នាយករដ្ឋមន្ត្រីអ៊ីស្រាអែលចោទលោកបាន គីមូនថាលើកទឹកចិត្តអំពើភេរវនិយម
នាយករដ្ឋមន្រ្តីអ៊ីស្រាអែល ពុំសប្បាយចិត្តឡើយសេចក្តីថ្លែងការណ៍របស់អគ្គលេខាធិការ អ.ស.ប. ទាក់ទងនឹងបញ្ហាហិង្សានានានៅតំបន់មជ្ឈិមបូព៌ានាពេលបច្ចុប្បន្ន។ ដោយ នៅមុខក្រុមប្រឹក្សាសន្តិសុខ លោក បាន គីមូន បានថ្លែងថ្កោលទោស អ៊ីស្រាអែល នៅលើបញ្ហាកាន់កាប់ដែនដីប៉ាឡេស្ទីន។ លោក ថែម ទាំងបានគូសបញ្ជាក់ទៀតថា ”វាជារឿងធម្មតាមួយរបស់មនុស្សលោក នៅក្នុងការបញ្ចេញប្រតិកម្មតបតទៅនឹងទង្វើការកាន់កាប់ដែនដីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ដូចជារៀងរាល់ខែនៅអ.ស.ប. បញ្ហាអ៊ីស្រាអែលនិងប៉ាឡេស្ទីន តែងតែត្រូវបានគេលើកយកមកជជែកគ្នាជានិច្ច។ លើកនេះ លោក បាន គីមូន អគ្គលេខាធិការ អ.ស.ប. បានប្រើពាក្យពេជន៍ធ្ងន់ៗទៅលើអ៊ីស្រាអែល។លោក បានលើកឡើងថា”ប្រជាជនប៉ាឡេស្ទីន រស់នៅលើទឹកដីរបស់គេ ដោយគ្មានក្តីសង្ឃឹមអ្វីទាល់តែសោះ នៅក្រោមការកាន់កាប់របស់អ៊ីស្រាអែលតាំងពីកន្លៈសតវត្សរ៍មកហើយ។ ពាក្យពេជន៍របស់អគ្គលេខាធិការអ.ស.ប.នេះ បានបង្កឲ្យមានការក្រេវក្រោធ ពីសំណាក់នាយករដ្ឋមន្ត្រីអ៊ីស្រាអែល។
ពីព្រោះ លោក បាន គីម៊ូន បានទាមទារឲ្យ អ៊ីស្រាអែលលើកផ្អាកការធ្វើអណានិគមកិច្ចរនៅក្នុងដែនកាន់កាប់ នៅខណៈពេលដែលអ៊ីស្រាអែល ទើបបានជូនដំណឹងអំពីការសាងសង់លំនៅដ្ឋានថ្មីៗចំនួន១៥០ខ្នងថែមទៀតនិងការដាក់បញ្ចូលដីសិកម្ម ១៥០ ហិកតា ជាដីរបស់អ៊ីស្រាអែលនាពេលខាងមុខទៀតផង”។ ការជូនដំណឹងរបស់អ៊ីស្រាអែលនេះ ត្រូវបានអគ្គលេខាធិការ អ.ស.ប.ចាត់ទុកថា “ជាការប្រមាថម៉ាក់ងាយដល់ប្រជាជនប៉ាឡេស្ទីននិងសហគមន៍អន្តរជាតិ ហើយកត្តានេះ ក៏ជះឥទ្ធិពលទៅបញ្ហាគ្រិះនានា ជាអាទិ៍ ការសន្យារបស់អ៊ីស្រាអែល នៅចំពោះមុខដំណោះស្រាយមួយឲ្យមានរដ្ឋពីរនៅក្នុងតំបន់។
គួររំលឹកថា អសប បានសាកល្បងជំរុញដំណោះស្រាយនេះតាំងពីជាងមួយឆ្នាំកន្លងមកហើយ តែត្រូវនៅជាប់គាំងទាំងស្រុង ហើយតាំងពីពេលនោះមក ទំនាក់ទំនងរវាងប៉ាឡេស្ទីននិងអ៊ីស្រាអែលកាន់តែធ្លាក់ចុះដុនដាប។
លោកនាយករដ្ឋមន្ត្រីអ៊ីស្រាអែលវិញដែលក្តៅក្រហាយនឹងសំដីរបស់លោក បានគីម៉ូន បានឆ្លើយតបតយ៉ាងទាន់ចិត្តដោយដោយបានគូសបញ្ជាក់ថា” ការថ្លែងរបស់លោក បាន គីមូននេះ គ្មានភស្តុតាងអ្វីជាក់លាក់ថាជារឿងពិតនោះ ។ នាយករដ្ឋមន្ត្រីអ៊ីស្រាអែល ថែមទាំងហ៊ានចោទត្រង់ៗថាអគ្គលេខាធិការ អ.ស.ប. លើកទឹកចិត្តអំពើភេរវនិយមទៀតផង។
បន្ទាប់ពីលោកនេតានយ៉ាហ៊ូរួចមក ឯកអគ្គរដ្ឋទូតអ៊ីស្រាអែលប្រចាំអ.ស.ប ក៏បានថ្កោលទោសដែរ ដោយនិយាយថា នយោបាយរបស់ អ.ស.ប.ចំពោះអ៊ីស្រាអែលពុំមានភាពស្មើគ្នាទេ និងមានភាពពុតត្បុតជានិច្ច នៅពេលណាមានបញ្ហាពាក់ព័ន្ធជាមួយអ៊ីស្រាអែល។
សរុប មិនគ្រាន់តែលោក បាន គីម៊ូនម្នាក់ទេ ដែលត្រូវទទួលរងសំដីអសុរសរបស់នាយករដ្ឋមន្ត្រីអ៊ីស្រាអែល ក៏ប៉ុន្តែ នាពេលថ្មីៗនេះ រដ្ឋមន្ត្រីរបស់ប្រទេសស៊ុយអែដម្នាក់ក៏ធ្លាប់ បានត្រូវបានលោក បេនយ៉ាមីន នេតានយ៉ាហ៊ូ ចោទដែរ" ថាគាំទ្រភេរវនិយម"។ ដោយហេតុ ថា លោកស្រីរដ្ឋមន្ត្រីស៊ុយអែដម្នាក់នេះ បានស្នើសុំឲ្យអ៊ីស្រាអែល បើកការស៊ើបអង្កេតមួយស្តីពីការស្លាប់របស់ប្រជាជនប៉ាឡេស្ទីននៅអំឡុងពេលប៉ុន្មានខែចុងក្រោយនេះដោយកងទ័ពអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ