នៅទីបំផុតប្រទេសរុស្ស៊ីមានរដ្ឋាភិបាលថ្មី
ឈ្មោះសមាជិកគណៈរដ្ឋមន្ត្រីថ្មីត្រូវបានប្រកាសរសៀលម្សិលមិញ មួយម្តងៗដោយលោកប្រធានាធិបតីពូទីនផ្ទាល់ បន្ទាប់ពីគាត់បានចេញក្រិត្យអនុម័តដាច់ស្រេចជាស្ថាពរ ទៅលើទ្រង់ទ្រាយនិងសមាសភាពរដ្ឋាភិបាលថ្មីនេះ ដែលស្នើដោយលោកនាយករដ្ឋមន្ត្រី មេដវេដេវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
រដ្ឋាភិបាលលើកនេះ ជារដ្ឋាភិបាលទី១២ក្នុងប្រវត្តិថ្មីរបស់រុស្ស៊ី គិតពីឆ្នាំ១៩៩០មក កាលដែលមានចេញ “សេចក្តីប្រកាសស្តីអំពី អធិបតេយ្យរដ្ឋរុស្ស៊ី”។ រដ្ឋាភិបាលលើកនេះ បើប្រៀបទៅនឹងលើកមុន គឺមានសមាសភាពថ្មីដល់ទៅ៧៥%។
ឝណៈរដ្ឋមន្ត្រីថ្មីមានឧបនាយករដ្ឋមន្ត្រីចំនួន៧នាក់ដូចមុនដដែល ប៉ុន្តែពីក្នុងនោះ មានតែម្នាក់ប៉ុណ្ណោះជាឧបទី១ ខុសពីលើកមុន ដែលមានដល់ទៅ២នាក់។
ពីក្នុងចំណោម ១៨ក្រសួងដែលធ្លាប់មានពីមុនគឺមានតែ៥ក្រសួងប៉ុណ្ណោះ ដែលនៅបន្តដឹកនាំដោយរដ្ឋមន្ត្រីចាស់ជាបឋម គឺរដ្ឋមន្ត្រីការបរទេស លោក Serguei Lavrov និង រដ្ឋមន្ត្រីការពារជាតិលោក Anatoly Serdiukov ដែលតាមមតិអ្នកវិភាគខ្លះ គឺដើម្បីធានាជាអាទិ៍ នូវនិរន្តភាពខាងធ្វើកិច្ចចរចា ជាមួយទីក្រុងវ៉ាស៊ីនតោនជុំវិញបញ្ហា “ប្រព័ន្ធខែលមីស្ស៊ីលប្រឆាំងមីស្ស៊ីល” ដែលអាមេរិក បន្តដំឡើងនៅទ្វីបអឺរ៉ុបប្រព័ន្ធដែលតាមម៉ូស្គូ គឺ គំរាមដល់សន្តិសុខជាតិរុស្ស៊ី។
នៅរក្សាតំណែងខ្លួនក៏ទាំងរដ្ឋមន្ត្រីក្រសួងហិរញ្ញវត្ថុ ក្រសួងយុត្តិធម៌ និងក្រសួងកីឡា ក្រសួងដែលត្រូវបំពេញតទៅទៀត កិច្ចការខាងរៀបចំទទួល “ល្បែងកីឡាអូឡាំពិករដូវត្រជាក់” នៅបុរី Sochi ក្នុងឆ្នាំ ២០១៤ខាងមុខ។
ខាងទ្រង់ទ្រាយវិញ “ក្រសួងសុខាភិបាលនិងអភិវឌ្ឍន៍សង្គម” ដែលធ្លាប់មានពីមុន ឥឡូវបំបែកទៅជា “ក្រសួងសុខាភិបាល” និង“ក្រសួងពលកម្មនិងការពារសង្គម”។ មិនតែប៉ុណ្ណោះ មានបង្កើតឡើងជាក្រសួងថ្មី ”ក្រសួងអភិវឌ្ឍន៍តំបន់ចុងបូព៌ា” និងតំណែងថ្មី ជា” រដ្ឋមន្ត្រីខាងទំនាក់ទំនងជាមួយរដ្ឋាភិបាលចំហ” ។ រដ្ឋាភិបាលចំហនេះ ជា”ក្រុមប្រឹក្សាជំនាញការ” ខាងបំផុសបំផុលបរិយាកាស Business ក្នុងប្រទេស។ ការរុះរើបានបង្កើនចំនួនក្រសួងក្នុងរដ្ឋាភិបាលឲ្យឡើងដល់២១ពីក្នុងនោះ ១៦ គឺដឹកនាំ ដោយឈ្មោះថ្មីៗដែលភាគច្រើន ធ្លាប់ធ្វើជាអនុរដ្ឋមន្ត្រីនៃរដ្ឋាភិបាលជំនាន់លោកពូទីនទេតើ ម៉្លោះហើយបានជាកាសែតលេខថ្ងៃនេះ នាំគ្នាហៅ រដ្ឋាភិបាលលោកមេដវេដេវថាជា “រដ្ឋាភិបាលនៃអនុរដ្ឋមន្ត្រី” ដែលតាមមើលទៅនឹងស្ថិតនៅក្រោមការត្រួតពិនិត្យពីខាងវិមានក្រេមឡាំងដ្បិតអតីតរដ្ឋមន្ត្រីមួយចំនួនធំថ្ងៃនេះ ត្រូវលោកប្រធានាធិបតីពូទីនតែងតាំងជាទីប្រឹក្សា និងជំនួយការ របស់គាត់តែម្តង។
គួរនិយាយថា ក្នុងរដ្ឋាភិបាលលោកមេដវេដេវ ដែលមានសមាជិកសរុបទៅ ចំនួន២៩នាក់ មានភេទស្រីតែ២នាក់ប៉ុណ្ណោះ ហើយមានវ័យក្មេងជាងគេ អាយុទើប ២៩ឆ្នាំ គឺរដ្ឋមន្ត្រី ក្រសួងទូរគមនាគមន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ