ចិនថានឹងគ្មានជំនួបកំពូលជាមួយលោកស្ហ៊ីនហ្សូអាបេក្រោយពីលោកធ្វើដំណើរទៅយ៉ាស៊ូគូនី
កាលពីថ្ងៃចន្ទ រដ្ឋាភិបាលចិនបានឲ្យដឹងថា ជំនួបកំពូលរវាងប្រមុខដឹកនាំចិន និងជប៉ុន នឹងមិនអាចកើតមានបានទេ នៅក្រោយពេលដែលលោកស្ហ៊ីនហ្សូ អាបេ នាយករដ្ឋមន្រ្តីជប៉ុន បានធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី កាលពីសប្តាហ៍មុន។ ចំណែកអាល្លឺម៉ង់វិញ បានជំរុញឲ្យជប៉ុនបង្ហាញនូវ “ភាពស្មោះត្រង់” ចំពោះប្រវត្តិសាស្រ្តនៃសង្រ្គាមលោកលើកទី២។
ចុះផ្សាយនៅថ្ងៃ៖
កាលពីសប្តាហ៍មុន ក្រោយពីបានធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី លោកស្ហ៊ីនហ្សូ អាបេ បានបញ្ជាក់សាជាថ្មីម្តងទៀត អំពីជំហររបស់លោក ដែលចង់ជួបជជែកជាមួយមេដឹកនាំចិន ដើម្បីស្វែងរកដំណោះស្រាយបញ្ចប់ភាពតានតឹង។
ក៏ប៉ុន្តែ កាលពីថ្ងៃចន្ទ អ្នកនាំពាក្យក្រសួងការបរទេសចិនបានប្រាប់អ្នកសារព័ត៌មានថា “គឺលោកស្ហ៊ីនហ្សូ អាបេ ខ្លួនឯងផ្ទាល់ ដែលបានបិទផ្លូវចរចាជាមួយចិន ជាពិសេស តាមរយៈការធ្វើដំណើរទៅវិហារយ៉ាស៊ូគូនី ដែលជាកន្លែងបញ្ចុះសពឧក្រិដ្ឋជនសង្រ្គាម” ក្នុងសម័យសង្រ្គាមលោកលើកទី២”។ អ្នកនាំពាក្យរូបនេះបានបញ្ជាក់បន្ថែមថា ប្រជាជនចិនមិនស្វាគមន៍លោកស្ហ៊ីនហ្សូអាបេនោះទេ ដូច្នេះ ប្រមុខដឹកនាំចិនក៏នឹងមិនជួបលោកស្ហ៊ីនហ្សូអាបេដែរ។
គួររំឭកឡើងវិញថា លោកស្ហ៊ីនហ្សូ អាបេ គឺជានាយករដ្ឋមន្រ្តីជប៉ុនទីមួយ រាប់ចាប់តាំងពីឆ្នាំ២០០៦មក ដែលធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី នៅក្នុងពេលកំពុងកាន់តំណែង។ ដំណើរទៅកាន់វិហារយ៉ាស៊ូគូនីរបស់ស្ហ៊ីនហ្សូ អាបេ បានធ្វើឲ្យចិន ក៏ដូចជាកូរ៉េខាងត្បូង ដែលជាប្រទេសធ្លាប់រងការឈ្លានពានពីសំណាក់ប្រទេសជប៉ុនក្នុងសម័យសង្រ្គាមលោក នាំគ្នាផ្ទុះកំហឹង។
កូរ៉េខាងត្បូងទើបនឹងបានប្រកាសដកខ្លួនចេញពីកិច្ចចរចាជាមួយជប៉ុន ស្តីពីកិច្ចសហប្រតិបត្តិការទ្វេភាគី ក្នុងវិស័យការពារជាតិ និងចារកិច្ច ដែលគ្រោងធ្វើ នៅខែមករា ២០១៤ខាងមុខនេះ។
អាល្លឺម៉ង់វិញ ដែលជាអតីតសម្ព័ន្ធមិត្តរបស់ជប៉ុន ក្នុងសម័យសង្រ្គាមលោកលើកទី២ បានលើកឡើងដោយមិនបញ្ចេញចំឈ្មោះប្រទេសជប៉ុនថា គ្រប់ប្រទេសទាំងអស់ត្រូវតែទទួលស្គាល់ដោយស្មោះត្រង់នូវទង្វើរបស់ខ្លួន នៅក្នុងសង្រ្គាមលោកលើកទី២ ដែលជាសម័យកាលដ៏ខ្មៅងងឹតមួយនៃសតវត្សរ៍ទី២០។ មន្រ្តីអ្នកនាំពាក្យរបស់ប្រមុខរដ្ឋាភិបាលអាល្លឺម៉ង់បានថ្លែងបែបនេះ កាលពីថ្ងៃចន្ទ តបទៅនឹងអ្នកសារព័ត៌មានដែលចោទសួរ អំពីការទៅគោរពវិញ្ញានក្ខន្ធនៅវិហារយ៉ាស៊ូគូនីរបស់មេដឹកនាំជប៉ុន។
គួរបញ្ជាក់ថា ជាទូទៅ អាល្លឺម៉ង់តែងតែបង្ហាញនូវមោទនភាព ចំពោះកិច្ចខិតខំប្រឹងប្រែងក្នុងការជួសជុលនូវកំហុសរបស់ខ្លួនពីអតីតកាល គឺនយោបាយឈ្លានពាន និងការកាប់សម្លាប់ជនជាតិជ្វីហ្វអឺរ៉ុបរាប់លាននាក់ កាលពីក្នុងអំឡុងសង្រ្គាមលោកលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ