អ៊ីតាលីជំទាស់ឥណ្ឌាដែលប្រើច្បាប់ប្រឆាំងភេរវកម្ម លើទាហានជើងទឹកអ៊ីតាលី
នៅអ៊ីតាលី ថ្ងៃចន្ទនេះ នាយករដ្ឋមន្ត្រី អិនរីកូ ឡេតា បានប្រាប់ថា លោកមិនអាចទទួលយកបានឡើយនូវទង្វើរបស់តុលាការកំពូលឥណ្ឌា ដែលបានសម្រេចអោយមានការអនុវត្តន៍ច្បាប់ប្រឆាំងអំពើភេរវកម្ម ប្រឆាំងទាហានជើងទឹកអ៊ីតាលី២រូប។ ទាហានអ៊ីតាលីទាំង២នាក់ ជាប់ចោទពីបទសម្លាប់អ្នកនេសាទឥណ្ឌាចំនួន២នាក់ កាលពីឆ្នាំ២០១២។ នៅថ្ងៃចន្ទនេះ រដ្ឋមន្ត្រីការពារជាតិអ៊ីតាលីកំពុងមានវត្តមាននៅឥណ្ឌាដើម្បីគាំទ្រទាហានអ៊ីតាលីទាំង២នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
នៅថ្ងៃចន្ទនេះ រដ្ឋាភិបាលអ៊ីតាលីបានសុំអោយតុលាការកំពូលឥណ្ឌាពិនិត្យអោយបានសមស្របឡើងវិញ នូវសំណុំរឿងក្តី ប្រឆាំងទាហានជើងទឹកអ៊ីតាលី២នាក់ ជាប់ចោទពីបទធ្វើឃាតអ្នកនេសាទឥណ្ឌា២នាក់ កាលពីខែកុម្ភៈ ឆ្នាំ២០១២។ នៅថ្ងៃចន្ទនេះដែរ តុលាការកំពូលឥណ្ឌាបានលើកសវនាការរឿងក្តីនេះ ទៅធ្វើនៅថ្ងៃ១៨កុម្ភៈខាងមុខវិញ។
គួររំលឹកថា ទាហានអ៊ីតាលីទាំង២រូប ក្នុងសំណុំរឿងក្តីនេះ រងការចោទប្រកាន់ថា បានបាញ់ទៅលើអ្នកនេសាទឥណ្ឌា កាលពីខែកុម្ភៈ ឆ្នាំ២០១២ នៅតាមឆ្នេររដ្ឋកេរេឡា ភាគខាងត្បូងឥណ្ឌា ពេលពួកគេកំពុងការពារសន្តិសុខកប៉ាល់ដឹកប្រេងអ៊ីតាលីមួយគ្រឿង។ ទាហានអ៊ីតាលីទាំង២រូប ប្រាប់ថា កាលណោះ ពួកគេយល់ច្រលំថា កប៉ាល់អ្នកនេសាទឥណ្ឌាទាំង២រូបនេះ ជាកប៉ាល់ចោរប្លន់។ រដ្ឋាភិបាលអ៊ីតាលីទទូចចង់អោយការកាត់ទោសទាហានទាំង២ ប្រព្រឹត្តទៅនៅអ៊ីតាលី ព្រោះថា ការបាញ់ប្រហារនោះធ្វើឡើងក្នុងដៃនទឹកអន្តរជាតិ។
តុលាការកំពូលឥណ្ឌាគ្រោងកាត់ក្តីទាហានអ៊ីតាលីទាំង២រូប ស្របតាមមូលដ្ឋានច្បាប់ប្រឆាំងអំពើប្លន់តាមសមុទ្រ។ ដំបូងឡើយ តុលាការឥណ្ឌាចង់សម្រេចរហូតដល់ទោសប្រហារជីវិតទាហានអ៊ីតាលីទាំង២នាក់ទៀតផង ប្រសិនបើមានការវិនិច្ឆ័យថា ទាហានទាំង២នេះ ពិតជាចង់ធ្វើឃាតលើអ្នកនេសាទឥណ្ឌាពិតមែន។ ប៉ុន្តែ ដោយអ៊ីតាលីបានលុបចោលច្បាប់ដាក់ទោសប្រហារជីវិត ឥណ្ឌាបានប្តូរការសម្រេចវិញ។ ទាហានអ៊ីតាលីទាំង២រូប អាចទទួលទោសជាប់ពន្ធនាគារ១០ឆ្នាំ។
រដ្ឋាភិបាលអ៊ីតាលីតវ៉ានឹងទង្វើតុលាការឥណ្ឌាដែលចង់ប្រើច្បាប់ប្រឆាំងភេរវកម្ម ប្រឆាំងទាហានជើងទឹកអ៊ីតាលី។ សម្រាប់អ៊ីតាលី ការសម្រេចរបស់តុលាការកំពូលឥណ្ឌាគ្មានភាពសមស្រប ហើយពិបាកនឹងយល់បាន។ យោងតាមរដ្ឋាភិបាលអ៊ីតាលី ឥណ្ឌាបានភ្ជាប់ហេតុការណ៍បាញ់លើអ្នកនេសាទឥណ្ឌា ទៅនឹងអំពើភេរវកម្ម។
រដ្ឋាភិបាលអ៊ីតាលីលើកឡើងថា បើតុលាការឥណ្ឌាអនុម័តច្បាប់ប្រឆាំងអំពើប្លន់តាមសមុទ្រ ក្នុងការកាត់ក្តីនេះ ទំនាក់ទំនងភាគីអ៊ីតាលី សហភាពអឺរ៉ុប និងភាគីឥណ្ឌានឹងរងផលប៉ះពាល់។ ហើយការប្រឆាំងអំពើភេរវកម្មអន្តរជាតិក៏នឹងរងផលប៉ះពាល់ធ្ងន់ធ្ងរផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ