បោះឆ្នោតប្រធានាធិបតីអ៊ីរ៉ង់៖ លោកហាសាន់ រ៉ូហានី ឈ្នះតាំងតែពីជុំទីមួយ
លោកហាសាន់ រ៉ូហានី ប្រធានាធិបតីអ៊ីរ៉ង់ ដែលកំពុងឈរឈ្មោះបោះឆ្នោតអាណត្តិទីពីរ បានទទួលជ័យជំនះតាំងតែពីជុំទីមួយ ដោយបានទទួលសំឡេងឆ្នោតប្រមាណជា៥៧% ទល់នឹងសម្លេងជាង៣៨% របស់លោក អេប្រាហ៊ីម រ៉ាអ៊ីស៊ី។ នេះបើយោងតាមលទ្ធផលបណ្តោះអាសន្ន ផ្សាយជាផ្លូវការដោយអាជ្ញាធរអ៊ីរ៉ង់ មួយថ្ងៃក្រោយថ្ងៃបោះឆ្នោត។ ជ័យជំនះនេះ នឹងអនុញ្ញាតិ ឲ្យលោក រ៉ូហានី បន្តគោលនយោបាយបើកទ្វារចំហរសេដ្ឋកិច្ចអ៊ីរ៉ង់ ជាមួយនឹងអន្តរជាតិ ដែលអាចផ្តល់ដង្ហើម ដល់ជីវភាពប្រចាំថ្ងៃដល់ប្រជាជនអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
យោងតាមសំដីរបស់លោកអនុរដ្ឋមន្ត្រីក្រសួងមហាផ្ទៃអ៊ីរ៉ង់ បានឲ្យដឹងថា ក្នុងចំណោមសន្លឹកឆ្នោត ៤០លានសន្លឹកដែលបានរាប់រួចរាល់ គឺលោក ហាសាន់ រ៉ូហានី បានទទួលចំនួន ២២,៨លានសន្លឹក ចំណែកលោក អេប្រាហ៊ីម រ៉ាអ៊ីស៊ី បានទទួលចំនួន១៥,៤ លានសន្លឹក។ ចំណែកបេក្ខជនតូចពីររូបទៀត បានទទួលសម្លេងឆ្នោតស្តួចស្តើង។ យោងតាមលទ្ធផលនេះ មានន័យថា លោក ហាសាន់ រ៉ូហានី បានទទួលសម្លេងឆ្នោត ៥៧% ទល់នឹងលោក អេប្រាហ៊ីម រ៉ាអ៊ីស៊ី ដែលបាន៣៨,៥%។
ថ្វីបើនេះ មិនមែនជាលទ្ធផលសរុបទាំងអស់ តែវាបានបង្ហាញពីជ័យជំនះ ឈ្នះដាច់ របស់លោកហាសាន់ រ៉ូហានី ដោយមិនចាំបាច់រៀបចំការបោះឆ្នោតជុំទីពីរនោះទេ។ យ៉ាងណាមិញ ក្រុមលោក អេប្រាហ៊ីម រ៉ាអ៊ីស៊ី បានថ្លែងការអបអរ ទទួលស្គាល់ជ័យជំនះរបស់គូប្រកួតខ្លួន តាំងតែពីសន្លឹកឆ្នោតទើបត្រូវបានចាប់ផ្តើមរាប់ម្លេះ។
បើយោងតាមតួលេខ ចំនួនអ្នកទៅបោះឆ្នោតមានច្រើន រហូតដល់ជាង៧០%។ អ្នករាយការណ៍ព័ត៌មានបារាំង បានលើកឡើងថា នៅតាមទីក្រុងធំៗ ដូចជានៅរដ្ឋធានីតេអេរ៉ង់ជាដើម ប្រជាជនបាននាំគ្នាពពាក់ពពូនទៅបោះឆ្នោត ប្រកបដោយទឹកចិត្តត្រេកអរ បំផុត។ យ៉ាងណាមិញ ការិយាល័យបោះឆ្នោតបានបន្តបើកទ្វាររហូតដល់ ម៉ោង១២យប់ ព្រោះនៅតែមានមនុស្សបន្តគ្នា ឈរចាំបោះ។ នេះសបង្ហាញឲ្យឃើញពី ចេតនា របស់ប្រជាជនអ៊ីរ៉ង់ ដែលចង់ចូលរួម ប្រើសន្លឹកឆ្នោត ដើម្បីកំណត់ជោគវាសនារបស់ប្រទេសខ្លួន។
ជ័យជំនះរបស់លោក ហាសាន់ រ៉ូហានី នាពេលនេះ នឹងបើកផ្លូវឲ្យលោកបន្តអាណត្តិទីពីររបស់លោក ដើម្បីអនុវត្តបន្តនូវគោលនយោបាយ បើកទ្វារសេដ្ឋកិច្ចអ៊ីរ៉ង់។ អ៊ីរ៉ង់ ទើបតែត្រូវបានសហគមន៍អន្តរជាតិ ចាប់ផ្តើមដកទណ្ឌកម្មសេដ្ឋកិច្ចជាបណ្តើរៗ បន្ទាប់ពីបានចុះហត្ថលេខាលើកិច្ចព្រមព្រៀងកម្មវិធីនុយក្លេអ៊ែរ កាលពីខែកក្កដា ឆ្នាំ២០១៥។ តែយ៉ាងណា សន្ទុះសេដ្ឋកិច្ចអ៊ីរ៉ង់ នៅមិនទាន់បានទទួលផលនៅឡើយទេ ដោយសារធនាគារ និងអ្នកវិនិយោគនៅមានការស្ទាក់ស្ទើរ និងជាពិសេស ក្រោយការឡើងកាន់អំណាចរបស់លោកដូណាល់ ត្រាំ ដែលលោកបានបន្តដាក់សំពាធលើអ៊ីរ៉ង់។ អត្រាអ្នកអត់ការងារធ្វើនៅអ៊ីរ៉ង់ នៅតែមានកម្រិតខ្ពស់ខ្លាំង ជាពិសេសក្នុងចំណោមយុវជន ដែលមានរហូតដល់ជិត៣០%។
នៅមានក្តីសង្ឃឹមមួយទៀត ដែលប្រជាជនអ៊ីរ៉ង់ទន្ទឹង គឺការធ្វើកំណែទម្រង់ ច្បាប់សង្គម ការបន្ធូរបន្ថយបន្តិចម្តងៗ នូវការរឹតត្បិតសិទ្ធិសេរីភាព និងភាពស្មើភាពគ្នា រវាងស្ត្រីនិងបុរស ដែលកន្លងមកអ៊ីរ៉ង់ ត្រូវបានគេចង្អុរថ្កោលទោស។ តែយ៉ាងណា លោកប្រធានាធិបតីអ៊ីរ៉ង់ មិនអាចធ្វើអ្វីបានតែម្នាក់ឯង តាមចិត្តចង់បានទេ ព្រោះលោកត្រូវតែសម្របទៅតាមយោបល់ លោកអាយ៉ាតុឡា អាលី ខេមណី ដែលជាប្រមុខសាសនាកំពូល និងជាប្រមុខរដ្ឋរបស់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ