន់ កាំភ្លើងលើទីតាំងចំនួនបីកន្លែងគឺ បូជនីយដ្ឋានរំលឹកិវញ្ញាណក្ខន្ធសង្រ្គាមលោក វិមានរដ្ឋសភាជាតិ និង មជ្ឈមណ្ឌលពាណិជ្ជកម្មវីដូ (Rideau)។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
យោងតាមប្រភពពត៌មានជាតិ Radio-Canada ហេតុការណ៍បានចាប់ផ្តើមកាលពីម៉ោងប្រមាណជាជាង ៩កន្លះព្រឹក នៅពេលដែលបុរសជាថ្មាន់កាំភ្លើងម្នាក់ ផ្តើមការបាញ់ប្រហារលើទាហានដែលយាមនៅ ឯ បូជនីយដ្ឋានរំលឹកវញ្ញាណក្ខន្ធសង្រ្គាមលោក មុននឹងសំដៅដោយកំរោលចូលក្នុងបរិវេណនៃរដ្ឋសភា ជាតិ។ ជនសង្ស័យប្រដាប់ដោយកាំភ្លើងបាញ់សត្វនោះ បានផ្ជុងប្លន់រថយន្តដើម្បីបើកសំដៅចូលក្នុង បរិវេណរដ្ឋសភា និងក៏បានរត់សំដៅចូលក្នុងអគារនៃរដ្ឋសភា។ នៅទីនោះឯងដែលការបាញ់ប្រហារ ឆ្លើយឆ្លងគ្នារវាងថ្មាន់កាំភ្លើង និង ក្រុមសន្តិសុខបានធ្វើឡើង ហើយជននោះក៏ត្រូវបានបាញ់ស្លាប់នៅ នឹងកន្លែង។
ភ្លាមៗនោះលោកនាយករដ្ឋមន្រ្តីស្ទីវិនហាភឺ និងមេដឹកនាំគណបក្សជំទាស់ តូម៉ាស មុលកែរ និងលោក ហ្សុសស្តាំង ទ្រូដូ ត្រូវបានគេជំលៀសពីកន្លែងកើតហេតុដោយសុវត្ថិភាព តាមរយៈប្រូតូកូលក្រហមនៃវិធានការសន្តិសុខពិសេស។ ចំណែកឯសមាជិកព្រឹទ្ធសភា រដ្ឋសភា និងរដ្ឋាភិបាលផ្សេងទៀតត្រូវបាន ក្រុមរក្សាសន្តិសុខនៅរដ្ឋសភា ដាក់អោយឋិតក្នុងអគារនៅកន្លែងមានសុវត្ថិភាព រង់ចាំភាពស្ងប់ស្ងាត់ធានា បានមួយរយភាគរយ មុននឹងធ្វើការជំលៀសពីអគាររដ្ឋសភានោះ។
ព្រមពេលជាមួយគ្នានោះដែរ ប៉ូលីសក្រុងអូតាវ៉ាក៏បានរាយការណ៍ថា មានខ្មាន់កាំភ្លើងម្នាក់ទៀតក៏ត្រូវ បានរងរបួសដោយគ្រាប់កាំភ្លើងរបស់ប៉ូលីសនៅខាងក្រោយវិមានរដ្ឋសភា។ បន្ទាប់មកមានគេ រាយការណ៍ថា មានវត្តមានខ្មាន់កំាភ្លើងទីបីម្នាក់ទៀត ត្រូវបានគេប្រទះឃើញនៅកណ្តាលទីក្រុងអូតាវ៉ា។
ជាលទ្ធផលបណ្តោះអាសន្នតាមរយៈខ្សែទូរទស្សន៍ជាតិ Radio-Canada នៅរសៀលថ្ងៃពុធនេះ បុគ្គលពីរ នាក់បានស្លាប់ គឺបុរសខ្មាន់កាំភ្លើងទីមួយ និងទាហានយាមម្នាក់នៅឯបូជនីយដ្ឋានខាងលើ ហើយ ក៏ មានអ្នកទទួលរងរបួសបីនាក់ទៀត។ ចំណែកឯខ្មាន់កាំភ្លើងដែលជាជនសង្ស័យផ្សេងទៀតកំពុងឋិតក្នុង ការប្រដេញតាមចាប់ដោយប៉ូលីស នៅពេញកណ្តាលទីក្រុងអូតាវ៉ានៅឡើយ។
មុននេះបន្តិច ចន្លោះពីម៉ោងពីរនិងបីរសៀល ចៅហ្វាយក្រុងអូតាវ៉ា អធិការប៉ូលីសក្រុងនិងរាជអាវុធហត្ថ កាណាដា បានធ្វើសន្និសិទកាសែតរួមមួយ បញ្ជាក់ពីស្ថានការណ៍ដែលបានកើតឡើង។
សួរថាតើជនសង្ស័យទាំងនោះមានគ្នីគ្នាប៉ុន្មាននាក់ មានអត្តសញ្ញាណដូចមេ្តច មានបំណងដូចម្តេច? សួរថា តើជនទាំងនេះអាចមានជាប់ទាក់ទងនឹងក្រុមភេវរកម្មណាមួយដែរឬទេ ? នេះសំនួរជាច្រើន ក្រោមក្រសែភ្នែកអ្នកកាសែតជាតិនិងអន្តរជាតិដែលមិនទាន់មានចំលើយ ដោយហេតុថាការស៊ើបអង្កេតនៅកំពុងបន្តនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ