ម៉ូស្គូថា ខ្លួនឥតពាក់ព័ន្ធអ្វីណានឹងការវាយប្រហារលើសាលារៀននៅស៊ីរីឡើយ
ក្រសួងការបរទេសរុស្ស៊ីល្ងាចថ្ងៃព្រហស្បត៏ម្សិលមិញតាមរយៈអ្នកនាំពាក្យរបស់ខ្លួនបានថ្លែងបដិសេធប្តូរផ្តាច់ថា ម៉ូស្គូឥតពាក់ព័ន្ធអ្វីណាសោះឡើយនឹងការវាយប្រហារពីអាកាសទៅលើសាលារៀនមួយក្នុងខេត្ត Idleb នៅប៉ែកពាយ័ព្យប្រទេសស៊ីរី ដែលបណ្តាលស្លាប់អស់កុមារ ២២នាក់និងគ្រូបង្រៀន៦នាក់ ដូចដែល អង្គការ UNICEF បានប្រកាសនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ថ្លែងក្នុងសន្និសីទកាសែត អ្នកនាំពាក្យផ្លូវការនៃក្រសួងការបរទេសរុស្ស៊ីលោកស្រី Maria Zakharova លើកឡើងថា ៖ ប្រព័ន្ធផ្សព្វផ្សាយខ្លះនៃលោកអារ៉ាបនិងបស្ចិមលោក “នាំគ្នាចោទរុស្ស៊ីភ្លាមភ្លែតក្នុងសោកនាដកម្មនេះ ចោទកងអាកាសរុស្ស៊ីនិងកងទ័ពស៊ីរីទាំងប្រកាសថាការទម្លាក់គ្រាប់បែកនេះ គឺធ្វើដោយរុស្ស៊ីនិងស៊ីរី។ នេះជាការចុះផ្សាយ បោកប្រាសទាំងរស់ដ្បិតរុស្ស៊ីឥតពាក់ព័ន្ធអ្វីណាសោះឡើយនឹងសោកនាដកម្មគួរឲ្យរន្ធត់នេះ” ។
លោកស្រីអ្នកការទូតរុស្ស៊ីនេះ ក៏បន្ថែមថាម៉ូស្គូទាមទារឲ្យអន្តរជាតិផ្តោតការយកចិត្តទុកដាក់ជាអតិបរិមាទៅលើសោកនាដកម្មនេះ ហើយបើកការស៊ើបអង្កេតដោយកុំបង្អែបង្អង់ឡើយ។លោកស្រី Zakharova លម្អិតថារដ្ឋមន្ត្រីក្រសួងការពារជាតិរុស្ស៊ី កំពុងសិក្សាទិន្នន័យដែលមានដើម្បីក្នុងពេលឆាប់ៗខាងមុខធ្វើសេចក្តីថ្លែងការណ៍ជុំវិញរឿងនេះ។
ជាការកត់សម្គាល់អង្គការ UNICEF ដោយផ្សាយដំណឹងអំពីការវាយប្រហារពីអាកាសទៅលើសាលារៀនក្នុងខេត្ត Idleb នៅស៊ីរីដែលបានសម្លាប់កុមារអស់២២នាក់និងគ្រូបង្រៀនអស់៦នាក់ឥតចង្អុលឲ្យឃើញឡើយតើនរណាជាអ្នកវាយប្រហារ។ ចំណែកខេត្ត Idlebនោះបច្ចុប្បន្នស្ថិតនៅក្រោមការត្រួតត្រានៃពួកឧទ្ទាមគ្រប់ស្បែកមុខ។
គួររំលឹកថា កងអាកាសរុស្ស៊ី បានចូលខ្លួនអន្តរាគមនៅស៊ីរី តាំងពីថ្ងៃ៣០កញ្ញាឆ្នាំ២០១៥មកទាំងអះអាងថាបំពេញប្រតិបត្តិការវាយប្រហារគឺតែទៅលើ “ ទីតាំងពួកភេរវជន” ប៉ុណ្ណោះ។ក្នុងសន្និសីទកាសែតនោះ អ្នកនាំពាក្យក្រសួងការបរទេសរុស្ស៊ីក៏បានឲ្យដឹងថាថ្ងៃសុក្រទី២៨តុលានៅរដ្ឋធានីម៉ូស្គូនឹងប្រព្រឹត្តទៅជំនួបត្រីភាគីនៃប្រមុខការទូតរុស្ស៊ីអ៊ីរ៉ង់ ស៊ីរី ដើម្បីពិភាក្សាអំពីស្ថានការណ៍ក្តៅគគុកនៅស៊ីរី។ រុស្ស៊ីនិងអ៊ីរ៉ង់តែងផ្តល់ការគាំទ្រផ្នែកហិរញ្ញវត្ថុនិងយោធាដល់របបលោកប្រធានាធិបតីស៊ីរី Bashar al Assad។
តាមតួលេខអ.ស.ប. ក្នុងសង្គ្រាមដែលឆាបឆេះនៅស៊ីរីអស់ជាង៥ឆ្នាំមកហើយ មានពលរដ្ឋប្រទេសនេះ ធ្លាក់ខ្លួនស្លាប់អស់ជាង ៣សែននាក់ឯណោះ រួចពីក្នុងចំណោមបណ្តាជន ១៦លាននាក់នៃប្រទេសនេះ មានពាក់កណ្តាល បានក្លាយជាជនបន្លាស់ទីទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ