គួឌីស្ថានប្រកាសធ្វើប្រជាមតិទាមទារឯករាជ្យ ពេលអ៊ីរ៉ាក់មានគ្រោះមហន្តរាយ
ចុះផ្សាយនៅថ្ងៃ៖
ស្តាប់ - ០៦:១២
អ៊ីរ៉ាក់អាចនឹងជោគវាសនាដូចស៊ីរី ! គ្មានមធ្យោបាយអាចត្រលប់បកថយក្រោយបានវិញទេ ! ប្រទេសនេះអាចមានគ្រោះធ្លាក់ក្នុងមហន្តរាយ ! ទាំងនេះគឺជាការព្រមានរបស់បេសកកជនអង្គការសហប្រជាជាតិប្រចាំទីក្រុងបាកដាដ ដែលអំពាវនាវឱ្យអ្នកនយោបាយអ៊ីរ៉ាក់ទាំងអស់ បង្រួបបង្រួមគ្នាជាធ្លុងមួយ ធិបចោលប្រយោជន៍និងមហិច្ឆតាផ្ទាល់ខ្លួន។ ក្នុងពេលដែល អ៊ីរ៉ាក់ កំពុងស្ថិតលើមាត់ជ្រោះនៃការប្រេះឆា តំបន់គៀរឌីស្តង់វិញ ឆ្លៀតប្រកាសធ្វើប្រជាមតិ ស្តីពីឯករាជ្យតំបន់ស្វយ័តគៀរឌីស្តង់ ផ្តាច់ខ្លួនពីអ៊ីរ៉ាក់ មិនខ្វល់នឹងការអំពាវនាវបង្រួមបង្រួមជាតិ។
តំបន់គួឌីស្ថានចង់បំបែកខ្លួនចេញ ពួកជីហាតរដ្ឋអ៊ីស្លាមឡើងកម្លាំង រុលទៅមុខដណ្តើមបានទីតាំងបន្ថែមឥតឈប់ឈរ អ៊ីរ៉ាក់កំពុងប្រឈមនឹងគ្រោះផ្ទុះបែកខ្ញែកជាចំរៀកៗ កាន់តែខ្លាំងឡើងៗ។
តាំងពីពួកជីហាតអ៊ីស្លាម “រដ្ឋអ៊ីស្លាម" ដណ្តើមគ្រប់គ្រងតំបន់ជាច្រើនរបស់អ៊ីរ៉ាក់មក ពាក្យថាឯករាជ្យបានរស់រវើកឡើងវិញក្នុងតំបន់ស្វយ័តគួឌីស្ថាន។ ម្សិលមិញ មេដឹកនាំតំបន់គួឌីស្ថាន បានប្រកាសជាសាធារណៈចង់រៀបចំប្រជាមតិស្តីពីការផ្តាច់ខ្លួនចេញពីអ៊ីរ៉ាក់។
សម្រាប់ជនជាតិគួឌីស្ថាននៅអ៊ីរ៉ាក់ ខែមិថុនាកន្លងទៅនេះជាខែប្រកបដោយអត្ថន័យ បែងចែកប្រវត្តិសាស្ត្រជាពីរ គឺពេលមុន និងពេលក្រោយ មិថុនា ២០១៤។ ក្នុងពេលដែលពួកជីហាតរុលទៅមុខយ៉ាងសន្ធោសន្ធៅ ដណ្តើមគ្រប់គ្រងទឹកដីជាបន្តបន្ទាប់ រហូតដល់ប្រកាសបង្កើតដែនដីកាលីហ្វារដ្ឋអ៊ីស្លាម ឯកងទ័ពអ៊ីរ៉ាក់វិញ ដកថយជាលំដាប់មែន ប៉ុន្តែកងទ័ពគួឌីស្ថាន (Peshmergas) វិញ បានពន្លាតតំបន់កាន់កាប់ រហូតដល់ ក្រុង Kirkouk។ ក្រុងដែលជាជង្រុកប្រេងដ៏សំខាន់ និងដែលគួឌីស្ថាន ទាមទាររាប់បញ្ចូលក្នុងតំបន់ស្វយ័តរបស់ខ្លួនតាំងដើមមក តែអំណាចកណ្តាលបាកដាដមិនព្រម។
►សូមអាន ៖ តំបន់ស្វយ័ត គួឌីស្ថានឆ្លៀតផ្តាច់ទឹកដីពីអ៊ីរ៉ាក់
ពីមុនមកគួឌីស្ថាន មិនដែលនឹកនានិយាយអំពីឯករាជ្យទេ ទើបតែនៅពេលយកឈ្នះលើពួកជីហាត ដណ្តើមបានក្រុង គៀរគូក ក្តីស្រមៃឃើញគួឌីស្ថានឯករាជ្យ បានផុសឡើង។ ហើយម្សិលមិញជាលើកទីមួយ នៅចំពោះមុខសភាតំបន់ មេដឹកនាំគួឌីស្ថាន លោកម៉ាស៊ូដ បារហ្សានី បានស្នើសុំសភាឱ្យរៀបចំប្រជាមតិស្តីពីការចង់ផ្តាច់ខ្លួនចេញពីអ៊ីរ៉ាក់ មកធ្វើជារដ្ឋឯករាជ្យ។
សូមបញ្ជាក់ថា តំបន់គួឌីស្ថាន ជាតំបន់ស្វយ័តរបស់អ៊ីរ៉ាក់ មានទីតាំងភូមិសាស្ត្រនៅភាគខាងជើងប្រទេស។ តំបន់ស្វយ័តនេះ មានរដ្ឋាភិបាល មានរដ្ឋមន្ត្រី មានរចនាសម្ព័ន្ធ និងប្រមុខដឹកនាំប្រទេស សភា និងកងទ័ពជាតិ ក្នុងទម្រង់បែបបទដំណើរការដូចប្រទេស ឬរដ្ឋឯករាជ្យមួយយ៉ាងដូច្នេះ គ្រាន់តែមានជាប់ឈ្មោះថាជាតំបន់ស្វយ័តរបស់ប្រទេសអ៊ីរ៉ាក់។
ពុំទាន់មានទេ កាលបរិច្ឆេទនៃការធ្វើប្រជាមតិនេះ ប៉ុន្តែជនជាតិគួឌីស្ថាន កំពុងបោះជំហានទៅរកឯករាជ្យកាន់ច្បាស់ ដោយរបៀបឆក់ឱកាស ក្នុងខណៈដែលអ៊ីរ៉ាក់ ជាប្រទេសមេ កំពុងដុនដាប ប្រឈមនឹងគ្រោះមហន្តរាយប្រេះឆា បែកខ្ញែក និងធ្លាក់ក្នុងជ្រោះសង្គ្រាមស៊ីវិល។ ម្យ៉ាងទៀត ថ្វីដ្បិតតែគួឌីស្ថាន ស្វយ័ត អាចដំណើរការបានរហូតមកមែន ប៉ុន្តែស្លាកស្នាមសង្គ្រាមមិនទាន់ជ្រះស្រឡះទេ។ ផ្ទៃក្នុងគួឌីស្ថានសព្វថ្ងៃនៅមានចរន្តនយោបាយពីរ (បក្សប្រជាធិបតេយ្យគួឌីស្ថាន និងបក្សស្នេហាមាតុភូមិរួបរួមគួឌីស្ថាន)ប្រកួតប្រជែងគ្នា ដោយត្រកូលពីរ ដែលត្រូវគ្នាតែសម្បកក្រៅប៉ុណ្ណោះ។
អាមេរិកមិនស្វាគមន៍ការធ្វើប្រជាមិតស្តីពីឯករាជ្យតំបន់គួឌីស្ថាន
មូលហេតុដំបូងនៃការប្រឆាំងនឹងគំនិតចង់ធ្វើប្រជាមតិនៅគួឌីស្ថាន គឺពិតថា ដើម្បីរក្សាជំហរ ឱ្យមានស្ថិរភាព ! នៅអ៊ីរ៉ាក់ ជម្លោះអន្តរសហគមន៍ រវាងអ្នកមាននិកាយឈីអ៊ីត ស៊ុននីត មានរ៉ាំរ៉ៃតាំងពីមុនការងើបឡើងរបស់ពួកជីហាតរដ្ឋអ៊ីស្លាមទៅទៀត ស្ទើរប្រេះប្រទេសជាចំណែកទៅហើយ។ ឥលូវបន្ថែម ការចង់ផ្តាច់ខ្លួនរបស់សហគមន៍គួឌីស្ថានទៀត ដូច្នេះសេណារីយោ នៃការបែកខ្ញែកប្រទេសហាក់ដូចជាបាននិងកំពុងចាប់ផ្តើមគូសវាសដូច្នោះ។
បើគួឌីស្ថានបានឯករាជ្យ នោះតំបន់ដើមបូព៌ាទាំងមូលត្រូវជាប់ពាក់ព័ន្ធ ជាមួយ។ ផលវិបាកអាចនឹងមានច្រើន រាលដាលដល់ប្រទេសផ្សេងទៀត ក្នុងតំបន់ ដែលមានប្រជាជនដើមកំណើតគួឌីស្ថានរស់នៅ។ ប្រទេសទាំងនោះ មានជាអាទិ៍ប្រទេស ស៊ីរី តួកគី និងអ៊ីរ៉ង់។ ហើយមួយក្រុមៗ មានប្រវត្តិរៀងៗខ្លួនដែលពិតជានឹងបង្កភាពស្មុគស្មាញយ៉ាងខ្លាំង។
អ៊ីចឹងហើយបានជាសហរដ្ឋអាមេរិក ត្រូវតែប្រកាសភ្លាម ប្រឆាំងនឹងគំនិតធ្វើប្រជាមតិនេះ ដោយពន្យល់ថា អ៊ីរ៉ាក់ខ្លាំងដរាបណាអ៊ីរ៉ាក់រួមគ្នាជាធ្លុងមួយ។ ហើយអាមេរិកគាំទ្រអ៊ីរ៉ាក់កន្លងមកគឺដើម្បីបានឃើញអ៊ីរ៉ាក់ប្រជាធិបតេយ្យ ពហុបក្ស និងការរួបរួមគ្នា។ អាមេរិកនៅតែរក្សាជំហរជានិច្ច បង្ខំឱ្យអ៊ីរ៉ាក់បង្កើតរដ្ឋាភិបាលបង្រួបបង្រួមជាតិ ដែលមានតំណាងរដ្ឋាភិបាលមកពីគ្រប់ជនជាតិ។
តាំងពីបោះឆ្នោតថ្ងៃទី ៣០មេសាមក អ៊ីរ៉ាក់ទើបតែនឹងអាចបើកប្រជុំសភាជាលើកដំបូងកាលពីថ្ងៃអង្គារ ដើម្បីរៀបចំបង្កើតរដ្ឋាភិបាល ប៉ុន្តែសូម្បីតែជ្រើសតាំងប្រធានសភាក៏ធ្វើមិនបានផង។ ហេតុដូច្នេះហើយបានជា គ្រប់គ្នាមើលឃើញគ្រោះខ្មៅងងឹតរបស់អ៊ីរ៉ាក់។ បេសកកជនអង្គការសហប្រជាជាតិ ទទួលកិច្ចការ បានថែមទាំងព្រមានថា អ៊ីរ៉ាក់អាចនឹងមានជីវិតដូចស៊ីរី ប្រសិនបើអ្នកនយោបាយគ្រប់ជាន់ថ្នាក់ គ្រប់ជនជាតិ មិនព្រមរួបរួមជាធ្លុងមួយជាមួយរដ្ឋាភិបាលតែមួយទេនោះ។
ការបង្រួបបង្រួមជាតិជាការចាំបាច់ ព្រោះ បើតាមក្រសួងការពារជាតិ អាមេរិក កងទ័ពអ៊ីរ៉ាក់ មានសមត្ថភាពត្រឹមទប់ការពារក្រុងបាកដាដ ប៉ុន្តែមិនអាចប្រយុទ្ធតស៊ូ ដណ្តើមយកមកវិញតំបន់ដែលពួកអ៊ីស្លាមជីហាតវាយបាននោះទេ។ កងកម្លាំងពិសេសអាមេរិកកំពុងសិក្សាប្រមូលព័ត៌មានដើម្បីអាចវាយតម្លៃស្ថានការណ៍ជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ