ភ្លើងឆេះក្នុងក្លឹបរាំនៅប្រេស៊ីលសំលាប់មនុស្ស២៣៣នាក់
មានមនុស្សយ៉ាងហោចណាស់២៣៣នាក់ បានស្លាប់ដោយសារថប់ដង្ហើមនិងត្រូវគេរត់ជាន់នៅក្នុងហេតុការណ៍ ភ្លើងឆេះក្នុងក្លឹបរាត្រីមួយ នៅ ក្រុងSanta Maria ប្រទេសប្រេស៊ីល កាលពីថ្ងៃអាទិត្យម្សិលមិញនេះ។ យោងតាមរបាយការណ៍ស៊ើបអង្កតដំបូងរបស់ក្រុមប៉ូលិស គឺសិល្បៈគ្រឿងរំសេវនេះហើយ ដែលជាមូលហេតុនាំអោយអគ្គិភ័យកើតឡើង។ នេះជាគ្រោះថ្នាក់អគ្គីភ័យដែលសំលាប់មនុស្សច្រើនបំផុត កើតឡើងជាលើកទីពីរ នៅក្នុងប្រទេស។ ប្រេស៊ីលបានស្គាល់គ្រោះថ្នាក់អគ្គីភ័យប្រភេទនេះម្តងមកហើយ នៅឆ្នាំ ១៩៦១ នៅក្រុង Rio de Janeiro ដែលបានសំលាប់មនុស្ស រហូតដល់ ៥៣៣នាក់។ អជ្ញាធរប្រេស៊ីលបានប្រកាស កាន់មរណៈទុក្ខ សំរាប់រយៈពេលមួយខែ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ភ្លើងបានចាប់ផ្តើមឆេះ ប្រហែលជាម៉ោងពីរសាមសិបនាទី ព្រឹកថ្ងៃអាទិត្យម្សិលមិញ ក្នុងឧកាសពិធីបុណ្យសាកលវិទ្យាល័យ ធ្វើឡើងនៅក្នុងក្លឹបរាត្រីមួយឈ្មោះ Kiss ស្ថិតក្នុងក្រុង Santa Maria ភាគខាងត្បូងប្រទេស។
យោងតាមការអង្កេតរបស់ប៉ូលិស គឺសិល្បៈគ្រឿងរំសេវនេះហើយ ដែលជាមូលហេតុនាំអោយអគ្គិភ័យកើតឡើង។ អ្នកចំរៀងមួយរូប នៅក្នុងក្រុមចំរៀងដែលកំពុងសម្តែងសិល្បៈក្នុងក្លឹបរាត្រីនេះ ប្រហែលជាបានបញ្ឆេះចន្លុះមួយ ដែលអ្នកគាំទ្រនានាតែងតែប្រើនៅក្នុងស្តាត។ ម្ល៉ោះហើយ បណ្តាលអោយធាតុប៉ូលីស្ទីរ៉េន ប្រើសំរាប់បង្ខាំងសំលេងជាប់នៅលើពិតាន ឆាបឆេះឡើង ហើយភ្លើងបានរាលដាលយ៉ាងលឿន។
មនុស្សប្រហែលជា ៥០០នាក់ ដែលបានមកទស្សនាការសំដែងនេះ កំពុងស្ថិតនៅក្នុងក្លឹបរាំ នៅពេលភ្លើងកំពុងឆេះ។ ពួកគេ ចលាចល រត់ជាន់គ្នារកច្រកចេញ។ ជនរងគ្រោះភាគច្រើន ស្លាប់ដោយសារការថប់ដង្ហើម និងត្រូវគេរត់ជាន់។ ជនរងគ្រោះភាគច្រើនជាយុវវ័យ។ ក្រុមពន្លត់អគ្គិភ័យបានចោះទំលុះជញ្ជាំង ដើម្បីយកសាកសពចេញពីក្លឹបរាំ។
ប្រជាជនប្រេស៊ីល បានបញ្ចេញកំហឹង ធ្វើការរិះគន់សេវាគ្រប់គ្រងសណ្តាប់ធ្នាប់ របស់ក្លឹបរាត្រី Kiss ដោយបរិហារថា ពួកគេមិនបានបើកទ្វាអោយបានទាន់ពេលវេលា ដើម្បីជួយមនុស្សអោយរត់គេចចេញពីអគ្គិភ័យនេះ ព្រោះពួកគេគិតតែពីរឿងលុយកាក់ ខ្លាចតែអ្នកដែលទៅទស្សនាការសំដែងទាំងនោះ រត់គេចមិនបង់លុយ។
ប្រធានាធិបតីប្រេស៊ីល លោកស្រី Dilma Roussef បានលុបចោលដំណើរការចូលរួមក្នុងជំនួបប្រជុំមេដឹកនាំតំបន់អាមេរិកឡាទីន ដើម្បីចុះទៅក្លឹបរាត្រីដែលឆេះនោះ។
នេះជាគ្រោះថ្នាក់អគ្គីភ័យដែលសំលាប់មនុស្សច្រើនបំផុត កើតឡើងជាលើកទីពីរ នៅប្រេស៊ីល។ ប្រទេសនេះ បានស្គាល់គ្រោះថ្នាក់អគ្គីភ័យម្តងមកហើយ កាលពីឆ្នាំ ១៩៦១ ក្នុងក្រុង Rio de Janeiro ស្ថិតនៅភាគអគ្នេយ៍ ដែលបានសំលាប់មនុស្ស រហូតដល់ ៥៣៣នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ