បារាំងស្នើសុំឲ្យមានការប្រជុំក្រុមប្រឹក្សាសន្តិសុខអង្កការសហប្រជាជាតិជាបន្ទាន់ស្តីពីវិបត្តិនៅអ៊ីរ៉ាក់
លោករដ្ឋមន្ត្រីក្រសួងការបរទេសបារាំង ឡូរ៉ង់ ហ្វាប៊្យូស បានស្នើសុំទៅក្រុមប្រឹក្សាសន្តិសុខអង្គការសហប្រជាជាតិ ឲ្យកោះប្រជុំជាបន្ទាន់ ដើម្បីស្វែងរកដំណោះស្រាយ ស្រោចស្រង់ប្រទេសអ៊ីរ៉ាក់ ចំពោះការវាយលុករបស់ក្រុមឧទ្ទាមជីហាតអ៊ីស្លាមនិយមជ្រុល និងជួយសង្គ្រោះប្រជាជនស្លូតត្រង់កាន់សាសនាកាតូលិកដែលត្រួវពួកនេះធ្វើទុក្ខបុកម្នេញ និងជម្លៀសចេញពីផ្ទះសម្បែងយ៉ាងអមនុស្សធម៌។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ប៉ុន្មានសប្តាហ៍ចុងក្រោយនេះ ស្ថានភាពនៅអ៊ីរ៉ាក់កាន់តែដុនដាមទៅ បន្ទាប់ពីក្រុមឧទ្ទាមជីហាតអ៊ីស្លាមនិយមជ្រុល បានវាយលុកកាន់កាប់តំបន់កាន់តែធំទៅៗ។ លោករដ្ឋមន្ត្រីក្រសួងការបរទេសបារាំង ឡូរ៉ង់ ហ្វាប៊្យូស បានថ្លែងថា បារាំងមានការព្រួយបារម្ភជាខ្លាំងដល់សន្តិសុខ និងអាយុជីវិតរបស់ប្រជាពលរដ្ឋស្លូតត្រង់ដែលកាន់សាសនាកាតូលិក ព្រោះថាពួកគេត្រូវបានពួកឧទ្ទាមអ៊ីស្លាមធ្វើបាប និងបង្ខំឲ្យចាកចេញពីផ្ទះសម្បែងយ៉ាងអាណោចអាធម៌ជាទីបំផុត។ លោកបានបន្តថា ក្នុងនាមបារាំងជាប្រទេសសមាជិកក្រុមប្រឹក្សាសន្តិសុខអង្គការសហប្រជាជាតិ បារាំងសូមធ្វើការស្នើសុំឲ្យមានកិច្ចប្រជុំជាបន្ទាន់ ដើម្បីរកមធ្យោបាយទប់ទល់ទៅនឹងកំលាំងរបស់ពួកឧទ្ទាមអ៊ីស្លាមនិយមជ្រុល ព្រមទាំងប្រកាសឲ្យសហគមន៏អន្តរជាតិទាំងមូលផ្តល់ជំនួយដល់ប្រជាជនដែលរងគ្រោះ។
ក្រុមឧទ្ទាមអ៊ីស្លាមនិយមជ្រុលជីហាត បានវាយកាន់កាប់ក្រុងការាកូស្ហ កាលពីយប់ថ្ងៃពុធ ទី៦ សីហា។ ក្រុមឧទ្ទាមអីស្លាមបានបណ្តេញប្រជាជនកាន់សាសនាកាតូលិក ប្រមាណជា ១០ម៉ឺននាក់ចេញពីទីក្រុងយ៉ាងព្រៃផ្សៃបំផុត ដោយម្នាក់ៗមានតែខោអាវមួយចង្កេះតែប៉ុណ្ណោះ។ ប្រមុខដឹកនាំសាសនាកាតូលិកនៅក្រុងនេះបានអំពាវនាវឲ្យមានអន្តរាគមន៍ពីសហគមន៍អន្តរជាតិ ដោយលោកបានចាត់ទុកថា ទង្វើរបស់ពួកឧទ្ទាមអ៊ីស្លាមប្រៀបបីដូចជាអំពើប្រល័យពូជសាសន៍។ សម្តេចប៉ាប ហ្រ្វង់ស្វ័រ ប្រមុខសាសនាកាតូលិ ក៏បានអំពាវនាវឲ្យសហគមន៍អន្តរជាតិផ្តល់ជំនួយជាបន្ទាន់ ដល់ប្រជាជនស្លូតត្រង់ ដែលអាចនឹងរងគ្រោះដោយការសម្លាប់រង្គាលពីសំណាក់ពួកឧទ្ទាមអ៊ីស្លាមជីហាត។
ក្រុង ការាកូស្ហគឺជាទីក្រុងដែលមានប្រជាជនអ៊ីរ៉ាក់កាន់សាសនាគ្រឹស្ត រស់នៅច្រើនជាងគេបំផុត។ គ្រាន់តែមួយថ្ងៃប៉ុណ្ណោះ ពួកឧទ្ទាមបានបណ្តេញប្រជាជនអ្នកកាន់សាសនាគ្រឹស្តប្រមាណជា១០ម៉ឺននាក់។ ទីក្រុងមួយទៀតនៅភាគខាងជើងក្រុងម៉ូស៊ូល ក៏មានការបណ្តេញចេញយ៉ាងអមនុស្សធម៌បែបនេះដែរ។ អ្នកកាន់សាសនាគ្រឹស្តនៅអ៊ីរ៉ាក់មានការថយចុះ មួយជាពីរ គិតចាប់ពីឆ្នាំ២០០៣មក ដោយសារតែមានការធ្វើទុក្ខបុកម្នេញគ្រប់រូបភាព ពីសំណាក់ពួកក្រុមជីហាតអ៊ីស្លាមនិយមជ្រុល។ បច្ចុប្បន្ននេះ បើតាមការប៉ាន់ស្មាន មានជនជាតិអ៊ីរ៉ាក់កាន់សាសនាគ្រឹស្តប្រមាណជា៤ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ