កងទ័ពស៊ីរីទៅជួយក្រុមគួដតាមសំណូមពរ តែតួកគីក្តៅក្រហាយខ្លាំង
សេចក្តីសម្រេចរបស់លោកដូណាល់ ត្រាំ គ្រោងដកកងទ័ពអាមេរិកចេញពីស៊ីរី កំពុងតែធ្វើឱ្យការចងសម្ព័ន្ធលើសមរភូមិ រេប្តូរទិសឬ ?! នៅថ្ងៃសុក្រនេះ យោធារបស់រដ្ឋាភិបាលស៊ីរី ដឹកនាំដោយលោក បាស្ហារ អាល់អាសាដ បានចូលទៅដល់តំបន់Manbej ភាគខាងជើង ប្រទេស តាមសម្រែកសុំជំនួយរបស់កងកម្លាំងយុទ្ធគួដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ដំណឹងនេះ ធ្លាក់មកជួនចំពេលដែលកងកម្លាំងរដ្ឋាភិបាលស៊ីរីបាន និងកំពុងយកឈ្នះជាបន្តបន្ទាប់ លើផ្នែកយោធាផង និងហាក់កំពុងបំបែកភាពឯកាការទូតផង ៖ តាមរយៈការបើកសម្ពោធស្ថានទូតអេមីរ៉ាតអារ៉ាប់រួមនៅក្រុងដាម៉ាសជាឧទាហរណ៍ជាក់ស្តែង។
“កងកម្លាំងរួមនៃយោធាស៊ីរី បានចូលទៅដល់មេនបេហ្ស Manbej ហើយ ! នេះបើតាមសេចក្តីថ្លែងការណ៍របស់យោធាស៊ីរី ដែលមិនបញ្ជាក់លម្អិតទេថាតើកងទ័ពបានចូលទៅដល់ខាងក្នុងក្រុងឬយ៉ាងណាទេ”។ ប៉ុន្តែបើតាមអង្គការអ្នកសង្កេតការណ៍សិទ្ធិមនុស្សស៊ីរី កងកម្លាំងរដ្ឋាភិបាល និងយុទ្ធជនជាសម្ព័ន្ធមិត្ត ត្រូវបានដាក់ពង្រាយនៅប៉ែកខាងជើងនិងខាងកើតនៃក្រុង ដើម្បីបង្កើតជាតំបន់ទ្រនាប់ខណ្ឌចែករវាងដែនដីរបស់ពួកឧទ្ទាមគាំទ្រដោយតួកគី និងតំបន់ក្រុងManbej ក្នុងបរិមាណជាសរុបជាង៣០០នាក់។
នេះជារបត់ថ្មីមួយ សម្រាប់ទំនាក់ទំនងដ៏ស្មុគស្មាញរវាងកងកម្លាំងគួដ និងកងទ័ពរដ្ឋាភិបាលស៊ីរី ដែលពេលមុនធ្លាប់ទាំងចាត់ទុកយុទ្ធជនគួដ ជាក្រុមក្បត់ផងនោះ។ ប៉ុន្តែដើម្បីអាចរក្សានិងការពារទីតាំងព្រមទាំងតំបន់Manbej ពីការគំរាមកំហែងរបស់តួកគី យុទ្ធជនគួដត្រូវតែបង្ខំចិត្តងាកទៅរកលោកបាស្ហារអាល់អាសាដ។ តាំងពីពាក់កណ្តាលខែធ្នូមក តួកគីបានសន្យាបើកយុទ្ធនាការប្រឆាំងនឹងពួកគួដ ដោយបញ្ជូនកងកម្លាំងបន្ថែមជាច្រើនទៅឈរជើងនៅតាមព្រំដែន។ ពាក្យគំរាមកំហែងនេះ រឹតតែគួរឱ្យព្រឺខ្លាចទៀត សម្រាប់យុទ្ធជនគួដ នៅពេលលោកដូណាល់ ត្រាំ បានប្រកាស ដក កងទ័ពចេញពីស៊ីរី ហើយផ្តល់កិច្ចសហប្រតិបត្តិការដោះស្រាយវិបត្តិស៊ីរីឱ្យតួកគី។
ប៉ុន្តែក្រុមគួដគ្មានសិទ្ធិហៅក្រុងដាម៉ាសឱ្យមកជួយទេ ! នេះជាប្រតិកម្មប្រកបដោយកំហឹងរបស់តួកគី ដោយបានចាត់ការហៅសុំជំនួយពីរដ្ឋាភិបាលស៊ីរី ថាជាទង្វើបង្កហេតុ។ សម្រាប់មូស្គូ ដែលជាសម្ព័ន្ធមិត្តចាក់ទឹកមិនលិចរបស់ស៊ីរីវិញ វត្តមានរបស់យោធារដ្ឋាភិបាលក្នុងតំបន់Manbej នឹងធ្វើឱ្យស្ថានការណ៍ប្រទេសមានស្ថិរភាព។ បញ្ហានេះនឹងត្រូវលើកទៅពិភាក្សាឱ្យបានកាន់តែស៊ីជម្រៅ និងឱ្យស៊ីចង្វាក់គ្នា នៅពេលរដ្ឋមន្ត្រីក្រសួងការពារជាតិ និងការបរទេសតួកគីទៅបំពេញទស្សនកិច្ចនៅម៉ូស្គូ នាថ្ងៃសៅរ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ