អ៊ីរ៉ាក់កំពុងធ្លាក់ក្នុងសង្គ្រាមដណ្តើមអំណាច ទន្ទឹមគ្នានឹងសង្គ្រាមជីហាត ឬ ?
ចុះផ្សាយនៅថ្ងៃ៖
ស្តាប់ - ០៥:១០
នៅក្នុងពេលដែលក្រុមជីហាតកំពុងវាតទីកាន់កាប់ក្រុងធំៗ ហើយបង្កជាវិបត្តិមនុស្សធម៌ នៅរដ្ឋធានីបាកដាដវិញ ប្រមុខដឹកនាំអ៊ីរ៉ាក់កំពុងតែប្រឈមមុខដាក់គ្នា ដែលអាចបង្កទៅជាវិបត្តិនយោបាយបន្ថែមមួយទៀត។ នាយករដ្ឋមន្រ្តីអ៊ីរ៉ាក់បានដាក់ពង្រាយកងកម្លាំងខុសប្រក្រតី ក្រោយពីប្រកាសចង់ប្តឹងប្រធានាធិបតីពីបទរំលោភរដ្ឋធម្មនុញ្ញ។ សូម្បីតែមេប៉ូលិសអ៊ីរ៉ាក់ មេប៉ូលិសក៏បានទទួលស្គាល់ដែរថា វត្តមានប៉ូលិស ទាហាន កងសន្តិសុខ នៅកណ្តាលក្រុងបាកដាដ រដ្ឋធានីរបស់អ៊ីរ៉ាក់ មានទម្រង់ដូចចេញធ្វើប្រតិបត្តិការពិសេស មិនធ្លាប់មាន នៅតាមស្ពាន សង្កាត់យុទ្ធសាស្ត្រ ឬនៅតាមទីតាំងស្ថាប័នរដ្ឋសំខាន់ៗ ពោលគឺដូចចេញធ្វើប្រតិបត្តិការបន្ទាន់ ក្នុងរដ្ឋមានអាសន្ន។
ស្ថានការណ៍អ៊ីរ៉ាក់ កាន់តែច្របូកច្របល់ខ្លាំង ក្នុងថ្ងៃចន្ទទី ១១ សីហានេះ និងគួរឱ្យភ្ញាក់ផ្អើលមែនទែន។ បើតាមប្រសាសន៍របស់លោកនាយករដ្ឋមន្ត្រី នូរី អាល់ម៉ាលិគិ លោកប្រធានាធិបតីបានរំលោភច្បាប់រដ្ឋធម្មនុញ្ញពីរដង ៖ ទីមួយ ប្រធានាធិបតីបានស្នើសុំពន្យារពេលជាលើកទីពីរ មុននឹងសួរគណបក្សនយោបាយ ក្នុងការបង្កើតរដ្ឋាភិបាល។ ទីពីរ គឺប្រធានាធិបតីបដិសេធមិនពិភាក្សាបញ្ហានេះជាមួយនាយករដ្ឋមន្ត្រី។ បានសេចក្តីថាប្រធានាធិបតីគិតតែពីប្រយោជន៍បក្សពួក មិនគិតគូរអំពីប្រយោជន៍ប្រទេសជាតិ។
និយាយឱ្យចំគឺនាយករដ្ឋមន្ត្រី ដែលមានដើមកំណើតឈីអ៊ីត ចង់បញ្ចេញសកម្មភាពប្រឆាំង នឹងប្រធានាធិបតីដែលជាជនជាតិគៀរឌីស្តង់ និងមាននិកាយស៊ុននីត។ ឥលូវតុលាការឱ្យលោកឈ្នះ ដូច្នេះតាមច្បាប់រដ្ឋធម្មនុញ្ញ លោកនូរី អាល់ម៉ាលិគិ នឹងត្រូវក្លាយជានាយករដ្ឋមន្ត្រីអ៊ីរ៉ង់ ជាលើកទីបី។
ការតែងតាំងរដ្ឋាភិបាលជាប់គាំង
លោកនូរីអាល់ម៉ាលិគិ និកាយឈីអ៊ីត ជានាយករដ្ឋមន្ត្រី រងការរិះគន់ខ្លាំងណាស់ ពីគ្រប់មជ្ឈដ្ឋាន។ បក្សសម្ព័ន្ធរបស់លោក បានជាប់ឆ្នោតសភា តាំងពីថ្ងៃទី ៣០មេសាមក ដែលនឹងអាចនាំលោកឱ្យក្លាយជានាយករដ្ឋមន្ត្រីសម្រាប់អាណត្តិទីបី។ ប៉ុន្តែអ្នកនយោបាយគ្រប់ជាន់ថ្នាក់ភាគច្រើនយល់ថាលោកជាមនុស្សផ្តាច់ការ រើងអើងពូជសាសន៍ស៊ុននីត ជាជនជាតិភាគតិចនៅអ៊ីរ៉ាក់ និងពូជសាសន៍គៀរឌីស្តង់។
សមាជិកសភាមិនព្រមព្រៀងគ្នាលើបេក្ខភាពជានាយករដ្ឋមន្ត្រីរបស់លោក នូរី អាល់ម៉ាលិគី រដ្ឋាភិបាលថ្មីមិនអាចប្រសូតចេញបានទៀតរហូតមកទល់នឹងពេលនេះ សភាក៏បានប្រកាស ម្សិលមិញ លើកពេលប្រជុំទៅថ្ងៃទី ១៩ សីហា វិញ មិនព្រមតែងតាំងរដ្ឋាភិបាលអ៊ីរ៉ាក់ថ្មីទេ។
ប្រឈមមុខនឹងការអូសបន្លាយវិបត្តិនយោបាយជាប់គាំងដូច្នេះ លោកប្រធានាធិបតីអ៊ីរ៉ាក់ ក៏បានគំរាមនៅថ្ងៃម្សិលមិញ រំលាយសភាចោល ប្រសិនបើមិនអាចរកមនុស្សថ្មីមកជំនួសលោក ម៉ាលិគិ ឱ្យបានឆាប់រហ័សសម្រាប់បង្កើតរដ្ឋាភិបាលនោះ។ ហេតុដូច្នេះហើយបានលោកនាយករដ្ឋមន្ត្រីផុតអាណត្តិ ម៉ាលិគិ ចោទប្រធានាធិបតីថាចង់បង្វៀងរដ្ឋធម្មនុញ្ញ ដើម្បីដេញលោកចេញពីអំណាច ដោយដាក់ពាក្យបណ្តឹងទៅតុលាការ។
អាមេរិកគាំទ្រប្រធានាធិបតី ព្រមាននាយករដ្ឋមន្ត្រី
ក្នុងខណៈដែល ពួកជីហាតរដ្ឋអ៊ីស្លាមកំពុងរុករានវាតទីដូច្នេះ ការបែកបាក់នយោបាយមិនមែនជាបច្ច័យល្អសោះ។ អ៊ីរ៉ាក់ចាំបាច់ត្រូវបង្កើតរដ្ឋាភិបាលបង្រួបបង្រួម ដ៏រឹងម៉ាំ ទើបមានអំណាច និងមានកម្លាំងទប់ទល់នឹងសត្រូវពួកជីហាតរដ្ឋអ៊ីស្លាមបាន។ ប្រធានាធិបតីអាមេរិក លោក បារ៉ាក់អូបាម៉ា និងបណ្តាប្រទេសបស្ចឹមលោកផ្សេងទៀត មានជាអាទិ៍បារាំងបានដាក់គំនាបលើអាជ្ញាធរអ៊ីរ៉ាក់ឱ្យបង្កើតរដ្ឋាភិបាលឱ្យបានលឿន ដើម្បីផ្តុំកម្លាំងទៅប្រយុទ្ធនឹងពួកជីហាត។
នៅយប់មិញ ក្រោយពីបានឮសេចក្តីថ្លែងការណ៍របស់លោក នូរី អាល់ម៉ាលិគិ ភ្លាម វ៉ាស៊ីនតោន បានបញ្ចេញប្រតិកម្ម គំរាមនាយករដ្ឋមន្ត្រីអ៊ីរ៉ាក់ មិនឱ្យបង្កវិបត្តិនយោបាយបន្ថែមលើវិបត្តិមនុស្សធម៌ដែលកំពុងញាំញីស្រាប់នៅអ៊ីរ៉ាក់ និងបញ្ជាក់អំពីជំហរគាំទ្រទាំងស្រុង លោកប្រធានាធិបតីអ៊ីរ៉ាក់ ហ្វូអាដ ម៉ាស៊ូម ថាពិតជាអ្នកធានារ៉ាប់រងរដ្ឋធម្មនុញ្ញ និងការស្វែងរកនាយករដ្ឋមន្ត្រី ដែលអាចបង្កើតកុងសង់ស៊ុសជាតិមួយ។
បារាំងចង់បំពាក់អាវុធដល់ក្រុមគៀរឌីស្តង់
ដោយសារអន្តរាគមន៍ផ្លូវអាកាសអាមេរិក កងកម្លាំងគៀរឌីស្តង់ បានដណ្តើមយកក្រុងពីរបានមកវិញ ប៉ុន្តែអះអាងថាប្រតិបត្តិការអាមេរិកមិនគ្រប់គ្រាន់ទេ ពួកគេត្រូវការអាវុធយុទ្ធភណ្ឌបន្ថែមទៀត ព្រោះពួកជីហាតរដ្ឋអ៊ីស្លាមមានកម្លាំងខ្លាំង និងរុលទៅមុខយកបានក្រុងគៀរឌីស្តង់មួយផ្សេងទៀត នៅយប់មិញ។ សំណើសុំបំពាក់អាវុធ ដែលបារាំង តាមរយៈរដ្ឋមន្ត្រីការបរទេសសន្យាស្វះស្វែងរកការព្រមព្រៀងថ្នាក់អឺរ៉ុបតែម្តង។ ក្នុងពេលរង់ចាំ បារាំងអង់គ្លេស អាមេរិក នាំមុខ ផ្តល់ជំនួយមនុស្សធម៌ ដល់ក្រុមភៀសខ្លួនរាប់ពាន់នាក់ ភាគច្រើនជាជនជាតិភាគតិចរត់គេចពីការរាតត្បាតរបស់ពួករដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ