អ៊ីស្រាអែលបង្កើត “ គណៈកម្មការស៊ើបអង្កេតឯករាជ្យ “ របស់ខ្លួន
គឺនៅថ្ងៃចន្ទ១៤មិថុនានេះហើយដែលគេត្រូវ បង្កើតគណៈកម្មការទទួលបន្ទុកស៊ើបអង្កេតអំពីប្រតិបត្តិការរបស់កង នាវាចម្បាំងអ៊ីស្រាអែលវាយប្រហារទៅលើនាវាដឹកជំនួយមនុស្សធម៌សំដៅ យកទៅឱ្យបណ្តាជននៃតំបន់ហ្កាហ្សា។ ប្រតិបត្តិការនៅថ្ងៃ៣១ឩសភាមុន នេះបានបណ្តាលឱ្យស្លាប់សកម្មជននៃអង្គការមនុស្សធម៌អស់៩នាក់។ឃើញថា អ៊ីស្រាអែលត្រូវចុះញ៉មក្រោមសម្ពាធនៃសហគមន៍អន្តរជាតិ ប៉ុន្តែបុព្វសិទ្ធិនៃ “ គណៈកម្មការស៊ើបអង្កេតឯករាជ្យ “ នេះ ទំនងជាមានកំរិតព្រំដែន។
ចុះផ្សាយនៅថ្ងៃ៖
សេចក្តីរាយការណ៍របស់ Michel Paul ពីទីក្រុង Jérusalem ប្រែសម្រួលដោយ វីនស្តុន រតនា
ប្រធានក្រុមប្រឹក្សាអ៊ីស្រាអែលបានប្រកាសអំពីការបង្កើត “ គណៈកម្មការសាធារណៈឯករាជ្យ “ ដោយមានការរួមចំណែករបស់បរទេសគឺស្របតាមសំណូមពររបស់រដ្ឋការវ៉ាស៊ិនតោន ហើយដំណាលពេលគ្នានេះ សេចក្តីជូនដំណឹងមួយរបស់ក្រសួងការបរទេសអាមេរិកាំងបានយល់ព្រមស្របតាមរដ្ឋការលោកអូបាម៉ា។
គណៈកម្មការអ៊ីស្រាអែលនឹងមានបេសកកម្មស៊ើបអង្កេតអំពីទិដ្ឋភាពទាក់ទងនឹងសកម្មភាពរបស់រដ្ឋអ៊ីស្រាអែល ដើម្បីឃាត់ឃាំងកុំឱ្យនាវានានាអាចទៅដល់ឆ្នេរសមុទ្រនៃតំបន់ហ្កាហ្សា។គណៈកម្មការនេះនឹងត្រូវដឹកនាំដោយចៅក្រមចូលនិវត្តន៍ម្នាក់នៃតុលាការកំពូលអ៊ីស្រាអែល ហើយមានអ្នកសង្កេតការណ៍បរទេសពីរនាក់ជាសមាជិកគឺឩត្តមមន្ត្រី Lord Trimbel ជាអតីតប្រធានគណបក្សសហភាពនិយម នៅUlsterជាជ័យលាភីរង្វាន់ណូបែលផ្នែកសន្តិភាពនិងលោកKen Watkin ជាអតីតអគ្គមេធាវីនៃកងទ័ពកាណាដា។
គណៈកម្មការសាធារណៈនេះអាចនឹងស្តាប់ការពន្យល់បំភ្លឺបកស្រាយឬរបាយការណ៍របស់ជនណាម្នាក់ឬអង្គការណាមួយ ប៉ុន្តែពុំមែនរបស់ទាហានដែលបានរួមចំណែក ដោយផ្ទាល់ក្នុងប្រតិបត្តិការនេះឡើយ ហើយប្រៀបបាននឹង “ កាហ្វេគ្មានរសជាតិcaféine ហើយក៏មានគណៈកម្មការស៊ើបអង្កេត ដោយគ្មានការស៊ើបអង្កេត “ អ៊ឹចឹងដែរ -នេះជាការអះអាងរបស់អ្នកច្បាប់ដ៏ល្បីល្បាញម្នាក់ នៅអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ