លោកហាសាន់ រ៉ូហានី ប្រធានាធិបតីអ៊ីរ៉ង់ថា ទ្វារចរចាជាមួយអាមេរិក នៅតែបើកចំហរ
លោកហាសាន់ រ៉ូហានី ប្រធានាធិបតីអ៊ីរ៉ង់ បានថ្លែងឲ្យដឹង នៅថ្ងៃពុធទី២៩ឧសភាម្សិលមិញថា ទ្វារចរចាជាមួយសហរដ្ឋអាមេរិក នៅតែបើកចំហរជានិច្ច មិនដែលបិទម្តងណាទេ។ សម្តីនេះ អាចជាការប្រតិកម្មតប ទៅនឹងសម្តីលោកដូណាល់ ត្រាំ ដែលបានបង្ហើបឲ្យដឹងថា អាមេរិកជឿថាអ៊ីរ៉ង់ ចង់ចរចាធ្វើកិច្ចព្រមព្រៀងជាមួយអាមេរិក។ គួររំលឹកថា ប្រមាណ២សប្តាហ៍កន្លងមកនេះ កំដៅជម្លោះរវាងអ៊ីរ៉ង់ និងអាមេរិក បានឡើងដល់ចំណុចកំពូល បន្ទាប់ពីរដ្ឋាភិបាលអាមេរិក បានបញ្ជូននាវាផ្ទុកដោយយន្តហោះចម្បាំង ទៅចូលកៀកអ៊ីរ៉ង់។
ចុះផ្សាយនៅថ្ងៃ៖
បើអាមេរិក សុខចិត្តលប់ចោលនូវទណ្ឌកម្ម ដែលខ្លួនបានដាក់មកលើអ៊ីរ៉ង់ ទាំងអយុត្តិធម៌ ហើយសុខចិត្តត្រលប់មកកាន់តុចរចាគ្នាវិញ គឺទ្វារនៅតែបើកចំហរ រងចាំស្វាគមន៍។ នេះគឺជាប្រសាសន៍លើកឡើង របស់លោកហាសាន់ រ៉ូហានី ប្រធានាធិបតីអ៊ីរ៉ង់ ដែលត្រូវបានគេចាក់ផ្សាយតាមទូរទស្សន៍ជាតិអ៊ីរ៉ង់ កាលពីល្ងាចថ្ងៃពុធទី២៩ឧសភា។
គួរកត់សំគាល់ថា សម្តីរបស់លោកហាសាន់ រ៉ូហានីនេះ គឺអាចជាប្រតិកម្មឆ្លើយតប ទៅនឹងការលើកឡើង របស់លោកដូណាល់ ត្រាំ កាលពីថ្ងៃចន្ទកន្លងទៅ។ លោកដូណាល់ ត្រាំ បាននិយាយថា លោកជឿជាក់ក្នុងចិត្តថា អ៊ីរ៉ង់មានចិត្តចង់ចរចា។ បើគិតចង់ចរចាមែន គឺវាជាគំនិតឆ្ងាតវៃ ហើយការចរចាពិតជាអាច មានមធ្យោបាយធ្វើទៅបាន។
ដោយឡែក អ្នកនាំពាក្យក្រសួងការបរទេសអ៊ីរ៉ង់ បានបង្ហាញជំហរប្រុងប្រយត្ន័ខ្លាំង ដោយបានអះអាងថា រហូតមកទល់ពេលនេះ មិនទាន់មានសញ្ញាវិជ្ជមានណាមួយ បញ្ជាក់ថាអាចនឹងមានការចរចា រវាងភាគីអាមេរិក និងអ៊ីរ៉ង់នោះទេ។
សូមរំលឹកថា បន្ទាប់ពីបានដកខ្លួនចេញពីកិច្ចព្រមព្រៀងនុយក្លេអែរអ៊ីរ៉ង់ រដ្ឋាភិបាលអាមេរិក បានថែមទាំងដាក់ទណ្ឌកម្មសេដ្ឋកិច្ច សង្រ្គប់មកលើអ៊ីរ៉ង់។ អាមេរិកដាក់ទណ្ឌកម្មពិន័យ លើក្រុមហ៊ុនទាំងអស់ ដែលហានទិញប្រេងឆៅពីអ៊ីរ៉ង់ ឬក៏រកស៊ីវិនិយោគជាមួយអ៊ីរ៉ង់។ យ៉ាងណាមិញ នៅក្នុងរវាងខែឧសភានេះ ការផលិតប្រេងឆៅរបស់អ៊ីរ៉ង់ បានធ្លាក់ចុះ ចំនួន៤សែនធុងបារីល ក្នុងមួយថ្ងៃ។ ភាគច្រើននៃការនាំចេញ ដែលអ៊ីរ៉ង់ ត្រូវបានបាត់បង់ទីផ្សារ គឺនៅតាមប្រទេសតំបន់អាស៊ី។
គួរកត់សំគាល់ដែរថា វិបត្តិជាមួយអ៊ីរ៉ង់ បានស្តែងឲ្យឃើញ នៅគោលជំហរ២ផ្ទុយគ្នា នៅក្នុងសេតវិមានប្រធានាធិបតីអាមេរិក។ មានម្ខាងគាំទ្រឲ្យប្រើកម្លាំងដាក់អ៊ីរ៉ង់ ដើម្បីផ្តួលរំលំរបបសាធារណៈរដ្ឋអ៊ីស្លាម និងម្ខាងទៀត គាំទ្រឲ្យមានការចរចា បើកចំហរទំនាក់ទំនងឡើងវិញ។ រហូតមកទល់ពេលនេះ គេសង្កេតឃើញថា លោកដូណាល់ ត្រាំ ប្រកាន់ជំហរចង់ចរចា ជាជាងការប្រើកម្លាំងជាមួយអ៊ីរ៉ង់។ ការធ្វើសង្រ្គាម ដែលអាចនាំអន្តរាយ ដល់ការឃោសនារកសម្លេងឆ្នោតសម្រាប់អាណត្តិថ្មី របស់លោក ដូណាល់ ត្រាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ