រុស្ស៊ីប្រកាសអនុវត្ត“ប្រឡោះពេលមនុស្សធម៌ “ ជាថ្មី នៅក្រុងស៊ីរីអាឡិប
របស់ដែលហៅថា” ប្រឡោះពេលមនុស្សធម៌” មួយលើកថ្មីនៅ ក្រុងអាឡិបដែលជាក្រុងទី២នៅស៊ីរី បំផ្លិចបំផ្លាញដោយការទម្លាក់គ្រាប់បែក នឹងចូលជាធរមាននៅថ្ងៃសុក្រទី៤ វិច្ឆិកា សម្រាប់រយៈពេល១០ម៉ោង ស្របនឹងបទបញ្ជានៃលោកប្រធានាធិបតីរុស្ស៊ី វ៉្លាឌីមៀរ ពូទីន -ការនេះមាននិយាយក្នុងសេចក្តីជូនដំណឹងរបស់កងទ័ពរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
“ការសម្រេចចិត្តដែលមានអនុម័ត គឺដាក់ឲ្យដំណើរការនៅក្រុងអាឡិប អ្វីដែលហៅថា “ប្រឡោះពេលមនុស្សធម៌ “ នៅថ្ងៃសុក្រទី៤វិច្ឆិកា សម្រាប់រយៈពេល១០ម៉ោង ពីម៉ោង៩ ដល់ម៉ោង១៩ ម៉ោងក្នុងស្រុក។ សេចក្តីនេះប្រកាសដោយនាយអគ្គសេនាធិការដ្ឋានកងទ័ពរុស្ស៊ី លោកឧត្តមសេនីយ Valeri Guerassimov។ លោកមេទ័ពរុស្ស៊ីលម្អិតថា សេចក្តីសម្រេចនេះត្រូវបានអនុម័ត គឺដោយសម្របយោបល់ជាមួយអាជ្ញាធរស៊ីរី។
ជាការរំលឹក បទឈប់បាញ់លើកទី១ ក្នុងន័យមនុស្សធម៌ មានរយៈពេល៣ថ្ងៃ ត្រូវបានអនុវត្តដោយកងទ័ពរុស្ស៊ីនិងកងទ័ពស៊ីរី សម្រាប់ក្រុងអាឡិប ដែលប្រមើលនូវរាល់ការឈប់បាញ់ក្នុងក្រុងនេះដែលបែកខ្ញែកជាពីរទៅហើយ បានអស់សុពលភាពនៅថ្ងៃ២២តុលា ហើយមិនបានឃើញមានការជម្លៀសចេញឡើយ ទាំងជនស៊ីវិល ទាំងអ្នករបួស ទាំងពួកឧទ្ទាម។
ច្រកផ្លូវដល់ទៅ៨ បង្កើតឡើងសម្រាប់ការជម្លៀសនោះ ស្រាប់តែស្ថិតនៅអេ សឹងគ្មាននរណាប្រើប្រាស់ឡើយ។
ទោះយ៉ាងណាក្តី ក៏លោកឧត្តមសេនីយ Guerassimov សង្កត់ធ្ងន់ថា គ្រប់តែច្រកផ្លូវ៨នោះ ដែលមានបង្កើតឡើងកាលពីមុន គឺនឹងបន្តដំណើរការដដែល សម្រាប់ការដកខ្លួនចេញពីក្រុងនៃជនស៊ីវិល និងពួកឧទ្ទាម។ គាត់គូសបញ្ជាក់ថា៖ ដោយមកពីដៃគូអាមេរិកាំងរបស់យើងអសមត្ថភាពញែកពួកប្រឆាំងនៅស៊ីរី ឲ្យនៅដាច់ពីពួកភេរវជន បានជារុស្ស៊ីអំពាវនាវដោយត្រង់ផ្ទាល់តែម្តង ទៅពួកមេដឹកនាំនៃពពួកក្រុមប្រដាប់អាវុធ ឲ្យគេឈប់ច្បាំងទៅ ហើយចាកចេញពីក្រុងអាឡេព ដោយនាំទាំងអាវុធខ្លួន ទៅជាមួយទៅចុះ។
កងទ័ពស៊ីរីគាំទ្រដោយការវាយប្រហារពីអាកាសនៃយន្តហោះយោធារុស្ស៊ី កាលពីថ្ងៃ២២កញ្ញា បានវាតប្រតិបត្តិការយ៉ាងខ្លាំងក្លា ទៅលើសង្កាត់ទាំងឡាយនៅប៉ែកខាងកើតក្រុងអាឡិប ដែលកាន់កាប់ដោយពួកឧទ្ទាមតាំងពីឆ្នាំ២០១២មក។
គួរនិយាយថា តាំងពីថ្ងៃ១៨តុលាមក រុស្ស៊ីផ្អាកការវាយប្រហារពីអាកាសទៅលើសង្កាត់ខាងកើតនោះ ក្នុងឋានៈជា “កាយវិការសុឆន្ទៈ“ដើម្បីអនុញ្ញាតឲ្យទីភ្នាក់ងារមនុស្សធម៌នានាជម្លៀសបណ្តាជនស៊ីវិល និងហុចលទ្ធភាពដល់ពួកឧទ្ទាមឲ្យដកខ្លួនចេញទៅដែរ។
លោកប្រមុខការទូតរុស្ស៊ី ស៊ែរហ្គៃ ឡាវ៉្រូវ ក្នុងដំណើរទស្សនកិច្ចម្សិលមិញនៅរដ្ឋធានីក្រិក បានអំពាវនាវក្រុងវ៉ាស៊ីនតោន ឲ្យចុះយ៉ាងឆាប់ទៅជាមួយម៉ូស្គូ កិច្ចព្រមព្រៀងស្តីអំពីប្រទេសស៊ីរី ក្រោយពីរុស្ស៊ីបានប្រកាសជាលើកទី២ទៅហើយ “ប្រឡោះពេលមនុស្សធម៌” នៅក្រុងស៊ីរីអាឡិប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ