នេតាន់យ៉ាហ៊ូថា អាចបង្កើតរដ្ឋប៉ាឡេស្ទីនបាន ប៉ុន្តែត្រូវមានលក្ខខណ្ឌច្បាស់លាស់
លោករដ្ឋមន្រ្តីការបរទេសអាល្លឺម៉ង់បានស្នើថា ការទទួលស្គាល់ទឹកដីប៉ាឡេស្ទីនជាប្រទេសមួយពេញលេញ គឺជាវិធីតែមួយគត់ ដើម្បីបញ្ចប់ជម្លោះអ៊ីស្រាអែល-ប៉ាឡេស្ទីន។ ថ្លែងចំពោះមុខអ្នកកាសែត បន្ទាប់ពីបានទទួលជួបពិភាក្សា ជាមួយលោករដ្ឋមន្រ្តីការបរទេសអាល្លឺម៉ង់ លោកនេតាន់យ៉ាហ៊ូ នាយករដ្ឋមន្រ្តីអ៊ីស្រាអែល បាននិយាយបញ្ជាក់ថា លោកមិនជំទាស់ នឹងការបង្កើតឲ្យមានរដ្ឋប៉ាឡេស្ទីន ឯករាជ្យនោះទេ ប៉ុន្តែវាត្រូវតែធ្វើឡើងក្រោមលក្ខខណ្ឌច្បាស់លាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
វាជារឿងមួយគួរឲ្យភ្ញាក់ផ្អើលណាស់ ដែលលោក ប៊ីនយ៉ាមីន នេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានថ្លែងប្រាប់អ្នកកាសែតថា លោកមិនជំទាស់ នឹងគំនិត ទទួលស្គាល់ដែនដីប៉ាឡេស្ទីន ឲ្យក្លាយជារដ្ឋអធិបតេយ្យពេញលេញ នោះទេ។ ប៉ុន្តែការទទួលស្គាល់នេះ ត្រូវតែគោរពលក្ខខណ្ឌចាំបាច់ជាច្រើន។ លក្ខខណ្ឌដែលលោក នេតាន់យ៉ាហ៊ូសំដៅនោះ គឺទាក់ទងជាពិសេស នឹងសន្តិសុខជាតិអ៊ីស្រាអែល តែម្តង។
តួយ៉ាង ក្នុងចំណោមលក្ខខណ្ឌចាំបាច់ទាំងនោះ លោកនេតាន់យ៉ាហ៊ូ បានបញ្ជាក់ថា ប៉ាឡេស្ទីន ត្រូវតែរំសាយកំលាំងទាហាន ហើយរៀបចំខ្លួនជាប្រទេសប្រជាធិបតេយ្យ។ មួយវិញទៀត ប៉ាឡេស្ទីន ត្រូវទទួលស្គាល់ជាផ្លូវការផងដែរថា អ៊ីស្រាអែល គឺជារដ្ឋជ្វីហ្វពេញអធិបតេយ្យ។ ក្នុងន័យនេះ លោកនាយករដ្ឋមន្រ្តីអ៊ីស្រាអែល បានបន្ថែមថា ប៉ាឡេស្ទីនគួរចាប់ផ្តើមធ្វើវា ដោយឈប់ដើរបង្ខូចកេរ្តិ៍ឈ្មោះអ៊ីស្រាអែល នៅតាមស្ថាប័នអន្តរជាតិនានា តទៅទៀត។
ឆ្លើយតប នឹងសំណួរអ្នកកាសែត លោកនេតាន់យ៉ាហ៊ូ បានបញ្ជាក់ថា កាលពីមុនពេលបោះឆ្នោត លោកបានប្រកាសបដិសេធ មិនឲ្យបង្កើតប្រទេសប៉ាឡេស្ទីន ក៏ដោយសារតែកាលនោះ ស្ថានការណ៏មានលក្ខណៈមិនអំណោយផល ដល់ការទទួលស្គាល់រដ្ឋប៉ាឡេស្ទីន។ លោកបន្តថា បញ្ហាចោទ មិនមែនជាបញ្ហាគូសចែកព្រំដែននោះទេ ប៉ុន្តែជាបញ្ហាសន្តិសុខជាតិ រវាងប្រទេសទាំងពីរ ថាតើគេត្រូវរៀបចំស្រុះស្រួលគ្នារបៀបណា ដើម្បីធានាបានថា ប៉ាឡេស្ទីន នឹងឈប់វាយប្រហារអ៊ីស្រាអែល។
យ៉ាងណាមិញ លោក Frank Walter រដ្ឋមន្រ្តីការបរទេសអាល្លឺម៉ង់ ដែលកំពុងបំពេញបេសកកម្មនៅអ៊ីស្រាអែល បានតើនរំលឹកថា ដរាបណាប៉ាឡេស្ទីនមិនទាន់ត្រូវបាន គេទទួលស្គាល់ថាជារដ្ឋពេញអធិបតេយ្យ សន្តិសុខជាតិអ៊ីស្រាអែល ក៏នឹងនៅតែទទួលការគម្រាមកំហែងដែរ។ ការមានប្រទេសពីរ ឯករាជ្យស្មើភាពគ្នារវាងប្រជាជាតិទាំងពីរ គឺជាច្រកចេញតែមួយគត់ ដើម្បីបញ្ចប់សង្គ្រាមរ៉ាំរ៉ៃមួយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ