អ៊ីស្រាអែលបដិសេធពុំឲ្យមានការអង្កេតអន្តរជាតិទៅលើបញ្ហានាវាសន្តិភាព
បីថ្ងៃក្រោយពីមានការវាយប្រហារដោយ អ៊ីស្រាអែលទៅលើនាវាមនុស្សធម៌ដឹកជញ្ជូនព័ស្តុភារទៅតំបន់ហ្កាហ្សា ដែនដីប៉ាលេស្ទីនដែលបានបណ្តាលឲ្យមានជនស៊ីវិល៩នាក់ស្លាប់រួចមក សហគមន៍អន្តរជាតិបានចោទជាសំណួរចង់ដឹងពីកាលៈទេសៈនិងមូលហេតុដែល នាំឲ្យមានការវាយប្រហារដោយអ៊ីស្រាអែលទៅលើនាវាមនុស្សធម៌។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
ដើម្បីឆ្លើយតបទៅនឹងសំណួរពាក់ព័ន្ធនឹងកាលៈទេសៈនិងមូលហេតុដែលនាំឲ្យមានការវាយប្រហារដោយអ៊ីស្រាអែលទៅលើនាវាមនុស្សធម៌ ប្រទេសជាច្រើនបានទាមទារឲ្យបង្កើតគណៈកម្មការអង្កេតឯករាជមួយសម្រាប់ធ្វើការអង្កេតទៅលើបញ្ហានេះ។ក៏ប៉ុន្តែអ៊ីស្រាអែលបានបដិសេធយ៉ាងដាច់អហង្ការកាលពីថ្ងៃព្រហស្បតិ៍ទី៣មិថុនាម្សិលមិញពុំព្រមឲ្យមានគណៈកម្មការអង្កេតអន្តរជាតិឡើយ។
សហរដ្ឋអាមេរិកបានប្រើរាល់ឥទ្ធិពលនិងអានុភាពដែលខ្លួនមាន ធ្វើយ៉ាងណាកុំឲ្យមានគណៈកម្មការអង្កេតអន្តរជាតិចារនៅលើសេចក្តីសម្រេចចិត្តរបស់អង្គការសហប្រជាជាតិពាក់ព័ន្ធនឹងព្រឹត្តិការណ៍ដ៏សោកសង្រេងនៃនាវាមនុស្សធម៌ដឹកជញ្ជូនព័ស្តុភារទៅតំបន់ហ្កាហ្សាដែលបានបណ្តាលឲ្យមានជនស៊ីវិល៩នាក់ស្លាប់កាលពីថ្ងៃច័ន្ទទី៣១ឧសភាកន្លងទៅ។ សេចក្តីសម្រេចចិត្តគ្រាន់តែផ្តល់អនុសាសន៍បង្កើតឲ្យមានការអង្កេតមួយឲ្យបានឆាប់រហ័សនិងមានលក្ខណៈយុត្តិធម៌ ហើយនិងមានតម្លាភាព។
ទីក្រុងវ៉ាស៊ីនតោនបានសម្ដែងឲ្យដឹងម្តងទៀតកាលពីថ្ងៃព្រហស្បតិ៍ម្សិលមិញថា អាមេរិកចង់ឃើញការអង្កេតដែលទាមទារដោយអង្គការសហប្រជាជាតិ ប្រគល់ឲ្យទៅអាជ្ញាធរអ៊ីស្រាអែល ដោយបានបញ្ជាក់បន្ថែមថាអ៊ីស្រាអែលមានសមត្ថភាពគ្រប់គ្រាន់នឹងធ្វើការអង្កេតទៅលើបញ្ហានាវាមនុស្សធម៌នេះប្រកដោយលក្ខណៈត្រឹមត្រូវ។ ទាំងនេះបានបណ្តាលឲ្យភាគីទួរគីដែលមានជនរួមជាតិរបស់ខ្លួនស្លាប់ជាច្រើននាក់នៅក្នុងបញ្ហានាវាសន្តិភាពនេះ ថ្លែងបរិហារថា “អាជ្ញាធរអ៊ីស្រាអែលជាអ្នកវិនិច្ឆ័យទៅលើអ៊ីស្រាអែល”។
ទោះជាយ៉ាងណាក៏ដោយ ក៏ទាំងនេះពុំបានខាឃាំងក្រុមប្រឹក្សាការពារសិទ្ធិមនុស្សនៃអ ស ប ធ្វើការទាមទារឲ្យមានគណៈកម្មការអង្កេតអន្តរជាតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ