ក្រុមប្រឆាំងស៊ីរី បដិសេធមិនទទួលយកជំនួយយោធាពីរុស្ស៊ី
រុស្ស៊ីមានជំហរមិនច្បាស់លាស់ ទាំងផ្នែកនយោបាយ និងយោធា។ បន្ទាប់ពីប្រកាសគាំទ្រ ការពាររដ្ឋាភិបាលស៊ីរី របស់លោកបាស្ហា អាល់អាសាដ ទីក្រុងម៉ូស្គូ បានបញ្ជាក់ចង់ផ្តល់ជំនួយផងដែរ ទៅក្រុមប្រឆាំងស៊ីរី ដែលជាសត្រូវរបស់ ប្រធានាធិបតីស៊ីរី។ ជំនួយយោធា របស់រុស្ស៊ី ត្រូវបានក្រុមប្រឆាំងស៊ីរីរុញច្រាន មិនទទួល យក កាលពីថ្ងៃសៅរ៍ទី ២៤ តុលា។
ចុះផ្សាយនៅថ្ងៃ៖
ស្តាប់ - ០២:២២
ក្រុមប្រឆាំងស៊ីរី ដែលកំពុងជាប់ដៃប្រយុទ្ធប្រឆាំង ទាំងក្រុមជីហាត និងទាហានរដ្ឋាភិបាលស៊ីរីបានបដិសេធ មិនទទួលយកទាំង ជំនួយយោធារុស្ស៊ី និងសំណើរបស់រុស្ស៊ី ដែលចង់ឲ្យមានការរៀបចំការបោះឆ្នោត នាពេលខាងមុខ នៅស៊ីរី។
កាលពីថ្ងៃសៅរ៍ នៅក្នុងបទសម្ភាសន៍ជាមួយ ទូរទស្សន៍រុស្ស៊ី ប្រមុខការបរទេសរុស្ស៊ី លោកSergueï Lavrov បានមានប្រសាសន៍ថា យន្តហោះចម្បាំងរុស្ស៊ី ត្រៀមខ្លួន ដើម្បីជួយឃុំគ្រងក្រុមទាហានស៊ីរី សេរី ក្នុងការវាយប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាម។ លោកLavrov ដែលទើបបានចូលរួមប្រជុំជាមួយភាគីអាមេរិក អារ៉ាប៊ី សាអូឌីត និងតួកគី កាលពីថ្ងៃសុក្រ នៅទីក្រុងវីយ៉ែន នៅបានបន្ថែមថា រុស្ស៊ីមានក្តីសង្ឃឹមចង់អូសទាញគ្រប់ភាគី ជម្លោះនយោបាយស៊ីរីឲ្យចូលតុចរចានៅក្នុងពេលឆាប់ៗខាងមុខ។
សម្រាប់ប្រមុខការបរទេសរុស្ស៊ី វាចាំបាច់ណាស់ ដែលគេត្រូវរៀបចំការបោះឆ្នោតប្រធានាធិបតី នៅ ប្រទេសស៊ីរី។ នៅឆ្នាំ២០១៤ នៅពេលប្រទេសកំពុងជួបសង្រ្គាមស៊ីវិល ស៊ីរីបានរៀបចំការបោះឆ្នោតប្រធានាធិបតី ដោយគ្មានការចូលរួមពីក្រុមប្រឆាំង និងដែលទទួលរិះគន់ពីសហគមន៍អន្តរជាតិ។ លោកបាស្ហារ អាល់អាសាដបានឈ្នះឆ្នោត ធ្វើជាប្រធានាធិបតីសម្រាប់អាណត្តិ៧ឆ្នាំ។
នៅថ្ងៃអាទិត្យ អ្នកតំណាងរាស្រ្តរុស្ស៊ីដែលធ្វើដំណើរទៅទីក្រុងដាម៉ាស បាននិយាយប្រាប់ទីភ្នាក់ងារព័ត៌មានបារាំងAFP ថា ប្រធានាធិបតីស៊ីរី បាននិយាយថា ត្រៀមខ្លួនរៀបចំការបោះឆ្នោតប្រធានាធិបតី ប៉ុន្តែ នៅក្នុងកាលៈទេសៈមួយ ដែលស៊ីរី រួចផុតពីកណ្តាប់ដៃរបស់ក្រុមជីហាតនៃអង្គការរដ្ឋអ៊ីស្លាមតែប៉ុណ្ណោះ។
ក្រុមប្រឆាំងស៊ីរីមិនថា ក្រុមយោធា និងគណបក្សនយោបាយ បានទាត់ចោលសំណើរបស់រុស្ស៊ី។ លោកសាមៀរ ណាស្ហារ សមាជិកម្នាក់របស់សម្ព័ន្ធជាតិស៊ីរីដែលជាក្រុមអ្នកនយោបាយស៊ីរី នៅបរទេស បានចាត់ទុករុស្ស៊ី ថា គ្មានយល់ស្ថានភាពជាក់ស្តែងនៅស៊ីរី សូម្បីបន្តិច។ តើគេអាចរៀបចំការបោះឆ្នោតបានយ៉ាងម៉េច? ប្រជាជនស៊ីរីរាប់លាននាក់បានរត់ភៀសខ្លួន ពីសង្រ្គាម ចំណែកទីក្រុង ហេដ្ឋារចនាសម្ព័ន្ធត្រូវបំផ្លាញទាំងស្រុង។
វីរសេនីយ៍ អាម៉ាដ សាអ៊ូដ វិញ ដែលជាអ្នកនាំពាក្យរបស់កងពលទី ១៣ របស់ទាហានស៊ីរី សេរី ដែលគាំទ្រផ្នែកយោធាដោយប្រទេសលោកខាងលិចបាននិយាយបែបចំអកទៅវិញថា “រុស្ស៊ីចង់សហការ ជាមួយក្រុមប្រឆាំង ប៉ុន្តែ ជាមួយគ្នានោះ នៅតែបន្តជួយកងទ័ពរដ្ឋាភិបាល ដើម្បីសម្លាប់ក្រុមប្រឆាំងស៊ីរី។ គេពិតជាមិនអាចយល់ពីជំហររបស់រុស្ស៊ីទាល់តែសោះ”។
រុស្ស៊ី បានផ្តើមប្រតិបត្តិការទ័ពអាកាសនៅស៊ីរី តាំងពីថ្ងៃទី ៣០កញ្ញាមក ក្នុងគោលដៅ វាយប្រហារទៅលើក្រុមជីហាតនៃអង្គការរដ្ឋអ៊ីស្លាម និងក្រុមភេរវនិយម ដែលស្ថិតនៅក្នុងបញ្ជីរបស់រដ្ឋាភិបាលបាស្ហា អាល់អាសាដ។ ប៉ុន្តែ តាមអ្នកនាំពាក្យរបស់ទាហានស៊ីរីសេរី ៨០ភាគរយនៃការវាយប្រហាររបស់យន្តហោះចម្បាំងរុស្ស៊ី គឺផ្តោតទៅលើតាំងរបស់ទាហានក្រុមប្រឆាំង និងក្រុមប្រដាប់អាវុធ អ៊ីស្លាម ដែលមិនជ្រុលនិយម ដែលកំពុងប្រយុទ្ធប្រឆាំងនឹងទ័ពរដ្ឋាភិបាលស៊ីរី។ “បើចង់ជួយទាហានស៊ីរីសេរី រុស្ស៊ី ត្រូវបញ្ឈប់ជាបន្ទាន់ ការវាយប្រហារទៅលើកងទ័ពប្រឆាំងស៊ីរី” នេះជាការអំពាវនាវរបស់សម្ព័ន្ធជាតិស៊ីរី នៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ