គណៈប្រតិភូបារាំងមួយក្រុមធំធ្វើដំណើរទៅបំពេញទស្សនកិច្ចនៅអ៊ីរ៉ង់
គណៈប្រតិភូបារាំងមួយក្រុមធំ ដែលដឹកនាំដោយរដ្ឋមន្រ្តី ព្រមទាំងថ្នាក់ដឹកនាំក្រុមហ៊ុនសហគ្រាសធំៗជាច្រើន បានធ្វើដំណើរទៅបំពេញទស្សនកិច្ចនៅក្នុងប្រទេសអ៊ីរ៉ង់នៅថ្ងៃចន្ទនេះ។ នេះគឺជាដំណើរទស្សនកិច្ចលើកដំបូងរបស់មន្រ្តីនិងអ្នកជំនួញបារាំង ចាប់តាំងពីមានការចុះកិច្ចព្រមព្រៀងនុយក្លេអ៊ែរអ៊ីរ៉ង់ ហើយដំណើរទស្សនកិច្ចនេះត្រូវបានធ្វើឡើង ក្នុងគោលដៅស្វះស្វែងរកឱកាសធ្វើជំនួញ នៅក្រោយពេលដែលទណ្ឌកម្មអន្តរជាតិត្រូវដកចេញពីអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
គណៈប្រតិភូបារាំងដែលទៅបំពេញទស្សនកិច្ចក្នុងប្រទេសអ៊ីរ៉ង់ពីថ្ងៃចន្ទដល់ថ្ងៃពុធនេះ ដឹកនាំដោយរដ្ឋមន្រ្តីក្រសួងកសិកម្មនិងជាអ្នកនាំពាក្យរដ្ឋាភិបាល រដ្ឋលេខាធិការទទួលបន្ទុកផ្នែកពាណិជ្ជកម្ម ព្រមទាំងថ្នាក់ដឹកនាំក្រុមហ៊ុនសហគ្រាសធំតូច គិតជាសរុប ចំនួន ១៥០នាក់។
នៅក្នុងអំឡុងដំណើរទស្សនកិច្ចរយៈពេល ៣ថ្ងៃនេះ គណៈប្រតិភូបារាំងនឹងជួបជជែកជាមួយមន្រ្តីរដ្ឋាភិបាលអ៊ីរ៉ង់ ដែលទទួលបន្ទុកកិច្ចការសេដ្ឋកិច្ច និងពាណិជ្ជកម្ម ចូលរួមក្នុងវេទិកាពាណិជ្ជកម្មបារាំង-អ៊ីរ៉ង់ និងជាពិសេសធ្វើពិធីសម្ពោធបើកការិយាល័យពាណិជ្ជកម្មបារាំងប្រចាំទីក្រុងតេហេរ៉ង់ នៅថ្ងៃអង្គារ ២២កញ្ញា។
អគ្គនាយករងក្រុមហ៊ុន Vinci និងជាអនុប្រធានសមាគមនយោជកបារាំងបានថ្លែងនៅមុនពេលចេញដំណើរថា គោលដៅចម្បងបំផុតនៃដំណើរទស្សនកិច្ចនេះ គឺដើម្បីប្រជែងដណ្តើមទីផ្សារនៅអ៊ីរ៉ង់។
គួរបញ្ជាក់ថា បារាំងធ្លាប់តែជាដៃគូពាណិជ្ជកម្មដ៏ធំរបស់អ៊ីរ៉ង់ ក៏ប៉ុន្តែ ការដោះដូរពាណិជ្ជកម្មទ្វេភាគីរវាងប្រទេសទាំងពីរត្រូវបានធ្លាក់ចុះ ពី ៤ពាន់លានអឺរ៉ូក្នុងមួយឆ្នាំ កាលពីឆ្នាំ២០០៤ មកនៅត្រឹមតែប្រមាណជា ៥០០លានអឺរ៉ូប៉ុណ្ណោះ នៅឆ្នាំ២០១៣ ហើយនេះ គឺដោយសារតែមានទណ្ឌកម្មដែលសហគមន៍អន្តរជាតិដាក់លើអ៊ីរ៉ង់ ក្នុងសំណុំរឿងនុយក្លេអ៊ែរ។
ចាប់តាំងពីអ៊ីរ៉ង់ និងប្រទេសមហាអំណាច ៥+១ បានចុះកិច្ចព្រមព្រៀងបញ្ចប់វិបត្តិនុយក្លេអ៊ែរ ដែលនឹងបើកផ្លូវឆ្ពោះទៅដកទណ្ឌកម្មចេញពីអ៊ីរ៉ង់ បណ្តាប្រទេសជាច្រើនបាននាំគ្នាសម្រុកចូលទៅស្វែងរកឱកាសរកស៊ីនៅអ៊ីរ៉ង់។ អ៊ីរ៉ង់ ដែលមានប្រជាជនសរុបរហូតដល់ទៅ ៨០លាននាក់ គឺជាទីផ្សារប្រកបដោយសក្តានុពល។
យោងតាមការព្យាកររបស់ធនាគារពិភពលោក ការដកទណ្ឌកម្មអន្តរជាតិនឹងជំរុញកំណើនសេដ្ឋកិច្ចអ៊ីរ៉ង់ ពី ៣% នៅឆ្នាំ២០១៥ ទៅដល់ ៥% នៅឆ្នាំ២០១៦ខាងមុខ ហើយការនាំចេញរបស់អ៊ីរ៉ង់ក៏នឹងកើនឡើងប្រមាណជា ១៧ពាន់លានដុល្លារផងដែរ។ ហេតុដូច្នេះហើយបានជាគេសង្កេតឃើញថា គ្រាន់តែមានការចុះកិច្ចព្រមព្រៀងនុយក្លេអ៊ែរភ្លាម គណៈប្រតិភូមកពីបណ្តាប្រទេសលោកខាងលិចជាច្រើន រួមមាន អូទ្រីស អ៊ីតាលី អាល្លឺម៉ង់ និងអង់គ្លេស ជាដើម បាននាំគ្នាបន្តកន្ទុយគ្នាទៅបំពេញទស្សនកិច្ចនៅអ៊ីរ៉ង់ តាំងពីមុនបារាំងទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ