ការប្រឆាំងប្រធានាធិបតីកាន់តែមានភាពរីករាលដាល
នៅប្រទេស Egypte សកម្មភាពប្រឆាំងនឹង ប្រធានាធិបតី មរស៊ី កំពុងតែមានការរីករាលដាលខ្លាំង។ បន្ទាប់ពីមានការអនុម័តនូវពង្រាងច្បាប់រដ្ឋធម្មនុញ្ញថ្មីសំរាប់ការបោះឆ្នោតប្រជាមតិ នៅថ្ងៃ ១៥ធ្នូ ខាងមុខនេះ គណបក្សប្រឆាំង នៅប្រទេសEgypte បានអំពាវនាវ អោយមានការធ្វើ បាតុកម្មសារជាថ្មីម្តងទៀត នៅរសៀលថ្ងៃអង្គារនេះ។ ចំណែកឯក្រុមសារព័ត៌មាន និងស្ថាប័នទេសចរនានា នៅ Egypte ក៏ មានគំរោង ចូលរួមក្នុងមហាបាតុកម្មនេះ តាមសកម្មភាព ផ្សេងៗរបស់ខ្លួនផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃអង្គារនេះ សម្ព័ន្ធភាពប្រឆាំងប្រទេស Egypte ដែលដឹកនាំដោយក្រុមនិយមភាពជឿនលឿន និងក្រុមឆ្វេងនិយម ដែលធ្លាប់បាន ទម្លាក់អតីតប្រធានាធិបតី អូស្ន៊ី មូបារ៉ាក់ បានអំពាវនាវ អោយមានការធ្វើ មហាកូដកម្មរួមមួយ ដើម្បីប្រឆាំងនឹង វិសោធនកម្មច្បាប់ ដែលអនុម័តដោយ លោកប្រធានាធិបតី មរស៊ី។ វិសោធនកម្មច្បាប់នេះ ធ្វើអោយប្រធានាធិបតី មានអំណាចលើសច្បាប់ និងតុលាការក្នុងប្រទេស។
ក្រុមចៅក្រម អេហ្ស៊ីប ដែលបានធ្វើ កូដកម្មរួចមកហើយ តាំងពីសប្តាហ៍មុន ប្រកាសថា នឹងមិនចូលរួមសង្កេតការបោះឆ្នោតប្រជាមតិ នៅថ្ងៃ ១៥ធ្នូ ខាងមុខនេះ ទេ។ សារព័ត៌មាននានាក្នុងស្រុក បានសំរេចចិត្ត មិនធ្វើការចុះផ្សាយឡើយ នៅថ្ងៃនេះ។ រីឯសណ្ឋាគារ និងអាហារដ្ឋាននានា ក៏បានត្រៀមបិទភ្លើង រយៈពេល កន្លះម៉ោងផងដែរ។ ពួកគេ យល់ថានេះជាវិធានការ ប្រឈមមុខនឹង អំណាចផ្តាច់ការរបស់ ប្រធានាធិបតី មរស៊ី។
កាលពីសប្តាហ៏មុន ក្រុមអ៊ីស្លាមនិយមជ្រុល ដែលមាន សមាជិកភាគច្រើននៅក្នុងសភា អេហ្ស៊ីប បានធ្វើពង្រាងច្បាប់រដ្ឋធម្មនុញ្ញ មួយ ដែលពង្រាងច្បាប់នេះ មានលក្ខណៈពង្រឹងមូលដ្ឋានគ្រឹះច្បាប់ អ៊ីស្លាម ផ្តល់ដល់មេដឹកនាំអ៊ីស្លាម សំខាន់ៗ នូវអំណាចត្រួតពិនិត្យ និងការទាមទារ អោយមានការគោរពនូវ សីលធម នៃគ្រួសារបែបបុរាណ។
ក្រុមសិទ្ធមនុស្ស មានការព្រួយបារម្ភ ចំពោះច្បាប់ថ្មីនេះ ដោយយល់ថា រដ្ឋាភិបាលអេហ្ស៊ីប អាចឆ្លៀតប្រើច្បាប់នេះ ដើម្បីបិទសេរីភាពជនស៊ីវិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ