បារាំងបើកការប្រជុំអន្តរជាតិបន្ទាន់ ដើម្បីជួយលីបង់ ដែលស្ថិតក្នុងវិបត្តិធ្ងន់ធ្ងរ
លោករដ្ឋមន្ត្រីក្រសួងការបរទេសបារាំង បើកកិច្ចប្រជុំអន្តរជាតិមួយបន្ទាន់ នៅថ្ងៃពុធទី១១ធ្នូនេះ នៅទីក្រុងប៉ារីស ដើម្បីព្យាយាមជួយប្រទេសលីបង់ ដែលស្ថិតនៅក្នុងវិបត្តិនយោបាយ និងវិបត្តិសេដ្ឋកិច្ច យ៉ាងធ្ងន់ធ្ងរ។ អស់ប្រមាណជិត ជាងមួយខែមកហើយ ដែលលីបង់ គ្មាននាយករដ្ឋមន្ត្រី គ្មានរដ្ឋាភិបាល ហើយប្រជាជនលីបង់ នៅតែបន្តធ្វើបាតុកម្ម ទាមទារឲ្យមានកំណែទម្រង់ជាបន្ទាន់ ដើម្បីសង្រ្គោះប្រទេស និងស្តារជីវភាពប្រជាជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ដោយមានការសហការ ជាមួយអង្គការសហប្រជាជាតិ លោកJean Yves Le Drian រដ្ឋមន្ត្រីក្រសួងការបរទេសបារាំង ដឹកនាំកិច្ចប្រជុំអន្តរជាតិមួយ ដែលមានការចូលរួម ពីអ្នកជំនាញសេដ្ឋកិច្ច អ្នកជំនាញនយោបាយ ព្រមទាំងតំណាងអង្គការក្រៅរដ្ឋាភិបាល សង្គមស៊ីវីលនៅលីបង់ផងដែរ។
លោក រដ្ឋមន្ត្រីការបរទេសបារាំង បានបញ្ជាក់ថា មានចំណុចជាទិភាព៣ចំណុច ដែលកិច្ចប្រជុំបន្ទាន់នេះ ត្រូវតែធ្វើឲ្យបាន។ ទីមួយ គឺត្រូវជំរុញឲ្យអាជ្ញាធរ និងថ្នាក់ដឹកនាំលីបង់ទាំងអស់ បើកភ្នែកមើលភាពជាក់ស្តែង នៃស្ថានភាពដែលធ្ងន់ធ្ងរខ្លាំងបំផុត។ ទី២ គឺត្រូវដាក់ស្នើឲ្យថ្នាក់ដឹកនាំលីបង់ បោះជំហានទៅទៅកាន់ការធ្វើកំណែទម្រង់ ចាំបាច់ ហើយទី៣ គឺត្រូវជំរុញធ្វើយ៉ាងណា ឲ្យមានការរៀបចំបង្កើតរដ្ឋាភិបាលថ្មីមួយ ឲ្យបានឆាប់ជាទីបំផុត។
លោករដ្ឋមន្ត្រីបារាំង បន្ថែមថា ដំណាក់កាលនេះបន្ទាន់បំផុត កាលណាកាន់តែយឺតយ៉ាវ វានឹងធ្វើឲ្យស្ថានការណ៍ កាន់តែពិបាកស្តារមកវិញ។ ដូច្នេះ គ្រប់គ្នាត្រូវអំពាវនាវ ឲ្យគ្រប់ភាគីនយោបាយទាំងអស់នៅលីបង់ ត្រូវតែធ្វើអ្វីម្យ៉ាង ដើម្បីស្តារស្ថិរភាពលីបង់មកវិញ។
សូមរំលឹកថា គិតចាប់ពីថ្ងៃទី១៧តុលាមក ប្រជាជនលីបង់ បានចុះផ្លូវធ្វើបាតុកម្ម ប្រឆាំងនឹងភាពអសកម្ម អំពើពុករលួយរបស់ថ្នាក់ដឹកនាំនយោបាយ។ មហាបាតុកម្មទូទាំងប្រទេស បានបង្ខំឲ្យលោក សាដ ហារីរី នាយករដ្ឋមន្ត្រីលីបង់ ចុះចេញពីតំណែងនៅថ្ងៃទី២៩តុលា។ រហូតមកទល់ពេលនេះ គ្មានអ្នកនយោបាយណាម្នាក់ ចេញមុខ ចង់ក្លាយជានាយករដ្ឋមន្ត្រី ដឹកនាំរដ្ឋាភិបាលថ្មីឡើយ។
គួរបញ្ជាក់ផងដែរថា មុននឹងឈានមកដល់វិបត្តិនយោបាយធ្ងន់ធ្ងរនេះ លីបង់ស្ថិតក្នុងវិបត្តិសេដ្ឋកិច្ចគួរឲ្យព្រួយបារម្ភបំផុត ដោយអ្នកជំនាញអះអាងថា លីបង់អាចនឹងក្ស័យធន សេដ្ឋកិច្ចដួលរលំទាំងស្រុង។ យោងតាមការព្យាការណ៍ របស់ធនាគារពិភពលោក ឆ្នាំ២០១៩នេះ សេដ្ឋកិច្ចលីបង់ត្រូវស្ថិតក្នុងភាពទីទ័លបំផុត។ បច្ចុប្បន្ននេះ ប្រជាជនលីបង់១ភាគ៣ រស់នៅក្រោមបន្ទាត់នៃភាពក្រីក្រ។ អត្រាអត់ការងារធ្វើក្នុងចំនោមយុវជនពេញវ័យ មានកម្រិត៣០% ហើយដែលកម្រិតនេះកាន់រីកឡើងធំ។ ការចុះក្រីក្រខ្លាំង យ៉ាងគំហុង របស់ប្រជាជនលីបង់ បានធ្វើឲ្យអ្នកជំនាញសេដ្ឋកិច្ចទាញសញ្ញាអាសន្ន។
អ្វីដែលជាការចង់បានរបស់ប្រជាជន ដែលធ្វើបាតុកម្មប្រមាណជិត២ខែមកនេះ គឺទាមទារឲ្យរដ្ឋាភិបាលថ្មី ជារដ្ឋាភិបាលប្រជាធិបតេយ្យ បំរើប្រជាជនលីបង់ទាំងមូល មិនមែនជារដ្ឋាភិបាល ដែលបំរើតែប្រយោជន៍សហគមន៍សាសនា ណាមួយនោះទេ។ តែយ៉ាងណា ការស្វែរកមនុស្សម្នាក់ ដែលមិនជាប់ពាក់ព័ន្ធនឹងសហគមន៍សាសនា ហើយដែលអាចទទួលបានការគាំទ្រពីមតិសាធារណៈលីបង់បាន គឺមិនមែនជារឿងងាយទេ។ សង្គមលីបង់បច្ចុប្បន្ន បានពុះចែក បែកបាក់គ្នាខ្លាំងណាស់ រវាងសហគមន៍សាសនាអ៊ីស្លាមឈីអ៊ីត អ៊ីស្លាមស៊ុនីត និងអ្នកកាន់សាសនាគ្រិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ