លោកស្ហ៊ីនហ្សូ អាបេ៖ រដ្ឋធម្មនុញ្ញសន្តិភាពនិយមជប៉ុនត្រូវធ្វើវិសោធនកម្មឲ្យបានមុនឆ្នំា ២០២០
ចុះផ្សាយនៅថ្ងៃ៖
ស្តាប់ - ០៤:៣៨
នៅថ្ងៃពុធ ទី១ មករា ឆ្នំា២០១៤ នេះ លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានថ្លែងយ៉ាងច្បាស់ៗថា ជប៉ុននឹងធ្វើការកែប្រែឡើងវិញនូវរដ្ឋធម្មនុញ្ញសន្តិភាពនិយមរបស់ខ្លួនឲ្យបានមុនឆ្នំា ២០២០។ ឆ្នំា ២០២០ ដែលប្រទេសជប៉ុនត្រូវធ្វើជាផ្ទះរៀបចំការប្រកួតល្បែងកីឡាអូឡំាពិក។ សូមជម្រាបជូនថា រដ្ឋធម្មនុញ្ញជប៉ុនសព្វថ្ងៃបានដាក់កំហិតឲ្យជប៉ុនមានកម្លំាងទ័ពត្រឹមតែការពារខ្លួនប៉ុណ្ណោះ ពោលគឺមិនឲ្យចូលរួមនៅក្នុងប្រតិបត្តិការយោធាជាមួយបណ្តាប្រទេសផ្សេងទៀតក្នុងតំបន់ និងនៅក្នុងពិភពលោកទេ។
គឺនៅក្នុងឱកាសនៃការថ្លែងសារជូនពរឆ្នំាថ្មី ២០១៤ ដែលលោកនាយករដ្ឋមន្រ្តីជប៉ុនស្ហ៊ីនហ្សូ អាបេបានឆ្លៀតលើកឡើងអំពីគម្រោងធ្វើវិសោធនកម្មរដ្ឋធម្មនុញ្ញសន្តិភាពនិយមរបស់ប្រទេសសព្វថ្ងៃ។ គួររម្លឹកជូនថា រដ្ឋធម្មនុញ្ញសន្តិភាពនិយមនេះត្រូវបានបង្កើតឡើងកាលពី ៦៨ឆ្នំាមុន ពោលក្រោយពេលដែលជប៉ុនចាញ់សង្រ្គាមលោកលើកទី២ កាលពីថ្ងៃទី១៥ សីហា ឆ្នំា ១៩៤៥ ប្រឈមមុខនឹងសហរដ្ឋាមេរិក។ កាលណោះ អាមេរិកក្នុងនាមជាអ្នកឈ្នះសង្រ្គាមបានចាប់បង្ខំជប៉ុនឲ្យបង្កើតរដ្ឋធម្មនុញ្ញមួយដែលដាក់កំហិតឲ្យជប៉ុនមានកម្លាំងទ័ពសម្រាប់តែការពារខ្លួនប៉ុណ្ណោះ ពោលគឺមិនចូលរួមជាមួយកម្លំាងទ័ពអន្តរជាតិនៅក្នុងតំបន់ ឬមួយក៏នៅក្នុងពិភពលោកទេ។ ការបង្ខំរបស់រដ្ឋបាលអាមេរិកពេលនោះ គឺដើម្បីរារំាងជប៉ុនកុំឲ្យធ្វើការអភិវឌ្ឍន៍កម្លំាងយោធារបស់ខ្លួន ពិសេសទប់កុំឲ្យជប៉ុនវិលត្រឡប់ទៅរកនយោបាយយោធានិយម និងនយោបាយវាតទីនិយមដូចកាលពីមុនសម័យសង្រ្គាមលោកលើកទី២ ជាថ្មី។
គួរបញ្ជាក់ជូនថា មុនចាញ់សង្រ្គាមលោកលើកទី២ កងទព័ជប៉ុនបានចូលទៅវាតទីសឹងតែមួយទ្វីបអាស៊ីទំាងមូល តំាងពីបណ្តាប្រទេសជាប់ព្រំដែនខ្លួន រហូតដល់បណ្តាប្រទេសឆ្ងាយពីព្រំដែនខ្លួន។ អ្វីដែលគួរឲ្យកត់សម្គាល់ និងដែលបណ្តាប្រទេសនោះបាននិងកំពុងបន្តទាមទារពីរដ្ឋាភិបាលជប៉ុនរហូតមកដល់សព្វថ្ងៃ គឺសំណងជំងឺចិត្តដែលប្រព្រឹត្តិដោយទាហានជប៉ុននាសម័យឈ្លនពាននោះ ពិសេសពីសំណាក់ប្រជាជនចិន និងកូរ៉េដែលបានទទួលរងគ្រោះខ្លំាងជាងគេ។
តែនៅពេលនេះ និង៦៨ឆ្នំាក្រោយមក លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានថ្លែងយ៉ាងច្បាស់ថា វាល្មមដល់ពេលដែលជប៉ុនត្រូវធ្វើការកែប្រែរដ្ឋធម្មនុញ្ញរបស់ខ្លួនឡើងវិញដើម្បីឲ្យវាសក្តិសមទៅនឹងកាលៈទេសៈរបស់ពិភពលោកសព្វថ្ងៃ។ ដោយឡែក និងក្រៅពីសារបញ្ជាក់ពីគម្រោងធ្វើវិសោតនកម្មរដ្ឋធម្មនុញ្ញឲ្យបានមុនឆ្នំា ២០២០ លោកប្រមុខរដ្ឋាភិបាលជប៉ុនក៏បានបញ្ជាក់ជាថ្មីអំពីការប្តេជ្ញាចិត្តរបស់ជប៉ុនក្នុងការពារទឹកដីប្រឈមមុខនឹងប្រទេសចិន និងកូរ៉េខាងត្បូង ទំាងនៅលើអាកាស លើដី និងលើទឹក។
ប្តូរពីកងកម្លាំងការពារខ្លួនទៅជាកងទ័ពជាតិពេញលក្ខណៈ
ឆន្ទៈរបស់លោកស្ហីនហ្សូ អាបេដែលចង់កែប្រែច្បាប់រដ្ឋធម្មនុញ្ញត្រូវបានលោកប្រាប់ឲ្យដឹងតំាងពី ១ឆ្នំាមកហើយ ពោលតំាងពីលោកបានវិលមកកាន់តំណែងនាយករដ្ឋមន្រ្តីជប៉ុនជាថ្មីកាលពីដំណាច់ខែធ្នូ ឆ្នំា ២០១២។ ដូច្នេះ អ្វីដែលលោកស្ហ៊ីនហ្សូ អាបេបានបញ្ជាក់ជាផ្លូវការថា នឹងកែប្រែឲ្យបានមុនឆ្នំា ២០២០ នាពេលនេះ ពិតជាគ្មានអ្វីគួរឲ្យភ្ញាក់ផ្អើលទេ។ សម្រាប់លោកអាបេ វាល្មមដល់ពេលដែលជប៉ុនត្រូវឈានមួយជំហានធំទៅមុខ និងប្រឹងប្រែងកសាងប្រទេសរបស់ខ្លួនឲ្យសក្តិសមទៅនឹងស្ថានការណ៍ពិភពលោកនៃសតវត្សទី២១នេះ។ អ្វីដែលលោកស្ហីនហ្សូ អាបេចង់បាននោះ គឺការប្តូរលក្ខន្តិកកងទ័ពជប៉ុន ពីកងកម្លាំងការពារខ្លួនមកជាកងទ័ពជាតិពេញលក្ខណៈដូចគេ ដូចឯង។ ទន្ទឹមគ្នានេះ លោកអាបេក៏បានសម្រេចបង្កើនថវិកាការពារជាតិចំនួន ៥% សម្រាប់រយៈពេល ៥ឆ្នំាខាងមុខ។
អ្វីដែលគួរឲ្យកត់សម្គាល់នោះគឺថា ទំាងការតម្លើងថវិកាការពារជាតិ ក៏ដូចគម្រោងធ្វើវិសោតនកម្មរដ្ឋធម្មនុញ្ញសន្តិភាពនិយមត្រូវបានធ្វើឡើង ចំពេលដែលជប៉ុនកំពុងប្រឈមមុខកាន់តែខ្លំាងឡើងៗជាមួយចិនជុំវិញទីប្រជុំកោះសេនកាគុដែលសព្វថ្ងៃស្ថិតក្រោមការកាន់កាប់របស់ជប៉ុន តែចិនកំពុងទាមទារជារបស់ខ្លួន។
អ្នកនយោបាយ និងប្រជាជននៅបន្តខ្វែងគំនិតគ្នា
ដើម្បីអាចឲ្យជប៉ុនកែប្រែរដ្ឋធម្មនុញ្ញកាលពី ៦៨ឆ្នំាមុនរបស់ខ្លួនបាន លុះត្រាណាតែមានការយល់ព្រមពីសភាទំាងពីរ និងការយល់ព្រមពីប្រជាជនជប៉ុនភាគច្រើន។ សូមជម្រាបជូនថា បើទោះបីជា ៦៨ឆ្នំាបានកន្លងផុតទៅហើយក៏ដោយ ក៏គម្រោងកែប្រែរដ្ឋធម្មនុញ្ញនេះនៅតែបង្កឲ្យមានការខ្វែងគំនិតគ្នាយ៉ាងខ្លំាងនៅក្នុងចំណោមអ្នកនយោបាយ ក៏ដូចប្រជាជនសាមញ្ញ។ អ្នកខ្លះចង់ឲ្យជប៉ុនបន្តរក្សារដ្ឋធម្មនុញ្ញសន្តិភាពនិយមឲ្យនៅដដែល ដើម្បីបញ្ចៀសសង្រ្គាម។ តែអ្នកខ្លះទៀតយល់ថា រដ្ឋធម្មនុញ្ញសន្តិភាពនិយមសព្វថ្ងៃជាអន្ទាក់ទាក់ ក ខ្លួនឯងទៅវិញទេ។ ដូច្នេះឃើញថា នេះមិនជារឿងងាយស្រួលប៉ុន្មានទេ សម្រាប់លោកស្ហ៊ីនហ្សូ អាបេដែលជាអ្នកអភិរក្សនិយម និងប្រកាន់ជំហរជាតិនិយមនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ