ស៊ីរីចោទថាកងទ័ពតួកគីចូលក្នុងទឹកដីខ្លួនតែតួកគីវិញបដិសេធថាជាព័ត៌មានពុំពិត
រដ្ឋាភិបាលស៊ីរី បានថ្លែងអះអាងថា កងទ័ពជើងគោកតួកគីប្រមាណជា១០០នាក់បានចូលទៅក្នុងទឹកដីស៊ីរីកាលពីថ្ងៃសៅរ៍កន្លងទៅនេះ ដើម្បីចូលទៅជួយក្រុមបះបោរស៊ីរី។ ភ្លាមៗនោះ រដ្ឋមន្ត្រីក្រសួងការពារជាតិតួកគី បានបដិសេធយ៉ាងដាច់អហង្កាថាតួកគី ពុំបានបញ្ជូនកងទ័ពជើងគោគខ្លួនចូលទៅក្នុងទឹកដីស៊ីរីឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅក្នុងលិខិតមួយច្បាប់របស់ខ្លួនជូនដល់ក្រុមប្រឹក្សាសន្តិសុខនៃ អសប ដែលចេញផ្សាយនៅថ្ងៃអាទិត្យម្សិលមិញដោយទីភ្នាក់ងារព័ត៌មានផ្លូវការស៊ីរីឈ្មោះ Sana “ក្រសួងការបរទេសស៊ីរី បានគូសបញ្ជាក់ថា តួកគី បន្តធ្វើការដឹកបញ្ជូនអាវុធនិងរំសេវនៅតាមច្រកចេញចូល Bab al Salama ដោយឆ្លងកាត់តាមក្រុង Azaz ក្នុងទឹកដីស៊ីរី”។ ក្រុង Azaz ដែលស្ថិតនៅប៉ែកខាងជើងក្រុងAlep ស្ថិតនៅចម្ងាយប្រមាណជា១០គមពីតំបន់ព្រំដែន។
យោងតាមទីក្រុងដាម៉ាស “កងទាហានតួកគីដែលស្ថិតនៅក្នុងចំណោមជនប្រដាប់អាវុធមួយក្រុមដែលមានគ្នាប្រមាណជា ១០០នាក់ បានចូលទៅក្នុងទឹកដីស៊ីរី កាលពីថ្ងៃសៅរ៍កន្លងផុតទៅនេះ តាមរយៈយាន្តយន្ត pick-up-ប្រមាណជា១២គ្រឿង ប្រដាប់ទៅដោយកាំភ្លើង mitrailleuses ធុនធ្ងន់ ដើម្បីទៅជួយដល់ក្រុមបះបោរស៊ីរី។
នៅក្នុងលិខិតដដែលនោះ រដ្ឋមន្ត្រីក្រសួងការបរទេសស៊ីរី បានបរិហារទៀតថា “តួកគី បានធ្វើការបាញ់ផ្លោងដែរទៅលើតំបន់ដែលនៅភាគខាងជើងប្រទេសស៊ីរី។
ការចោទប្រកាន់របស់ប្រទេសស៊ីរីនេះ ត្រូវបានលោក Ismet Yilmaz រដ្ឋមន្ត្រីក្រសួងការពារជាតិតួកគី ធ្វើការបដិសេធយ៉ាងម៉ឺងម៉ាត់ដោយអះអាងបញ្ជាក់ថា “ជាព័តមានគ្មានការពិតទាល់តែសោះ ពីព្រោះ ពុំមានកងទ័ពតួកគីណាមួយចូលទៅក្នុងទឹកដីស៊ីរីនោះទេ”។
មិនតែប៉ុណ្ណោះ លោករដ្ឋមន្ត្រីក្រសួងការពារជាតិតួកគី បានបដិសេធផងដែរចំពោះព័ត៌មានដែលអះអាងថា “មានយន្តហោះ Arabie saoudite មួយចំនួន បានធ្វើដំណើរទៅដល់ប្រទេសតួកគី ហើយនៅលើមូលដា្ឋនអាកាសចរណ៍ Incirlik។ យន្តហោះ Arabie saoudite ដែលតាមការគ្រោងទុក គឺដើម្បីប្រើប្រាស់ សម្រាប់ការវាយប្រហារប្រឆាំងទល់នឹងអង្គការរដ្ឋអ៊ីស្លាមជីហាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ