ភេរវកម្មអត្តឃាតប្រឆាំងលើក្រុមមេដឹកនាំសាសនាអ៊ីស្លាមនៅអាហ្វហ្កានីស្ថាន
នៅអាហ្វហ្កានីស្ថាន អំពើភេរវកម្មអត្តឃាតមួយកាលពីថ្ងៃចន្ទម្សិលមិញ បានសម្លាប់ជីវិតមនុស្សចំនួន១៤នាក់នៅភាគខាងលិចនៃទីក្រុងកាប៊ូល។ ជាការវាយប្រហារមួយដែលសំដៅប្រឆាំងទៅលើការរួមប្រជុំរបស់មេដឹកនាំសាសនាអ៊ីស្លាមនៅក្នុងប្រទេស និងបន្ទាប់ពី មេដឹកនាំសាសនា បានប្រកាសពីសេចក្តីសម្រេចចិត្តមួយរបស់ខ្លួននៅក្នុងការប្រយុទ្ធប្រឆាំងទល់នឹងអំពើភេរវនិយមនៅអាហ្វហ្កានីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ភេរវករ បានបំផ្ទុះគ្រាប់បែកដែលពាក់ជាប់នៅក្នុងខ្លួន នៅខណៈពេលធ្វើដំណើរទៅដល់ច្រកចូលនៃទីតាំងបោះជំរំសំពត់ ដែលនៅទីនោះ មានការរួមប្រជុំដ៏ធំមួយរបស់មេដឹកនាំសាសនាអ៊ីស្លាមជាច្រើនពាន់នាក់ដែលមកពី៣៤ខេត្តក្នុងប្រទេសអាហ្វហ្កានីស្ថាន។
អំពើភេរវកម្មនៅថ្ងៃចន្ទម្សិលមិញនេះ បានសម្លាប់ជីវិតមនុស្សចំនួន ១៤នាក់ដែលក្នុងចំណោម នោះ មានមេដឹកនាំសាសនាអ៊ីស្លាម ៧នាក់ ភ្នាក់ងារសន្តិសុខ ៤នាក់និងជន៣ នាក់ផ្សេងទៀត-នេះបើយោងតាមអ្នកទទួលខុសត្រូវមួយរូបរបស់រដ្ឋាភិបាលអាហ្វហ្កានីស្ថាន។
ចំណែកក្រសួងសុខាភិបាលអាហ្វហ្កានីស្ថានវិញ បានរាប់ចំនួនអ្នកត្រូវរងរបួសដែលមានគ្នាចំនួន១៨នាក់នៅក្នុងមន្ទីរពេទ្យរបស់ខ្លួន។ រីឯអ្នកនាំពាក្យរបស់ក្រសួងមហាផ្ទៃវិញ ក៏បានគូសបញ្ជាក់ប្រាប់ដល់ទីភ្នាក់ងារព័ត៌មានបារាំង AFP ដែរថា ជនរងគ្រោះភាគច្រើនរស់នៅក្នុងសង្កាត់នានានៃទីក្រុងកាប៊ូល ក៏ប៉ុន្តែក៏អាចមានដែរនៅក្នុងចំណោមពួកភ្ញៀវ ដែលបានអញ្ជើញមកចូលរួមនៅក្នុងការប្រជុំដ៏ធំនេះដែរ។
យោងតាមប្រភពដដែលខាងលើ ភេរវករ បានលួចបន្លំខ្លួនចូលមកជាមួយពួកភ្ញៀវ មុននឹងធ្វើការបំផ្ទុះគ្រាប់បែកនៅខណៈពេលដែលមេដឹកនាំសាសនាអ៊ីស្លាមនានា កំពុងត្រៀមខ្លួនចាកចេញពីទីកន្លែងរួមប្រជុំដែលស្ថិតនៅភាគខាងលិចទីក្រុងកាប៊ូលក្នុងពេលចុងរសៀល។
គួរបញ្ជាក់ថា ជំរំសំពត់ នោះ ត្រូវបានគេបោះទីតាំង នៅចំច្រកចូលនៃសួនច្បាររបស់សាលាពហុបច្ចេកវិជ្ជា(Ecole Polytechnique) ដែលស្ថិតនៅជិតសាកលវិទ្យាល័យមួយនៅទីក្រុងកាប៊ូលនិងនៅពីខាងក្រោយទីតាំងនៃសាលាយោធាអាហ្វហ្កានីស្ថាន។
ក្នុងពេលនេះ ពុំទាន់មានខាងចលនាណាមួយ ប្រកាសទទួលស្តាល់លើការវាយប្រហារនាព្រឹកថ្ងៃចន្ទម្សិលមិញនេះទេ ក៏ប៉ុន្តែចលនាតាលីបង់ បានប្រកាសបដិសេធតាមរយៈសារ Twitter របស់ខ្លួនរួចស្រេចដែរថា ចលនាតាលីបង់ ពុំមានជាប់ពាក់ព័ន្ធអ្វីទេនៅក្នុងអំពើភេរវកម្មអត្តឃាតនេះ។
គួររំលឹកដែរថា សាខារបស់អង្គការរដ្ឋអ៊ីស្លាមនៅក្នុងតំបន់ នៅតែមានសកម្មភាពយ៉ាងខ្លាំងក្លានៅក្នុងទីក្រុងកាប៊ូលដែលបានក្លាយទៅជាទីកន្លែងមួយប្រកបដោយគ្រោះថ្នាក់យ៉ាងខ្លាំងបំផុតសំរាប់ប្រជាពលរដ្ឋស៊ីវីលនៅក្នុងប្រទេសអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ