លោក Bill Clinton មកជួយគាំទ្រលោកអូបាម៉ា
អតីតប្រធានាធិបតីអាមេរិក លោក Bill Clinton ដែលមកជួយគាំទ្រលោកអូបាម៉ា បានទទួលការស្វាគមន៍យ៉ាងសែនកក់ក្តៅ នាឱកាសសមាជជាតិនៃបក្សប្រជាធិបតេយ្យនៅទីក្រុងឆារឡុតនៅយប់ថ្ងៃពុធម្សិលមិញ។ សមាជជាតិនៃបក្សប្រជាធិបតេយ្យដែលត្រូវប្រកាសតែងតាំងលោកអូបាម៉ាជាបេក្ខជនប្រធានាធិបតីសម្រាប់ចូលប្រកួតប្រជែងនៅខែវិច្ឆិកាខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៥១
អតីតប្រធានាធិបតីអាមេរិក លោក Bill Clinton មានអាយុ៦៦ឆ្នាំ លោកនៅតែមានប្រជាប្រិយភាពយ៉ាងខ្ពស់ត្រដែតដដែលនៅសហរដ្ឋអាមេរិក។ ជាថ្មីម្តងទៀត លោក Bill Clinton បានបង្ហាញឲ្យឃើញថា លោកពិតជា “វាគ្មិនម្នាក់ដ៏ឆ្នើមគ្មានពីរ”។ នៅចំពោះមុខសកម្មជននៃបក្សប្រជាធិបតេយ្យ លោកបានថ្លែងសំណេះសំណាលសើចលេងផង លោកបានផងទៀតធ្វើការវាយប្រហារយ៉ាងប៉ិនប្រសប់ទៅលើបេក្ខជនប្រធានាធិបតីនៃបក្សសាធារណរដ្ឋ លោក Mitt Romney ហើយនិងទៅលើបេក្ខជនអនុប្រធានាធិបតី លោក Paul Ryan។
“ខ្ញុំសូមគោរពបុរសម្នាក់ដែលមានចរិតស្លូតបូតបែបត្រជាក់ បើគេមើលពីខាងក្រៅ ប៉ុន្តែនៅខាងក្នុងវិញ គឺក្តៅពុះកញ្ជ្រោលសម្រាប់អាមេរិក បុរសនោះគឺ បារ៉ាក់អូបាម៉ា”។ នេះជាការថ្លែងប្រកាសរបស់អតីតប្រធានាធិបតីអាមេរិក លោក Bill Clinton ។
បន្ទាប់មក លោក Bill Clinton បានបំពេញកិច្ចការដែលលោកស្រីមីឆែល អូបាម៉ាពុំបានធ្វើកាលពិម្សិលមិញ គឺការវាយប្រហារទៅលើ បេក្ខជនប្រធានាធិបតីនៃបក្សសាធារណរដ្ឋ លោក Mitt Romney ។ លោកគ្លីនតុនបានរៀបរាប់ពីទង្វើខាឃាំងរបស់គណបក្សសាធារណរដ្ឋ ធ្វើឲ្យផែនការជំរុញឲ្យមានសន្ទុះកំណើនសេដ្ឋកិច្ចនិងការបង្កើតការងាររបស់លោកអូបាម៉ាជួបនឹងឧបសគ្គ។ លោកគ្លីនតុនបានរំលឹកប្រាប់ទៀតថា លោកបារ៉ាក់អូបាម៉ាបានបង្កើតឲ្យមានការងារប្រមាន “៤លាន៥សែនកន្លែង”ជូនប្រជាជនអាមេរិក រីឯគណបក្សសាធារណរដ្ឋវិញគឺ “សូន្យ”។ ទាំងនេះ បានបណ្តាលឲ្យសាធារណជននាំគ្នាទះដៃយ៉ាងគគ្រឹកគគ្រេង។
ងាកមកធ្វើការគោរពស្វាគមន៍កិច្ចការនិងជោគជ័យដ៏ធំធេងដែលបានបំពេញដោយបច្ចុប្បន្នប្រធានាធបតីបារ៉ាក់អូបាម៉ាវិញម្តង លោកគ្លីនតុនបានថ្លែងថា “គ្មានប្រធានាធិបតីណាមួយឡើយដែលអាចជួសជុលការខូចខាតដែលបន្សល់ទុកឲ្យដោយគណបក្សសាធារណរដ្ឋក្នុងរយៈពេលតែបួនឆ្នាំបែបនេះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ