អ៊ីស្រាអែលជូនដំណឹងអំពីការចុះហត្ថលេខាលើកិច្ចសន្យាមួយដើម្បីអភិវឌ្ឈនិងផលិតគ្រាប់មីស៊ីល
ក្រសួងការពារជាតិប្រទេសអ៊ីស្រាអែល ទើបបានជូនដំណឹងកាលពីថ្ងៃចន្ទម្សិលមិញ អំពីការចុះហត្ថលេខាលើកិច្ចសន្យាដ៏សំខាន់មួយ ជាមួយនឹងក្រុមហ៊ុនជាតិខាងផ្នែកផលិតអាវុធយុទ្ធភ័ណ្ឌ ដើម្បីអភិវឌ្ឈនិងផលិតគ្រាប់មីស៊ីលដែលអាចបាញ់ទៅដល់គ្រប់ចំណុចគោលដៅនៅក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
“កិច្ចសន្យាអភិវឌ្ឈនិងផលិតគ្រាប់មីស៊ីលរបស់ក្រសួងការពារជាតិអ៊ីស្រាអែល មានតម្លៃខ្ពស់រហូតទៅដល់ជាច្រើនរយលាន Shekels រូបិយប័ណ្ឌរបស់ជាតិអ៊ីស្រាអែល” នេះបើយោងតាមក្រសួងការពារជាតិអ៊ីស្រាអែលនៅក្នុងសេចក្តីជូនដំណឹងមួយរបស់ខ្លួនកាលពីម្សិលមិញ ដោយពុំបានគូសបញ្ជាក់លាស់ទេនៅលើប្រភេទអាវុធដែលប្រទេសខ្លួនបានបញ្ជាទិញ។
គួរបញ្ជាក់ថា “ អ៊ីស្រាអែល នៅតែប្រឈមមុខនឹងការគំរាមកំហែងខាងផ្នែកសន្តិសុខជានិច្ច និងបានចាត់ទុកប្រទេសខ្លួនថា នៅតែជាគោលដៅគន្លិះ របស់ប្រទេសអ៊ីរ៉ង់-អ៊ីរ៉ង់ដែល បំពាក់ទៅដោយអាវុធនុយក្លេអ៊ែរ។
សព្វថ្ងៃនេះ អ៊ីស្រាអែល កំពុងស្ថិតនៅក្នុងស្ថានភាពសង្គ្រាម ជាមួយប្រទេសជិតខាងខ្លួនចំនួន ២ គឺ ស៊ីរី និងលីបង់។ មិនតែប៉ុណ្ណោះ អ៊ីស្រាអែល ក៏ កំពុងតែនៅប្រឈមមុខ នឹងអរិភាពនានា ជាមួយ គណបក្សលីបង់ Hezbollah ប្រកាន់អ៊ីស្លាមនិកាយស៊ីអ៊ីត នៅប៉ែកខាងជើងប្រទេស ក៏ព្រមទាំងចលនាអ៊ីស្លាមជ្រុលនិយមប៉ាឡេស្ទីន ហាម៉ាសនៅប៉ែកខាងត្បូងប្រទេស។
ក្នុងបច្ចុប្បន្ននេះ អ៊ីស្រាអែល បានក្លាយទៅជាប្រទេសមួយដែលមានសមត្ថភាពរួចទៅហើយ ក្នុងការផលិតគ្រាប់មីស៊ីលអន្តរទី្វប នៅក្នុងចំណោមបណ្តាប្រទេសដ៏ជឿនលឿនខ្លាំងផ្សេងៗទៀតនៅក្នុងតំបន់ ដោយសារតែអ៊ីស្រាអែល មានជំនួយនិងហិរញ្ញប្បទានពីខាងសហរដ្ឋអាមេរិក រួមទាំង ផលិតកម្មរបស់ជាតិខ្លួន។
សូមបញ្ជាក់ថា មីស៊ីលដែលរដ្ឋអ៊ីស្រាអែល បានបញ្ជាទិញនោះ នឹងត្រូវផលិតដោយក្រុមឧស្សាហកម្មរបស់យោធាអ៊ីស្រាអ៊ែល(IMI) ដោយមាន សហប្រតិបត្តិការណ៍ជាមួយនឹងអាជ្ញាធរ ទទួលបន្ទុកខាងផ្នែកអភិវឌ្ឈប្រព័ន្ធសពា្វវុធរបស់ក្រសួងការពារជាតិផង។
យោងតាមក្រសួងខាងលើនេះដែរ គ្រាប់មីស៊ីលមួយភាគ កំពុងតែត្រូវបានគេផលិតហើយ ចំណែកគ្រាប់មីស៊ីលដទៃទៀត ក៏កំពុងតែស្ថិតនៅក្នុងតំណាក់កាលស្រាវជ្រាវនិងអភិវឌ្ឈ។
លោក Avigdor Lieberman រដ្ឋមន្ត្រីក្រសួងការពារជាតិអ៊ីស្រាអែល នៅក្នុងសេចក្តីជូនដំណឹងមួយ បានថ្លែងដោយមូតនភាពថា បច្ចុប្បន្ននេះ អ៊ីស្រាអែល មាននិងក៏កំពុងតែ អភិវឌ្ឈសពា្វវុធរបស់ខ្លួនដែលមានឥទ្ធិពលកម្លាំងខ្លាំងក្លានិងប្រសិទ្ធិភាព ដែលអនុញ្ញាតឲ្យ អ៊ីស្រាអែល ធ្វើការពង្រឹងបាននូវកិច្ចការពារជាតិខ្លួនកាន់តែរ៉ឹងមាំថែមទៀត ចាប់ពីពេលនេះរហូតទៅដល់ប៉ុន្មានឆ្នាំខាងមុខនៅក្នុងទូទាំងតំបន់។
អ៊ីស្រាអែល មានគ្រាប់មីស៊ីលធុន Jéricho រួចទៅហើយ ដែលអាចបាញ់បានរហូតទៅដល់ចម្ងាយ៤ ៨០០គម និងដែលអាចបំពាក់ដោយក្បាលគ្រាប់នុយក្លេអ៊ែរទៀតផង។ ហើយនៅក្នុងចំណោមគ្រាប់ម៉ីស៊ីលផ្សេងៗទៀតដែលកងទ័ពអ៊ីស្រាអែលមានរួចទៅហើយនោះ ក៏មាន មីស៊ីល Delilah និង Lora ដែល អាច បាញ់បាន ចម្ងាយរវាង ២៥០ គម និង ២៨០ គម រួមទាំងប្រព័ន្ធការពារប្រឆាំងគ្រាប់មីស៊ីលទៀតផង ដែលអ៊ីស្រាអែល អភិវឌ្ឈរួមគ្នាជាមួយសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ