សារព័ត៌មានផ្លូវការចិន ចង់បញ្ចូលនាយករដ្ឋមន្ត្រីជប៉ុនក្នុងបញ្ជីខ្មៅ
ប្រតិកម្មមានយ៉ាងទាន់ហន់ ក្រោយទស្សនកិច្ចរបស់នាយករដ្ឋមន្ត្រីជប៉ុននៅវិហារ យ៉ាស៊ូគូនី។ គ្រប់សារព័ត៌មានចិនបានបញ្ចេញមតិ និងសំណើជាច្រើន ដើម្បីឆ្លើយតបទៅនឹងទង្វើរបស់លោក ស៊ីនហ្សូ អាបេម្សិលមិញ។ ប្រទេសចិនត្រូវតែចាត់វិធានការសងសឹកតបវិញ ឱ្យបានសក្តិសម ឬឱ្យជ្រុលបន្តិចក៏បាន ប្រឆាំងនឹងទង្វើគ្មានខ្លឹមសាររបស់នាយករដ្ឋមន្ត្រីជប៉ុន ស៊ីនហ្សូ អាបេ ដោយត្រូវចាត់ប្រមុខរដ្ឋាភិបាលរូបនេះ ទៅក្នុងបញ្ជីខ្មៅ ជាមនុស្សមិនគួរឱ្យរាប់អាន។ នេះបើតាមអះអាងរបស់សារព័ត៌មានផ្លូវការចិន ដែលជាទូទៅជាអ្នកពាំពាក្យរបស់បក្សកុម្មុយនិស្តចិន។
ចុះផ្សាយនៅថ្ងៃ៖
ស្តាប់ - ០២:០៧
ប្រតិកម្មពីខាងចិនផ្ទុះឡើងដូចលាជ ! រដ្ឋមន្ត្រីក្រសួងការបរទេសចិនលោក Wang Yi បានថ្កោលទោស ជាផ្លូវការ នាយករដ្ឋមន្ត្រីជប៉ុន ដោយគ្មានបង្អង់ ចំពោះទង្វើគ្មានខ្លឹមសារ ដែលគ្មាននរណាអាចទ្រាំមើលបានឡើយ។ នេះជាអ្វីដែលមានសរសេរចុះផ្សាយនៅទំព័រវិចារណកថាកាសែតចិនជាភាសាអង់គ្លេស The Global Time។
កាសែតនេះ បានប្រើពាក្យធ្ងន់ៗស្នើឱ្យចិន ចាត់បញ្ចូលលោក ស៊ីនហ្សូ អាបេ និងមនុស្សជំនិត (រដ្ឋមន្ត្រីនិងសមាជិកសភា) ទាំងអស់ដែលបានធ្វើដំណើរទៅវិហារយ៉ាស៊ូគូនី ក្នុងឆ្នាំ២០១៣នេះ ទៅក្នុងបញ្ជីខ្មៅ ជាមនុស្សមិនគួរឱ្យរាប់អាន ព្រោះបើមិនប្រើធម៌ក្តៅតបវិញទេ ចិនអាចនឹងត្រូវគេម៉ាក់ងាយថាជាខ្លាក្រដាស។
ចិនត្រូវបិទទ្វារមិនទទួលស្វាគមន៍មនុស្សក្នុងបញ្ជីខ្មៅរយៈពេល៥ឆ្នាំ ពោលគឺប្រទេសទាំងពីរគ្មានឱកាសប៉ះប៉ូវផ្សះផ្សាភាពប្រេះស្រាំនេះបានទេ។ នេះគឺជាមេរៀនសម្រាប់មេដឹកនាំជប៉ុនជំនាន់ក្រោយ។ កាសែតជាភាសាអង់គ្លេសមួយនេះ បានថែមទាំងវាយសំពងធ្ងន់ៗលើជប៉ុន ដោយចង់ចាត់ទុកនាយករដ្ឋមន្ត្រីជប៉ុន ដូចជាពួកភេរវនិយម ពួកហ្វាស៊ីស និងយល់ថាមិត្តភាពចិនជប៉ុនលែងសំខាន់ទៀតហើយ។
កាសែតChina Daily វិញ មិនចង់ឱ្យការប្រមាថរបស់ជប៉ុន មានផលវិបាកត្រឹមតំណាងការទូតទេ តែត្រូវឱ្យចិន និងសហគមន៍អន្តរជាតិទាំងមូល គិតគូរឡើងវិញពីទំនាក់ទំនាក់ជាមួយជប៉ុន ទាំងខាងវិស័យសន្តិសុខ ការទូត និងសេដ្ឋកិច្ច។ កាសែតប្រជាជន កាសែតផ្លូវការបក្ស មានសម្តីស្រទន់ជាងគេបន្តិច ដោយគ្រាន់តែបរិហារទង្វើរបស់លោកស៊ីនហ្សូ អាបេ ថាចង់កន្លងយុត្តិធម៌ប្រវត្តិសាស្ត្រ និងសម្បជញ្ជៈមនុស្សជាតិ ដោយទាមទារឱ្យជប៉ុនរិះគិតឡើងវិញ និងធ្វើការសុំទោសដោយត្រង់ៗកំហុសអតីតកាលរបស់ជប៉ុនលើប្រជាជនរងគ្រោះនៅអាស៊ី។
សូម្បីតែសារព័ត៌មានជប៉ុន នៅក្នុងស្រុក ភាគច្រើន មានជាអាទិ៍ កាសែត Asahi ឬ Nikkei ក៏បានរិះគន់សកម្មភាពរបស់លោកអាបេម្សិលមិញដែរ ព្រោះយល់ថាអាចបង្កឱ្យមានផលវិបាកការទូតខ្លាំង។ មានតែកាសែត Shimbun ជាតិនិយមបំផុតមួយប៉ុណ្ណោះ ដែលបានសរសើរលោកអាបេ ថាបានបំពេញតួនាទីជាប្រមុខដឹកនាំប្រទេសពិតៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ