សាលារាជធានីចោទបក្សប្រឆាំងថា ធ្វើបាតុកម្មមិនគោរពតាមស្មារតីកិច្ចប្រជុំ
ភ្លាមៗក្រោយបាតុកម្មថ្ងៃទី១៥ធ្នូរបស់គណបក្សប្រឆាំងបានបិទបញ្ចប់ សាលារាជធានីភ្នំពេញ បានផ្ញើលិខិតមួយជូនប្រធានគណបក្សសង្គ្រោះជាតិ។ ជាលិខិតសម្ដែងការសោកស្ដាយ ចំពោះសកម្មភាពរបស់បក្សប្រឆាំង ដែលសាលារាជធានីអះអាងថា មិនគោរពតាមស្មារតីនៃកិច្ចប្រជុំរវាងសាលារាជធានី និងតំណាងគណបក្សសង្គ្រោះជាតិ។ គណបក្សប្រឆាំងវិញ អះអាងថា ខ្លួនមានសិទ្ធិសេរីភាពពេញលេញក្នុងការបញ្ចេញមតិ ដោយបានជូនដំណឹងទៅសាលារាជធានីភ្នំពេញត្រឹមត្រូវតាមច្បាប់រួចហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
លិខិតរបស់សាលារាជធានីភ្នំពេញ ចុះថ្ងៃទី១៥ធ្នូ ចោទប្រកាន់ការធ្វើបាតុកម្មរបស់គណបក្សសង្គ្រោះជាតិនៅថ្ងៃដដែលនេះ ថាបានរំលោភបំពានទៅលើស្មារតីនៃកិច្ចប្រជុំរវាងសាលារាជធានី និងតំណាងគណបក្សសង្គ្រោះជាតិ។ សាលារាជធានីបានលើកឡើងថា គណបក្សសង្គ្រោះជាតិ បានស្នើសុំធ្វើការសម្ដែងមតិ តាមរយៈការធ្វើបាតុកម្មអហិង្សារយៈពេលមួយថ្ងៃ គឺនៅថ្ងៃទី១៥ធ្នូ ចាប់ពីម៉ោង៦ព្រឹក ដល់ម៉ោង៦ល្ងាច។
តែជាក់ស្ដែង សាលារាជធានីសង្កេតឃើញថា មានការហែក្បួនខុសពីលិខិតអនុញ្ញាតនិងស្មារតីកិច្ចប្រជុំ។ ជាងនេះទៅទៀត បើតាមសាលារាជធានី គណបក្សប្រឆាំងមិនបញ្ចប់ការធ្វើបាតុកម្មតាមច្បាប់កំណត់ ព្រមទាំងបន្តស្នាក់នៅលើទីលានប្រជាធិបតេយ្យដោយគ្មានការអនុញ្ញាត។ ទង្វើខុសឆ្គងរបស់បក្សសង្គ្រោះជាតិមួយទៀតនោះគឺ ប្រកាសបន្តធ្វើបាតុកម្ម នៅថ្ងៃទី១៦ធ្នូ ដោយគ្មានការជូនដំណឹងមកអាជ្ញាធរមានសមត្ថកិច្ច។
ឆ្លើយតបនឹងការចោទប្រកាន់នេះ លោក យ៉ែម បុញ្ញាឫទ្ធិ មន្ដ្រីជាន់ខ្ពស់គណបក្សសង្គ្រោះជាតិ បានអះអាងថា ខ្លួនមានសិទ្ធិសេរីភាពពេញលេញក្នុងការបញ្ចេញមតិ។ លោកគូសបញ្ជាក់ថា ច្បាប់តម្រូវឲ្យជូនដំណឹងអំពីការសម្ដែងមតិ មិនមែនសុំអនុញ្ញាតនោះទេ។ ហើយគណបក្សសង្គ្រោះជាតិរបស់លោក ក៏បានជូនដំណឹងអំពីការធ្វើបាតុកម្មថ្ងៃទី១៥ធ្នូ ទៅសាលារាជធានីភ្នំពេញ ត្រឹមត្រូវតាមច្បាប់រួចហើយដែរ។
ដោយឡែក ចំពោះការធ្វើបាតុកម្មជារៀងរាល់ថ្ងៃ ចាប់ពីថ្ងៃទី១៦ធ្នូនេះតទៅ លោក យ៉ែម បុញ្ញាឫទ្ធិ បញ្ជាក់ថា គណបក្សលោកនឹងជូនដំណឹងទៅសាលារាជធានីភ្នំពេញ។ ហើយថា គណបក្សលោក រីករាយនឹងចូលទៅប្រជុំពិភាក្សាជាមួយតំណាងសាលារាជធានីភ្នំពេញ បើមានការអញ្ជើញ។
មន្ដ្រីជាន់ខ្ពស់គណបក្សសង្គ្រោះជាតិរូបនេះ បានបង្ហើបឲ្យដឹងជាចុងក្រោយថា ថ្នាក់ដឹកនាំនៃគណបក្ស ទាំងលោកសម រង្ស៊ី ជាប្រធាន និងលោកកឹម សុខា ជាអនុប្រធាននឹងចូលរួមក្នុងបាតុកម្មចាប់ពីថ្ងៃនេះតទៅ រៀងរាល់ពេលរសៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ