ភេរវកម្មនៅកាប៊ូលបានសម្លាប់មនុស្សយ៉ាងតិច២៥នាក់ក្នុងនោះម្នាក់ជាអ្នកថតរូបរបស់ AFPនិងអ្នកកាសែត៥រូប
ទីក្រុងកាប៊ូលប្រទេសអាហ្វហ្កានីស្ថាន ត្រូវបានរងនូវការវាយប្រហារដោយបំផ្ទុះគ្រាប់បែកផ្ទួនៗគ្នា របស់អង្គការរដ្ឋអ៊ីស្លាមជីហាតនៅព្រឹកព្រលឹមថ្ងៃចន្ទទី៣០មេសានេះ ។ ការវាយប្រហារភេរវកម្មត្រួតគ្នានេះ បានសម្លាប់ជីវិតមនុស្សយ៉ាងតិច ២៥នាក់ក្នុងនោះ ម្នាក់ជាអ្នកថតរូបម្នាក់របស់ទីភ្នាក់ងារសាព័ត៌មាន បារាំង AFP និង៥នាក់ផ្សេងទៀតជាអ្នកកាសែត ក៏ព្រមទាំង បណ្តាលឲ្យមានអ្នករងរបួសជាង២០នាក់ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
កាប៊ូលរដ្ឋធានីប្រទេសអាហ្វហ្កានីស្ថាន ជាថ្មីម្តងទៀត ត្រូវទទួលរងដោយការវាយប្រហារបំផ្ទុះគ្រាប់បែកផ្ទួនៗគ្នារបស់ក្រុមអង្គការរដ្ឋអ៊ីស្លាម នៅព្រឹកព្រលឹមថ្ងៃចន្ទទី៣០មេសានេះ។ នៅមុនម៉ោង៨ព្រឹក គេឮសូរការផ្ទុះគ្រាប់បែកលើកទីមួយ ដោយភេរវជនអត្តឃាតមួយរូបដែលជិះមូតូ បានធ្វើការបំផ្ទុះគ្រាប់បែកនៅត្រង់ម្តុំផ្លូវដែលមានប្រជាជនយ៉ាងកុះករ នាភាគខាងត្បូងរដ្ឋធានីគឺនៅចម្ងាយ តែ២ឬ៣ម៉ែត្រប៉ុណ្ណោះពីទីស្នាក់ការរបស់ក្រសួងស៊ើបការសម្ងាត់របស់អាហ្វាហ្កានីស្ថាន។
ជាង២០នាទីក្រោយមកទៀត នៅខណៈដែលក្រុមអ្នកសង្គ្រោះបានធ្វើដំណើរទៅដល់ទីកន្លែងកើតហេតុណ៍ ស្រាប់តែគេឮសូរការផ្ទុះគ្រាប់បែកជាលើកទីពីរទៀត។
បើយោងតាមប្រភពសុវត្ថិភាពមួយ ភេរវជនអត្តឃាតដែលប្រដាប់ដោយកាម៉េរ៉ាថតរូបនិងមានផ្ទាំងស៊ីប គឺក្រុម អ្នកសារព័ត៌មាន បានលួចសសៀរ ចូលទៅបន្លំខ្លួននៅក្នុងរង្វង់អ្នកកាសែតនិងអ្នកថតរូប។ នៅពេលនោះហើយដែល ភេរវជន បានបំផ្ទុះគ្រាប់បែក ខណៈពេលដែលចូលទៅដល់គោលដៅភ្លាម។
នៅក្នុងការវាយប្រហារនេះ ក៏មានអ្នកកាសែត៥រូប ត្រូវបានស្លាប់ ក្នុងចំណោមនោះ ម្នាក់ ឈ្មោះ Shah Marai ដែលជាប្រធានថតរូបនៃការិយាល័យរបស់ទីភ្នាក់ងារព័ត៌មាន បារាំង (AFP) នៅទីក្រុងកាប៊ូល ក៏ព្រមទាំងអ្នកកាសែតមួយរូបទៀតនៃបណ្តាញ ទូទស្សន៍ជាតិអាហ្វហ្កានីស្ថានមួយឈ្មោះ TOLO news។
សូមបញ្ជាក់ថា ការវាយប្រហារបំផ្ទុះគ្រាប់បែកនៅក្រុងកាប៊ូល នាព្រឹកមិញនេះ ត្រូវបានក្រុមអង្គការរដ្ឋអ៊ីស្លាមជីហាត ប្រកាសថាជាស្នាដៃរបស់ពួកគេ។
នៅថ្ងៃចន្ទនេះដែរ -កុមារអាហ្វហ្កានីស្ថាន យ៉ាងតិច ចំនួន ១១ នាក់ដែលនាំគ្នាទៅចោមរោមនៅជុំវិញ ក្បួនរថយន្តរបស់អូតង់មួយខ្សែ ត្រូវបានស្លាប់នៅក្នុងអំពើភេរវកម្មអត្តឃាតមួយដែរ ។ អំពើភេរវកម្មអត្តឃាតដែលប្រឆាំងនឹងក្បួនរថយន្តអង្គការអូតង់នៅជិតព្រលានយន្តហោះ Kandahar ភាគខាងត្បួងអាហ្វហ្កានីស្ថាននេះ ក៏បានបណ្តាលឲ្យមានអ្នករងរបួស១៦នាក់ផ្សេងទៀត ក្នុងនោះ មានទាហានរបស់អូតង់សញ្ជាតិរ៉ូមានី ៥ នាក់ និង ប៉ូលីសអាហ្វហ្កានីស្ថាន ពីររួប។
ជាអំពើភេរវកម្មមួយដែលនៅពុំទាន់មានខាងក្រុមណាមួយ ប្រកាសថាជាស្នាដៃរបស់ខ្លួននៅឡើយទេនាខណៈនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ