ស៊ីរី៖ក្រុមប្រយុទ្ធអារ៉ាប់និងគួដបើកការវាយលុកយកទីក្រុងរ៉ាក់កា ពីក្រុមជីហាតរដ្ឋអ៊ីស្លាម
កងកម្លាំងប្រយុទ្ធអារ៉ាប់និងគួដឌីស្ថានបានប្រកាសនៅថ្ងៃអាទិត្យនេះថា បានបើកប្រតិបត្តិការវាយលុកដណ្តើមយកក្រុងរ៉ាក់កា នៅស៊ីរី ពីក្រុមជីហាតរដ្ឋអ៊ីស្លាមមកវិញ។ រ៉ាក់កា ជារដ្ឋធានីក្នុងដែនដីរបស់ក្រុមជីហាតរដ្ឋអ៊ីស្លាម។ ប្រតិបត្តិការវាយយករ៉ាក់កា ធ្វើឡើងទន្ទឹមគ្នានឹងប្រតិបត្តិការវាយយកមូស៊ូលនៅអ៊ីរ៉ាក់ដែរ។ មន្ត្រីអាមេរិកមួយរូបបានគូសបញ្ជាក់ថា ប្រតិបត្តិការវាយយកក្រុងរ៉ាក់កា កំពុងតែប្រព្រឹត្តទៅនៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ប្រតិបត្តិការវាយលុកយកក្រុងរ៉ាក់កា បានបើកធ្វើ នៅស៊ីរី មានឈ្មោះថា “កំហឹងទន្លេអឺហ្វ្រាត” មានកងកម្លាំងប្រយុទ្ធ៣ម៉ឺននាក់ ចូលរួម។ ប្រតិបត្តិការនេះ ចែកជា២ដំណាក់កាល៖ ទី១ គឺក្រុមប្រយុទ្ធត្រូវរំដោះយកខែត្ររ៉ាក់កា ធ្វើអោយទីក្រុងរ៉ាក់កានៅតែឯង រួចហើយពួកគេចូលទៅប្រយុទ្ធរំដោះយកក្រុងតែម្តង។
រ៉ាក់កាស្ថិតនៅលើច្រាំងទន្លេអឺហ្វ្រាត ជីតព្រំដែនតួកគី។ រ៉ាក់កា ជាទីក្រុងចម្បង និងគំរូ ក្នុងដែនដីដែលក្រុមជីហាតរដ្ឋអ៊ីស្លាមកាន់កាប់ នៅស៊ីរីនិងអ៊ីរ៉ាក់។ គឺនៅរ៉ាក់កានេះហើយ ដែលក្រុមភេរវជនរៀបចំផែនការ ដើម្បីបង្កភេរវកម្ម នៅតាមប្រទេសលោកខាងលិច។
ក្នុងប្រតិបត្តិការវាយយករ៉ាក់កាពីក្រុមភេរវជន កងកម្លាំងរាប់ម៉ឺននាក់ដែលចូលរួម មានកងកម្លាំងគួដនិងអារ៉ាប់ដែលអាមេរិកគាំទ្រ កងកម្លាំងតួកមែន រឺក៏សកម្មជនប្រយុទ្ធមកពីក្រុម FDS ជាដើម។ ការវាយលុកយករ៉ាក់កា ស្ថិតក្រោមជំនួយពីប្រទេសសម្ព័ន្ធមិត្ត ដូចប្រតិបត្តិការវាយលុកយកមូស៊ូល ដែលកំពុងដំណើរការ នៅអ៊ីរ៉ាក់ដែរ។ ប្រទេសសម្ព័ន្ធមិត្តដែលចូលរួមប្រតិបត្តិការកំចាត់ក្រុមជីហាតនៅដើមបូព៌ា ធ្លាប់បានលើកឡើងកាលពីថ្ងៃ២៥តុលា ថាការវាយយកទីក្រុងរ៉ាក់កា គឺជាទិសដៅរបស់ពួកគេបន្ទាប់មកទឿត។
ក្នុងការវាយយកក្រុងមូស៊ូលនៅអ៊ីរ៉ាក់វិញ កងកម្លាំងអ៊ីរ៉ាក់បានប្រឈមជាមួយសម្មជនជីហាត ដែលតស៊ូស្វិតស្វាញជាមួយពួកគេ នៅតាមភាគខាងកើត និងខាងត្បូងក្រុង។ ថ្ងៃអាទិត្យនេះ កងកម្លាំងអ៊ីរ៉ាក់បានប្រយុទ្ធជាមួយពួកជីហាតពីផ្លូវមួយទៅផ្លូវមួយ។ ប្រជាជនវិញ បាននាំគ្នាប្រថុយជីវិត រត់ចេញពីតំបន់គ្រប់គ្រងដោយក្រុមជីហាត។ រហូតពេលនេះ កងកម្លាំងអ៊ីរ៉ាក់វាយយកបានសង្កាត់ចំនួន៦ នៅភាគខាងកើតក្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ