កម្មករម្នាក់ត្រូវបានលោកពូទីនតែងតាំងជាតំណាងនៃអំណាចគាត់
រឿងដែលគួរឲ្យភ្ញាក់ផ្អើលនៅរុស្ស៊ីគឺលោកប្រធានាធិបតីពូទីនទើបតែងតាំងកម្មករម្នាក់នៃរោងចក្រខាងផលិតទូរទេះភ្លើងឲ្យធ្វើជាតំណាងពេញសមត្ថភាពរបស់គាត់ប្រចាំ“ភូម៌ភាគតំបន់ភ្នំអ៊ូរ៉ាលនៃសហព័ន្ធរុស្ស៊ី” បានន័យថាសម្រាប់ត្រួតលើសកម្មភាពអភិបាលខេត្តចំនួនដល់ទៅ៦ដែលស្ថិតនៅក្នុងភូម៌ភាគនេះ។
ចុះផ្សាយនៅថ្ងៃ៖
ស្តាប់ - ០២:៤៣
កម្មករនេះឈ្មោះ Igor Holmanskix ជាប្រធានកម្មករមួយក្រុមនៃរោងចក្រខាងផលិតទូរទេះភ្លើងនៅតំបន់ភ្នំអ៊ូរ៉ាល់។ ឈ្មោះគាត់ ត្រូវគេចាប់ផ្តើមស្គាល់នៅតាមច្រកល្ហកប្លែកៗនៃប្រទេសរុស្ស៊ីកាលពីថ្ងៃ២១ធ្នូឆ្នាំមុនពេលដែលលោកពូទីន កាលណោះនៅជានាយករដ្ឋមន្ត្រី នៅឡើយ បានធ្វើអន្តរាគមន៍ឆ្លើយតបនឹងសំណួរចោទដោយប្រជាជនតាមរយៈស្ពានទូរទស្សន៍តភ្ជាប់ពីរដ្ឋធានីម៉ូស្គូទៅកាន់ទីប្រជុំជននានាតាំងពីចុងបូព៌ា រហូតដល់ប៉ែកខាងលិចបង្អស់នៃប្រទេស។
លុះស្ពានទូរទស្សន៍ រំកិលដល់ រោងចក្រនោះ ដែលស្ថិតនៅចម្ងាយ ប្រមាណ ១.៨០០គ.ម. ខាងកើតពីម៉ូស្គូ កម្មករ Igor Holmanskix ក៏បានកាន់មេក្រូ សំដែងការគាំទ្រឥតសំចៃឡើយ ដល់បន្ទាត់នយោបាយលោក ពូទីន ដែលចេះធានាឲ្យមានស្ថិរភាពក្នុងប្រទេសដោយថ្លែងថា៖ “បើប៉ូលីស នៅម៉ូស្គូអសមត្ថភាព នោះខ្ញុំនឹងកេណ្ឌ ពួកប្រុសៗ កម្មករគ្នីគ្នាខ្ញុំទៅបង្ក្រាបឲ្យលឹបទៅរលកមីទ្ទិញតវ៉ាទល់នឹងលទ្ធផលនៃការបោះឆ្នោតសភាដែលបោកបក់គ្មានឈប់ រំខានដល់ស្ថិរភាពសង្គម។ ប៉ុន្តែការបង្ក្រាបនេះ នឹងប្រព្រឹត្តទៅ គឺតែក្នុងបរិវេណច្បាប់ប៉ុណ្ណោះ”។
តាមដែលកាសែតរុស្ស៊ីលេខថ្ងៃនេះ ចេញផ្សាយព្រោងព្រាត ពិតជាពាក្យថ្លែងខាងលើតែម្តង ដែលរំលេចឲ្យឃើញពីឧបការគុណវណ្ណៈកម្មករ ដែលស្មោះស្ម័គ្រនឹង មាគ៌ាប្រកាន់យកដោយថ្នាក់ដឹកនាំរុស្ស៊ីបច្ចុប្បន្ន។
មិនមែនចៃដន្យទេ ដែលក្រោយពីឡើងជាប្រធានាធិបតីរុស្ស៊ីវិញ លោកពូទីន បានធ្វើដំណើរមិនមែនទៅកាន់រដ្ឋបរទេសណាឡើយ តែគឺទៅសាកសួរសុខទុក្ខ កម្មកររោងចក្រនោះតែម្តង។
ពេលទទួលជួបកម្មករ Igor Holmanskix នៅវិមានក្រេមឡាំង ដោយប្រកាសអំពីការតែងតាំងគាត់ជាតំណាងពេញសមត្ថភាព របស់ប្រធានាធិបតីប្រចាំ “ភូម៌ភាគតំបន់ភ្នំអ៊ូរ៉ាលនៃសហព័ន្ធរុស្ស៊ី” លោកពូទីនសង្កត់ធ្ងន់ថា ពិតជាកម្មករបែបនេះ ដែលយល់ដឹងអំពីដង្ហើមរស់នៅ របស់ អ្នកស្រុក ច្បាស់ជាងគេ។
ជាការរំលឹកដែនដីសហព័ន្ធរុស្ស៊ីដែលមានខេត្តចំណុះដល់ទៅ ៨៣ ខេត្ត ស្របនឹងក្រិត្យ ចេញដោយលោកពូទីន តាំងពីឆ្នាំ២០០០ម៉្លេះ ជំនាន់គាត់ធ្វើជា ប្រធានាធិបតីអាណត្តិទី១ គឺបែងចែកទៅជា ៨ភូម៌ភាគបែបយ៉ាង ភូម៌ភាគចុងបូព៌ា ភូម៌ភាគកណ្តាល ភូម៌ភាគឧត្តរ ភូម៌ភាគ ទក្សិណជាដើម។
រីឯ “ភូម៌ភាគតំបន់ភ្នំអ៊ូរ៉ាលនៃសហព័ន្ធរុស្ស៊ី” គឺរួមក្តោបខេត្តចំនួ៦។ ស្របនឹង ភាពបញ្ឈរនៃអំណាចនៅរុស្ស៊ី អភិបាលខេត្តទាំង៦នោះ ត្រូវស្ថិតនៅក្រោមការគ្រប់គ្រងនិងការត្រួតពិនិត្យរបស់អតីតកម្មករ Igor Holmanskix ដែលត្រូវរាយការណ៍ជូនតែលោក ប្រធានាធិបតីពូទីន ផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ