ហ្សកដានីផុងខ្លួន ក្នុងសង្រ្គាមរបស់អាមេរិក ប្រឆំាងក្រុមជីហាត នៅ ស៊ីរី
ចុះផ្សាយនៅថ្ងៃ៖
កំហឹង ប្រឆាំងនឹងក្រុមជីហាត នៅតែពុះកញ្ច្រោលនៅហ្សកដានី ក្រោយដំណឹង ប្រហារជីហាត Pilote ហ្សកដានី ដោយក្រុមជីហាត។ កាលពីល្ងាចថ្ងៃពុធ ព្រះមហាក្សត្រ អាប់ដាឡាទីពីរ របស់ហ្សកដានី ប្រកាសសងសឹក ចាត់វិធានការចាស់ដៃតបវិញ នឹងក្រុមជីហាត នៃអង្គការរដ្ឋអ៊ីស្លាមដែលបានដុតសម្លាប់អ្នកបើកបរយន្តហោះចម្បាំង ជាតិហ្សកដានី ទាំងរស់។ ការដុតសម្លាប់ទាំងរស់ Pilot ហ្សកដានី រឹតតែធ្វើឲ្យហ្សកដានីមានការប្តេជ្ញាចិត្ត កាន់តែខ្លាំង ដើម្បី ចូលរួមជាមួយសម្ព័ន្ធអន្តរជាតិ ដឹកនាំដោយអាមេរិក ដើម្បីប្រយុទ្ធប្រឆាំងនឹងក្រុមជីហាត នៅក្នុងប្រទេសស៊ីរី និងអ៊ីរ៉ាក់។ នេះបើតាមអ្នកនាំពាក្យរបស់រដ្ឋាភិបាល នៅក្រោយកិច្ចប្រជុំមន្រ្តីយោធាជាន់ខ្ពស់ ដែលដឹកនាំដោយព្រះមហាក្សត្រហ្សកដានី។ ហ្សកដានីកំពុងប្រលូកចូលកាន់តែជ្រៅ ទៅក្នុងសង្រ្គាមដែលដឹកនាំដោយអាមេរិក ដើម្បី ប្រឆាំងនឹងក្រុមជីហាត នៅស៊ីរី និងនៅអ៊ីរ៉ាក់។
ការដុតសម្លាប់អ្នកបើកយន្តហោះ ហ្សកដានី ដោយពួកជីហាតបានធ្វើឲ្យហ្សកដានីមិនអាចដើរថយក្រោយ នៅក្នុងសង្រ្គាមប្រឆាំងនឹងក្រុមជីហាត។ អ្នកបើកបរយន្តហោះ ហ្សកដានី ដែលត្រូវពួកជីហាត ចាប់ជាចំណាប់ខ្មាំង និងត្រូវដុតសម្លាប់ទាំងរស់ បានចូលរួមនៅក្នុងប្រតិបត្តិការទ័ពអាកាស របស់សម្ព័ន្ធអន្តរជាតិដែលដឹកនាំដោយអាមេរិក ប្រឆាំងនឹងក្រុមជីហាត។ ប្រជាជនហ្សកដានីមួយចំនួនកំពុង បន្ទោសរដ្ឋាភិបាលថា កំពុងធ្វើសង្រ្គាមមួយដែលមិនមែនជារបស់សង្រ្គាមរបស់ប្រជាជនហ្សកដានី។
ទោះបីជាហ្សកដានី មិនទទួលរងប៉ះពាល់ដោយផ្ទាល់ ដោយសង្រ្គាមរបស់ពួកជីហាត នៅស៊ីរី ប៉ុន្តែ គេអាចយល់បានពីហេតុផលច្រើនយ៉ាង ដែលធ្វើឲ្យហ្សកដានីត្រូវតែចូលរួម នៅក្នុងសម្ព័ន្ធអន្តរជាតិ ដឹកនាំដោយអាមេរិក ដើម្បីប្រឆាំងនឹងក្រុមជីហាត។
ទីមួយ ហ្សកដានី ដែលមានព្រំដែនជាប់ជាមួយទាំងស៊ីរី និងអ៊ីរ៉ាក់ កំពុងមើលឃើញ ការគំរាមកំហែង មិនយូរ មិនឆាប់ របស់ក្រុមជីហាត ទៅលើសន្តិសុខរបស់ខ្លួន ព្រោះថា ក្រុមជីហាត កំពុងរីកឥទ្ធិពលខ្លាំងនៅស៊ីរី។ ទីពីរ ហ្សកដានី ដែលទទួលជនភៀសខ្លួន ស៊ីរី ដែលតំណាងឲ្យ២០ភាគរយនៃប្រជាជនរបស់ខ្លួន ចង់ចូលរួមប្រយុទ្ធប្រឆំាងនឹងក្រុមជីហាត ដើម្បីធ្វើយ៉ាងម៉េច អាចឲ្យប្រជាជនភៀសខ្លួនស៊ីរីអាចត្រលប់ទៅទឹកដីកំណើតរបស់ខ្លួនវិញ។
ហេតុផលទីបី ហេតុផលចាំបាច់ដែលគេមើលឃើញថា ហ្សកដានីត្រូវតែចូលរួមប្រយុទ្ធដាច់ខាត ជាមួយនឹងសម្ព័ន្ធអន្តរជាតិ ដឹកនាំដោយអាមេរិក នោះក៏ព្រោះថា ហ្សកដានី ជាសម្ព័ន្ធមិត្ត សំខាន់មួយរបស់អាមេរិកដែលជាអ្នកនាំមុខធ្វើសង្រ្គាមប្រឆាំងនឹងក្រុមជីហាត នៅស៊ីរី និងនៅអ៊ីរ៉ាក់។ ហ្សកដានីមិនត្រឹមផ្តល់ទឹកដីសម្រាប់មូលដ្ឋានទ័ពអាមេរិក នៅដើមបូព៌ា ប៉ុន្តែ បានសម្រេចចូលរួមក្នុងប្រតិបត្តិការប្រយុទ្ធប្រឆាំងនឹងក្រុមជីហាតទៀត។
នៅក្នុងជំនួប កាលពីថ្ងៃអង្គារ ជាមួយលោកប្រធានាធិបតីអាមេរិក ព្រះមហាក្សត្រហ្សកដានី អាប់ដាឡា ទីពីរ ទើបបានទទួលការសន្យាពីលោកអូបាម៉ា ដែលថា នឹងបង្កើនទឹកប្រាក់ជំនួយ ឲ្យដល់មួយពាន់លានដុល្លារ ក្នុងមួយឆ្នាំៗ ចាប់តាំងពីឆ្នាំ នេះដល់ឆ្នាំ ២០១៧។ ព្រះមហាក្សត្រអាប់ដាឡា ទីពីរបានថ្លែងអំណរគុណមិនឈប់ពី ទឹកប្រាក់ជំនួយរបស់អាមេរិក ដែលមិនត្រឹមតែជួយដោះស្រាយវិបត្តិជនភៀសខ្លួន ស៊ីរី ប៉ុន្តែ នឹងជួយសេដ្ឋកិច្ចហ្សកដានី ដែលមួយផ្នែក កំពុងពឹងអាស្រ័យសំខាន់លើជំនួយរបស់អាមេរិក។
នៅក្នុងពេលជួបជាមួយលោកអូបាម៉ា ព្រះមហាក្សត្រអាប់ដាឡា ទីពីបានប្រកាសថា ការប្រហារជីវិតអ្នកបើកយន្តហោះ ចម្បាំងហ្សកដានី រឹតតែធ្វើឲ្យហ្សដានីប្តេជ្ញាចិត្តកាន់តែខ្លាំងដើម្បីប្រយុទ្ធនឹងក្រុមជីហាត។ ហ្សកដានីបានសងសឹកនឹងក្រុមជីហាតភ្លាមៗ ដោយបានព្យួរក ស្រ្តីជីហាតអ៊ីរ៉ាក់ម្នាក់ នៅថ្ងៃដែលរូបភាពបង្ហាញអ្នកបើកយន្តហោះហ្សកដានី ត្រូវពួកជីហាតដុតសម្លាប់។ ជារួម អាជ្ញាធរហ្សកដានីបានប្រហារជីវិតភេរវជនពីរនាក់ ដែលមានម្នាក់ ជាមេអាល់កៃដា ប្រចាំនៅ អ៊ីរ៉ាក់ ផងដែរ។ បន្ទាប់ពីនេះ ហ្សកដានីបានសន្យាធ្វើសង្រ្គាមយោធា សង្រ្គាមព័ត៌មាន និងសង្រ្គាមមនោគមវិជ្ជាដើម្បីប្រយុទ្ធប្រឆាំងនឹងក្រុមជីហាត។ តាមប្រធានសភាហ្សកដានី ដែលវិទ្យុបារាំងRFIបានជួបសម្ភាសន៍កាលពីថ្ងៃម្សិលមិញ ប្រជាជនហ្សកដានីដែលចង់សងសឹកឲ្យអ្នកបើកយន្តហោះMaaz Al Kassahebត្រូវបានអំពាវនាវឲ្យចូលរួមប្រយុទ្ធក្នុងសមរភូមិ និងលួចយកព័ត៌មានទាំងឡាយណា ដើម្បី ឈានទៅដល់ការសម្លាប់បំបាត់ក្រុមជីហាតទាំងស្រុង។
ហ្សកដានី៖ ពួកជីហាត សាហាវ និងប្តេជ្ញាចិត្តខ្ពស់ដើម្បីសម្លាប់ចំណាប់ខ្មាំង
រដ្ឋាភិបាលហ្សកដានីបានធ្លាប់ព្យាយាមគ្រប់មធ្យោបាយ ដើម្បីបានការដោះលែង អ្នកបើកយន្តហោះចម្បាំងរបស់ខ្លួន។ តាមមន្រ្តីជាន់ខ្ពស់ហ្សកដានី តាំងពីខែធ្នូ យោធាបានចរចា ជាច្រើនដង តាមរយៈ អន្តរការី ភាគីទីបី ដើម្បីឲ្យក្រុមជីហាតដោះលែងចំណាប់ខ្មាំងរបស់ខ្លួន។ ហ្សកដានីបានសុខចិត្តយល់ព្រមដោះលែង ស្រ្តីជីហាត ភេរវជនទៅតាមការទាមទាររបស់ពួកជីហាត ប៉ុន្តែ ហ្សកដានីទាមទារឲ្យពួកជីហាតបង្ហាញភស្តុតាង ដែលថា អ្នកបើកយន្តហោះរបស់ខ្លួន នៅមានជីវិតនៅឡើយ។
តាមមន្រ្តីស៊ើបការណ៍សម្ងាត់របស់ហ្សកដានី គេគ្មានសង្ឃឹមថា អ្នកបើកយន្តហោះហ្សកដានីនៅមានជីវិតទេ ព្រោះថា ពួកជីហាតមានការប្តេជ្ញាចិត្តខ្ពស់ថា នឹងសម្លាប់ចំណាប់ខ្មាំង។ តាមកាសែតក្នុងស្រុកហ្សកដានី អ្នកបើកយន្តហោះចម្បាំងហ្សកដានី ត្រូវពួក ជីហាត សម្លាប់តាំងពីដើមខែមករាម្ល៉េះ ប៉ុន្តែ ពួកជីហាតនៅបន្តធ្វើចរចា ដើម្បី បានការដោះលែងអ្នកទោសជីហាតអ៊ីរ៉ាក់ ដែលកំពុងស្ថិតនៅក្នុងដៃរបស់រដ្ឋាភិបាលហ្សកដានី។
អេមីរ៉ា អារ៉ាប់ រួមបានផ្អាក លែងបញ្ជូនយន្តហោះចម្បាំង ទៅវាយប្រហារក្រុមជីហាត នៅប្រទេសស៊ីរី
ប្រទេសអេមីរ៉ា អារ៉ាប់រួមបានផ្អាកប្រតិបត្តិការយន្តហោះចម្បាំងរបស់ខ្លួន នៅស៊ីរី តាំងពីខែធ្នូម្ល៉េះ ពោល គឺនៅប៉ុន្មានថ្ងៃក្រោយ ដែលអ្នកបើកយន្តហោះចម្បាំងហ្សកដានី ត្រូវពួកជីហាត ស្ទាក់បាញ់ និងចាប់ជាចំណាប់ខ្មាំង។ ប៉ុន្តែ ដំណឹងនេះទើបតែបែកចេញជាសាធារណៈ នៅក្រោយការចុះផ្សាយរបស់កាសែតThe New York Times នៅដើមសប្តាហ៍នេះ។
មន្រ្តីយោធាជាន់ខ្ពស់អាមេរិក ម្នាក់ ដែលសុំមិនបញ្ចេញឈ្មោះបានបញ្ជាក់ព័ត៌មាននេះ និងបានអះអាងថា អេមីរ៉ា អារ៉ាប់រួមនៅតែជាដៃគូរបស់អាមេរិកដើម្បី ប្រយុទ្ធប្រឆាំងនឹងក្រុមជីហាត។
សូមបញ្ជាក់ថា មានប្រទេសចំនួន៤ (អេមីរ៉ា អារ៉ាប់រួម ហ្សកដានី ប៉ារ៉ែន និងអារ៉ាប៊ី សាអូឌីត) ដែលចូលរួមប្រយុទ្ធប្រឆាំងនឹងក្រុមជីហាត នៅក្នុងទឹកដីស៊ីរី។ តាមកាសែត The New York Times អេមីរ៉ា អារ៉ាប់រួមបានទាមទារឲ្យអាមេរិកចូលរួមបន្ថែម ដើម្បីរក្សាធានាសន្តិសុខឲ្យអ្នកបើកយន្តហោះចម្បាំងរបស់ខ្លួន។ ជាក់ស្តែង អេមីរ៉ា អារ៉ាប់រួម ទាមទារឲ្យអាមេរិកបញ្ជូនយន្តហោះ 22Osprey ដែលហោះលឿនដូចយន្តហោះចម្បាំង និងអាចចុះចតដូចឧទ្ធម្ភាគចក្រ សម្រាប់ជួយជួយសង្រ្គាះ រំដោះទាហាន ពីមូលដ្ឋានទ័ពនៅប្រទេសកូវ៉ែត ឲ្យទៅប្រចាំការនៅភាគខាងជើងអ៊ីរ៉ាក់ ពោលគឺនៅឲ្យជិតនឹងកន្លែងដែលយន្តហោះចម្បាំងសម្ព័ន្ធអន្តរជាតិកំពុងធ្វើប្រតិបត្តិការវាយប្រហារលើពួកជីហាតវិញ។ សេតវិមាននៅមិនទាន់បានឆ្លើយតបយ៉ាងណា ចំពោះ ការទាមទាររបស់អេមីរ៉ា អារ៉ាប់ រួម ចំណែក អាជ្ញាធរអេមីរ៉ា អារ៉ាប់ រួមបានបដិសេធមិនផ្តល់ព័ត៌មាននេះដល់អ្នកកាសែត ដោយហេតុផល ថា ជាការសន្ទនាឯកជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ