ស៊ីរី៖សហគមន៍អន្តរជាតិបានសម្តែងក្តីបារម្ភពីសោកនាដកម្មមនុស្សធម៌ និងព្រមានឲ្យបញ្ឈប់ការប្រយុទ្ធ
ចុះផ្សាយនៅថ្ងៃ៖
ស្តាប់ - ០៦:៣៣
នៅក្នុងប្រទេសស៊ីរី នារយៈពេលប៉ុន្មានថ្ងៃកន្លងទៅ ទីក្រុងអាឡិបដែលជាទីក្រុងធំទី២ របស់ស៊ីរីបានក្លាយជាសមរភូមិប្រយុទ្ធយ៉ាងហិង្សាពីសំណាក់កម្លាំងទ័ពរដ្ឋាភិបាលស៊ីរីដោយមានការជួយគាំទ្រផ្លូវអាកាសពីកម្លាំងទ័ពរុស្ស៊ី។ គោលដៅរបស់រដ្ឋាភិបាលទីក្រុងដាម៉ាស គឺដណ្តើមយកទីក្រុងអាឡិបទាំងស្រុងពីកណ្តាប់ដៃក្រុមបះបោរ។ តែអ្វីដែលសហគមន៍អន្តរជាតិកំពុងបារម្ភខ្លាំងជាងគេនៅចំពោះមុខ គឺជីវិតជនស៊ីវិលស្លូតត្រង់ និងសោកនាដកម្មមនុស្សធម៌នាពេលខាងមុខ។ នៅសប្តាហ៍កន្លងទៅ មានស្លាប់ជនស៊ីវិលពី ១៥០ ទៅ ៣០០នាក់នៅក្រោមគ្រាប់កាំភ្លើងស៊ីរី និងរុស្ស៊ី។
ផ្ទាំងទស្សនីយភាពដែលពិភពលោកកំពុងទស្សនានៅក្នុងប្រទេសស៊ីរីតាំងពីជាង ៥ឆ្នាំកន្លងទៅ គឺអសមត្ថភាពរបស់សហគមន៍អន្តរជាតិ និងភាពឡើងចាងកាន់តែខ្លាំងឡើងៗរបស់កម្លាំងរដ្ឋាភិបាលស៊ីរីរបស់លោកប្រធានាធិបតីអាសាដដោយមានការគាំទ្រពីសម្ព័ន្ធមិត្តក្នុងតំបន់ ដូចយ៉ាងអ៊ីរ៉ង់ និងចលនាហេស្បូឡាលីបង់ ពិសេសមហាអំណាចរុស្ស៊ី។ សហគមន៍អន្តរជាតិចេះតែបន្តស្រែក និងថ្កោលទោស ចំណែករបបក្រុងដាម៉ាស និងសម្ព័ន្ធមិត្តចេះតែបន្តវាយប្រហារលើទីតាំងរបស់ក្រុមបះបោរ ហើយដែលជនស៊ីវិលស្លូតត្រង់ជាអ្នកបាត់បង់ជិវិតច្រើនជាងគេ។ សង្រ្គាមស៊ីវិលជាង ៥ឆ្នាំកន្លងទៅបានផ្តាច់ជីវិតមនុស្សជាង ៣០ម៉ឺននាក់។
ក្រៅពីនោះ នៅមានបញ្ហាមនុស្សធម៌ និងជនស៊ីវិលជាច្រើនម៉ឺននាក់កំពុងបន្តជាប់កុននៅក្នុងតំបន់ជម្លោះ ហើយពួកគេមានការខ្វះខាតគ្រប់បែបយ៉ាង តាំងពីគ្រឿងឧបភោគបរិភោគ ថ្នាំសង្កូវ និងទឹកស្អាតប្រើប្រាស់។ ក្នុងរយៈពេល ១ឆ្នាំកន្លងទៅ ចំនួនជនស៊ីវិលដែលស្ថិតក្រោមការហ៊ុមព័ទ្ធរបស់ទ័ពរដ្ឋាភិបាលបានកើនពីចំនួនជិត ៤០ម៉ឺននាក់ទៅជិត ១លាននាក់នាពេលសព្វថ្ងៃនៅទូទាំងប្រទេសស៊ីរី។ នៅក្នុងទីក្រុងអាឡិបប៉ែកខាងកើតដែលស្ថិតក្រោមការកាន់កាប់របស់ក្រុមប្រឆាំងតាំងពីឆ្នាំ ២០១២ មានជនស៊ីវិលប្រមាណ ២៥ម៉ឺននាក់កំពុងជួបវិបត្តិមនុស្សធម៌តាំងពីជាង ៤ខែ។
ជាថ្មីម្តងទៀត សំណុំរឿងស៊ីរីបានក្លាយជាប្រធានរឿងក្តៅ និងបន្ទាន់របស់ក្រុមប្រឹក្សាសន្តិសុខ។ តែលើកណាក៏ដូចជាលើកណាដែរ រុស្ស៊ីដែលជាសម្ព័ន្ធមិត្តចាក់ទឹកមិនលេចរបស់ស៊ីរីតែងតែប្រឆាំងរាល់សេចក្តីសម្រេចចិត្តណាដែលថ្កោលទោសរបបស៊ីរី។
លោកអូបាម៉ាមានសុទិដ្ឋិនិយមតិចតួចចំពោះអនាគតស៊ីរី
នាឱកាសជំនួបកំពូលអង្គការ Apec ក្នុងទីក្រុងលីម៉ា ប្រទេសប៉េរូ លោកប្រធានាធិបតីអាមរិកអូបាម៉ាបានជួបសន្ទនារយៈពេលខ្លីជាមួយសមភាគីរុស្ស៊ីលោកពូទីន។ លោកអូបាម៉ាបានស្នើលោកពូទីនឲ្យប្រឹងប្រែងបន្ថែមទៀតដើម្បីបញ្ចប់អំពើហិង្សា និងទុក្ខវេទនារបស់ពលរដ្ឋស៊ីរី។ តែលោកអូបាម៉ាបែរជាបញ្ជាក់ខ្លួនឯងថា លោកមានសុទិដ្ឋិនិយមតិចតួចចំពោះអនាគតប្រទេសស៊ីរី។ ថ្លែងនៅក្នុងសន្និសីទកាសែត បន្ទាប់ពីជួបជាមួយលោកពូទីន លោកអូបាម៉ាបានទទួលស្គាល់ថា នៅពេលដែលរុស្ស៊ី និងអ៊ីរ៉ង់បានសម្រេចចិត្តគាំទ្រលោកប្រធានាធិបតីស៊ីរីអាសាដក្នុងផ្លូវសង្រ្គាម វាពិតជាពិបាកដែលក្រុមប្រឆាំងអាចបន្តទ្រាំទ្របានយូរអង្វែង។
ក្រុមអ្នកវិភាគទូទៅបានយល់ឃើញថា ដោយអាណត្តិរបស់លោកអូបាម៉ាត្រូវចប់នៅ ២ខែខាងមុខ សម្តីរបស់លោកអូបាម៉ាអាចមិនសូវមានឥទ្ធិពល និងមានទម្ងន់ដូចមុន។ មួយវិញទៀត ប្រសិនបើលោកអូបាម៉ាអាចធ្វើឲ្យលោកពូទីនស្តាប់លោក និងយល់ព្រមធ្វើតាមលោកនៅក្នុងដំណោះស្រាយវិបត្តិស៊ីរី ក៏ប្រហែលជាមានតាំងពីយូរមកហើយ ព្រោះវិបត្តិមួយនេះមិនមែនទើបកើតមានថ្ងៃនេះ ឬថ្ងៃម្សិលមិញទេ ហើយនេះក៏មិនមែនជាលើកទី១ ដែរ ដែលលោកអូបាម៉ាបានធ្វើសំណើរបៀបនេះទៅកាន់លោកពូទីន។
បរិបទនយោបាយអន្តរជាតិនឹងផ្លាស់ប្តូរក្នុងឆ្នាំ ២០១៧
នៅថ្ងៃទី២០ មករា ឆ្នាំ ២០១៧ លោកដូណាល់ ត្រាំនឹងចូលកាន់តំណែងជាផ្លូវការជំនួសកន្លែងលោកអូបាម៉ា។ នៅពេលនោះ បរិបទពិភពលោកអាចនឹងមានការផ្លាស់ប្តូរច្រើន បូកទាំងដំណើរស្វែងរកដំណោះស្រាយឲ្យវិបត្តិស៊ីរីផង។ ការផ្លាស់ប្តូរដែលមិនមែនមានតែជាមួយនឹងរដ្ឋបាលអាមេរិកថ្មីរបស់លោកដូណាល់ ត្រាំមួយទេ តែក៏នឹងអាចមានពីប្រទេសមហាអំណាចមួយចំនួនក្នុងលោកដែរ ពិសេសការបោះឆ្នោតជ្រើសរើសប្រធានាធិបតីថ្មីនៅក្នុងប្រទេសបារាំងនាខែឧសភា ឆ្នាំ ២០១៧។
ការផ្លាស់ប្តូរដែលនឹងផ្តើមចេញពីការប្រកាន់ជំហរមិនដូចគ្នានៅក្នុងសំណុំរឿងជាតិ និងអន្តរជាតិរវាងរដ្ឋបាលអាមេរិករបស់លោកអូបាម៉ា និងអនាគតរដ្ឋបាលអាមេរិករបស់លោកដូណាល់ ត្រាំ។ លោកអូបាម៉ាបានប្រកាន់ជំហរម៉ឺងម៉ាត់ទល់នឹងជំហររបស់រុស្ស៊ី និងរបស់អ៊ីរ៉ង់នៅក្នុងសំណុំរឿងស៊ីរី និងចង់កំចាត់លោកអាសាដចេញពីឆាកនយោបាយស៊ីរី។ តែលោកដូណាល់ ត្រាំមានទំនោររករុស្ស៊ីរបស់លោកពូទីន។ នៅក្នុងប្រទេសបារាំង លោកហ្រ្វង់ស័រ ហ្វីយ៉ូងដែលបានទទួលសម្លេងគាំទ្រខ្ពស់នាការបោះឆ្នោតជ្រើសរើសបេក្ខជនប្រធានាធិបតីក្នុងបក្សសាធារណរដ្ឋក៏មានជំហរចង់ដោះស្រាយវិបត្តិស៊ីរីជាមួយគ្រប់ភាគីពាក់ព័ន្ធទាំងអស់ ដោយរាប់បញ្ចូលទាំងបុគ្គលអាសាដ និងក្រុមប្រទេសដែលមានរបបដឹកនាំផ្តាច់ការ។
គេនៅមិនទាន់ដឹងថា តើជំហរនយោបាយអន្តរជាតិថ្មីរបស់លោកដូណាល់ ត្រាំ ឬរបស់អនាគតថ្នាក់ដឹកនាំក្នុងប្រទេសបស្ចិមលោកមួយចំនួនអាចនឹងបញ្ចប់វិបត្តិនៅស៊ីរី ឬនៅក្នុងប្រទេសផ្សេងបានឬអត់ទេ អ្វីដែលគេដឹង អ្នកដែលនឹងអាចទាញចំណេញពីនយោបាយរបៀបនេះ គឺគ្មាននរណាក្រៅពីរុស្ស៊ី និងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ