ពួកទាហានទៅពីបេឡារុសធ្វើជាទីប្រឹក្សាស៊ីឈ្នួលឲ្យកងទ័ពកាដាហ្វ៊ី
ដំណឹងគួរឲ្យភ្ញាក់ផ្អើលនេះ ទើបចុះផ្សាយដោយកាសែតក្រុងម៉ូស្គូ ឈ្មោះ Komsomolskaya Pravda យោងទៅលើតឹកតាងបង្ហាញដោយ យោធាស៊ីឈ្នួលបែបនេះម្នាក់ ឈ្មោះ Mikhail ដែលថា ប្រាក់ខែរបស់គាត់ គឺ ៣.០០០ដុល្លារ ក្នុង១ខែ។ គេយោងផងដែរទៅលើសំដីអនុព័ន្ធយោធានៃស្ថានទូត បេឡារុស ប្រចាំនៅក្រុងទ្រីប៉ូលី លោក Igor Kachugin ដែលលំអិតថា ពួក អ្នកឯកទេសយោធាទាំងនោះបានចុះកិច្ចសន្យាមានលក្ខណៈឯកជន ដោយផ្ទាល់ខ្លួនគេ ជាមួយរដ្ឋាភិបាលលីប៊ី និងគ្មានជាប់ទាក់ទងអ្វីនឹងរដ្ឋបេឡារុសឡើយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់កែវ ឆាយាពីទីក្រុងម៉ូស្គូ
ស្របនឹងតឹកតាងបង្ហាញដោយ យោធាស៊ីឈ្នួលឈ្មោះ Mikhail នោះ បច្ចុប្បន្ននេះ ពួកនាយទាហាន បេឡារុស-ដែលបម្រើការតាមផ្លូវឯកជន ជាទីប្រឹក្សារបស់កងទ័ពKadhafi មានគ្នារាប់រយនាក់។ គេឥតចូលរួមច្បាំង ក្នុងយុទ្ធនាការផ្ទាល់ឡើយ។ គេមានវត្តមាននៅតាមខ្សែសមរភូមិមុខ គ្រាន់តែដើម្បីជួយឲ្យយោបល់។ ពួកគេទទួលក្នុង១ខែ គឺប្រាក់ឈ្នួល ៣ពាន់ ដុល្លារអាមេរិក។ ពួកគេជាច្រើន ធ្លាប់មានបទពិសោធន៍ ពីសង្គ្រាម នៅ អាហ្វហ្កានីស្ថាន ធ្លាប់បានបម្រើការនៅតាមអង្គភាពឆើតៗនៃក្រសួងការពារជាតិ បេឡារុស និងធ្លាប់ទទួលការហ្វឹកហាត់នៅមូលដ្ឋានទ័ពពិសេសរបស់រុស្ស៊ី។
មូលហេតុដែលញ៉ាំងកាសែតរុស្ស៊ី Komsomolskaya Pravdaឲ្យគិតថា ក្នុងកងទ័ព កាដាហ្វ៊ី ច្បាស់ជាមាន ពួកអ្នកឯកទេសយោធា ទៅពីអតីតសហភាពសូវៀត ជួយទូន្មានអំពីវិធីច្បាំង គឺមកពី ពីកងទ័ពកាដាហ្វ៊ីនេះនៅតែមានសមត្ថភាពប្រយុទ្ធយ៉ាងក្លៀវក្លាដដែល ទោះបីរងនូវ ការវាយប្រហារគ្មានប្រណីពីខាងកងកម្លាំងអូតង់ក្តី។
ពួកទីប្រឹក្សា បេឡារុស-ដែលប្រទេសគេ ក្នុងសម័យសង្គ្រាមច្បាំងទល់នឹងរបបហ៊ីត្លែរ អាល្លឺម៉ង់ បានប្រែយុទ្ធវិធីច្បាំងទៅជាទ័ពព្រៃ Maquisនោះ បានណែនាំ ពួកទាហានកាដាហ្វ៊ី ឲ្យបោះបង់ទៅ រថក្រោះធំសំពីងសំពោងដែលក្លាយជាស៊ីប្លយ៉ាងងាយនៃកងអាកាសអូតង់ ហើយឆ្លងទៅប្រើរថយន្តJeep ដូចទ័ពពួកបះបោរប្រឆាំងកាដាហ្វ៊ី។ អ៊ីចឹងគឺងាយចល័តងាយបត់បែន ងាយលាក់ខ្លួន ហើយបំភាន់ភ្នែកកងកម្លាំងអន្តរជាតិ ឲ្យច្រឡំវាយខុសទីដៅ។
កាសែតរុស្ស៊ីក៏រំលឹកដែរថា តាំងពីចុងខែកុម្ភៈម៉្លេះ មានលេចឭទៅហើយដំណឹងដែលថា ពួកយោធាស៊ីឈ្នួលទៅពី បេឡារុសបានសម្លាប់មិនស្ទើរទេ ពួកបះបោរនៅលីប៊ី។ កាលណោះជាតិបរទេសដែលចេះដកខ្លួនចេញផុតពីលីប៊ី នាំគ្នាដំណាលថា ច្បាំងនៅខាងកាដាហ្វ៊ី គឺមានយោធា ទៅពីអឺរ៉ុបខាងកើត បែបយ៉ាង ទៅពីអ៊ុយក្រែន ស៊ែប៊ី បេឡារុស និងរូម៉ានី។ ប៉ុន្តែភ្លាមនោះ រដ្ឋាភិបាល អ៊ុយក្រែន ស៊ែប៊ី និងរូម៉ានីបានថ្លែងបដិសេធដាច់អហង្កា។
កាសែត Komsomolskaya Pravdaក៏ចុះផ្សាយដែរថា បច្ចុប្បន្ន រដ្ឋធានី បេឡារុស កំពុងដំណើរការ “ទីផ្សារការងារ” សម្រាប់ពួកយោធាចូល Retraite ដែលត្រៀមទៅបម្រើការយោធានៅប្រទេស វេណេហ្ស៊ុយអេឡា កូតឌីវ័រ ឬលីប៊ី។
កាសែតរុស្ស៊ីបញ្ចប់សេចក្តីថា ទោះបីកងអាកាសអូតង់ កំទេច សក្តានុពល កងទ័ពកាដាហ្វ៊ី អស់១/៣ក្តី ក៏កងទ័ពនេះនៅសល់កងពលឆើតៗចំនួន ៣កង មានយោធា ២០.០០០នាក់ ក្រោមការដឹកនាំរបស់កូនប្រុស Kadhafiដែលត្រៀមច្បាំងយ៉ាងយូរ តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ